Rusiya növbəti dəfə Azərbaycan ərazisində ABŞ bioloji silah laboratoriyalarının olduğunu iddia edib. Rusiya Silahlı Qüvvələrinin Radiasiya, Kimyəvi və Bioloji Müdafiə Qoşunlarının (RCBZ) rəhbəri İqor Kirillov iddia edir ki, Pentaqon tərəfindən 2014-2022-ci illərdə postsovet respublikalarında (Ukrayna, Gürcüstan, Moldova, Azərbaycan) 500-dən çox elmi-tədqiqat layihəsi həyata keçirilib.
Ukrayna və Gürcüstanın Rusiya ilə münasibətləri məlumdur. Azərbaycana gəldikdə, ölkəmiz hər zaman sözügedən məsələdə tərəfsiz və məsafəli mövqedə dayanıb. Bu iddianın ən qəribə tərəfi odur ki, rusiyalı general Azərbaycanın adını səsləndirməsə də, dərc olunan materialda ölkəmizin də adı qeyd olunub. Yəni başqa sözlə, Rusiya tərəfi əlində əsas olmadığı üçün rəsmi ağızdan bu iddianı səsləndirmir, amma bu cür dolayı yollara əl ataraq Bakını ittiham etməyə çalışır. Dəfələrlə, buna bənzər informasiyalar yayılıb. Bu il yanvarın 22-də "Rossiya-24" telekanalında verilən, jurnalist Arkadi Mamontovun müəllifi olduğu "Andromeda ştammı" sənədli filmində keçmiş SSRİ-nin bir çox respublikalarında ABŞ Müdafiə Nazirliyinin maliyyə vəsaiti ilə tikilmiş mikrobioloji laboratoriyalarının olduğu iddia edilirdi. Siyahıda Azərbaycan da vardı.
Bir sözlə, artıq neçənci dəfədir ki, Rusiyada Azərbaycana yönəlik belə iddialar səslənir. Bütövlükdə, Azərbaycandakı laboratoriyalarla bağlı iddialar nə dərəcədə ciddi ola bilər? Doğrudanmı belə laboratoriyalar ölkəmizdə var?
“Rəsmi Moskva bütün bu amilləri nəzərə alır və buna görə də bir daha...”
Sözügedən məsələ ilə bağlı fikirlərini “Bakı-Xəbər”lə bölüşən politoloq Elşən Manafov bununla bağlı bir sıra məqamlara toxundu: “Rusiya Mudafiə Nazirliyi rəsmisinin Azərbaycanda Pentaqonun dəstəyi ilə fəaliyyət göstərən bioloji silah laboratoriyalarının olması barədə səsləndirdiyi fikirlər tamamilə absurddur. Bu, iki dövlət arasındakı müttəfiqlik münasibətlərinin məzmun və formasına tamamilə ziddir. Azərbaycan Rusiya ilə münasibətlərini, bir qayda olaraq, qarşılıqlı hörmət, anlaşma və mənfəət prinsipləri üzərində qurub inkişaf etdirib. Bu ilin fevral ayında Rusiya və Azərbaycanın dövlət başçıları tərəfindən imzalanmış və münasibətlərin mahiyyət etibari ilə yeni mərhələyə yüksəlməsinin göstəricisi kimi qəbul oluna biləcək məlum muqavilədə tərəflərin bir-birinin ərazi butövlüyunə, suverenliyinə hörmət etməsi öz əksini tapıb. Sazişdə bir-birinin daxili işlərinə qarışmamaq, separatizmə və beynəlxalq terrorizmə qarşı birgə mübarizə aparacaqları qeyd olunub. Azərbaycan bu gün dünyada beynəlxalq gərginliyin artması fonunda Qərb və Rusiya arasında keçirilmiş bir sıra göruşlərə ev sahibliyi etməklə müxtəlif geosiyasi qütblərin etimad etdiyi bir dövlət statusu qazanib. Dəfələrlə sivilizasiyalar arasında əməkdaşlığın genişləndirilməsi və inkişafı təşəbbüsləri ilə çıxış edib, etibarlı tərəfdaş kimi tanınıb. Rusiya ilə münasibətləri müttəfiqlik müstəvisi üzərinə gətirməklə Azərbaycan bir tərəfdən müasir dövrun əsas çağırışlarından birinə cavab verib və müasir dünyanın çoxqütblü olması ilə məlum suallara cavabda məhz coxqütblü formatın tərəfdarı olduğunu bildirib. Digər tərəfdən, Cənubi Qafqaz regionunda Rusiyanın proseslərə həlledici təsir imkanlarının olduğunu etiraf edib. Bütun bunların fonunda Azərbaycanı Pentaqonla beynəlxalq hüquqa zidd məsələlərdə əməkdaşlıqda ittiham etmək ədalətsizlikdir. Belə ittihamların heç bir əsası yoxdur. Düşünürük ki, rəsmi Moskva bütün bu amilləri nəzərə alır və buna görə də bir daha özünün müxtəlif instansiyalarda məsul vəzifələrdə çalışan rəsmi şəxslərini bu kimi məsuliyyətsiz cağışıriş və bəyanatlarla çıxış etməkdən çəkindirməlidir”.
Politoloq onu da əlavə etdi ki, belə məlumatlar iki ölkə münasibətlərinə zərər vurur.
Vidadi ORDAHALLI
