İran İnqilab Keşikçiləri Korpusuna (SEPAH) bağlı olan “Fars” xəbər agentliyi Qarabağın adını təhrif edərək “Arsax” yazıb və Rusiya Müdafiə Nazirliyinin mövqeyini təbliğ edir.
Azərbaycan mətbuatı İran mediasına istinadla xəbər verir ki, agentlik Azərbaycan hərbçilərinin "atəşkəsi pozduqlarını" və “Arsax”da dinc sakini "güllələdiklərini" iddia edir.
“Hadisə Azərbaycan Ordusunun sərhədi pozaraq irəlilədiyi “Parux” (Fərrux-red) bölgəsində baş verib. Bir gün sonra Azərbaycanın “Bayraqdar” pilotsuz uçuş aparatı Arsaxa hücum edərək 3 erməni hərbçini öldürüb".
Azərbaycana qarşı SEPAH-ın saytında həyata keçirilən bu təxribat bir neçə gün əvvəl Rusiya Müdafiə Nazirliyinin yaydığı təxribatçı məlumatın təkrarıdır.
Məlumdur ki, SEPAH ilk dəfə deyil Azərbaycanı hədəfə alır, bu qurumun nəzdində olan media qurumları dəfələrlə Azərbaycanın dövlət müstəqilliyini, ərazi bütövlüyünü şübhə altına alan məqalələr yayımlayıb.
"... Açıq görsənir ki, onların niyyəti separatçı qalıqlarına qol-qanad verməkdir"
AMEA-nın Sosiologiya və Fəlsəfə İnstitutunun aparıcı elmi işçisi, fəlsəfə doktoru, BAO başqanının müavini, siyasi şərhçi Faiq Ələkbərli "Bakı - Xəbər"ə şərhində bildirdi ki, həm İran mətbuatı, həm də rəsmi Tehran həmişə Azərbaycana qarşı qərəzli mövqe sərgiləyir:"Azərbaycanla bağlı mövqeləri həmişə qərəzli olub. Bu da təsadüfi deyil. İran rəhbərliyi, İran Azərbaycanın güclənməsini, öz torpaqlarını işğaldan azad etməsini və güclü bir mövqeyə sahib olmasını istəmir. Bu anlamda bəlkə də Rusiyadan, yaxud da Fransadan daha artıq şəkildə Qarabağdakı separatçıları dəstəkləyən rəsmi Tehran olub. İran İslam Respublikası 30 il müddətinə ikili siyasət yürüdüb. Üzdə hər dəfə Azərbaycanın ərazi bütövlüyünü tanıdığını elan etsə də, lakin faktiki olaraq Ermənistana və separatçılara dəstək göstərib. Separatçı rejimə həmişə açıq, yaxud gizlin şəkildə dəstək göstərən rəsmi Tehran bu gün separatçı tör-töküntünün müəyyən qədər arxasında durduğunu göstərir. SEPAH-a aid agentliyin yayımladığı təxribat onların mahiyyətini, iç üzünü bir daha ortaya qoyur. Sözügedən agentlik Qarabağ deyil, məhz "Arsax" deməsi ilə separatçı tör-töküntünün yanında olduqlarını göstərmək istəyir. Burdan da açıq görsənir ki, onların niyyəti separatçı qalıqlarına qol-qanad verməkdir. Bir tərəfdən Rusiya, o biri tərəfdən isə Fransa və İran bu cür təxribatçı davranışlar göstərir".
F.Ələkbərlinin sözlərinə görə, 44 günlük Vətən müharibəsində Azərbaycanın qazandığı zəfər rəsmi Tehranın iç üzünü ortaya çıxarmışdı, lakin sonradan bunu ört-basdır etməyə çalışdılar. Ekspert qeyd edir ki, Azərbaycanın qələbəsini və tezliklə Xankəndidə öz hakimiyyətini bərqərar etmək uğrunda addımlarını həzm edə bilməyən rəsmi Tehran mətbuat vasitəsilə separatçılara ürək-dirək verir. "Sözdə Azərbaycanın ərazi bütövlüyünü bərpa etdiyinə sevindiyini desə də, faktiki olaraq uğurlarımızı qəbul edə bilmir." SEPAH-ın separatçılara dəstək verməsi qəbuledilən deyil. SEPAH da, rəsmi Tehran da çox yaxşı bilir ki, "Arsax" deyilən bir qurum yoxdur, ora Azərbaycanın Qarabağ bölgəsidir. Buna baxmayaraq, təxribat xarakterli işlər görürlər. Nə qədər iddia etsələr də ki, yox, bu, mətbuatın mövqeyidir, rəsmi Tehranın mövqeyi bu cür deyil, bunu tamamilə qəbul edə bilmərik. Əslində, "Fars" agentliyinin bu təxribatı eyni zamanda rəsmi Tehranın mövqeyidir. Əlbəttə, Azərbaycan da öz mövqeyini daha kəskin şəkildə ortaya qoymalıdır. Daha dəqiq formada rəsmi Tehrana öz mövqeyini bildirməlidir. İstər SEPAH olsun, istər onun mətbuat orqanları, yaxud İranın digər qurumları olsun, onlar bir çox hallarda hədlərini aşırlar. Azərbaycan böyük ölçüdə öz ərazi bütövlüyünü təmin edib, bir-iki kiçik məsələ var ki, onu da həll edəcək. Azərbaycanın öz ərazisində separatizmin kökünü kəsməsi üçün atdığı addımların Rusiya, Fransa, İran və başqa ölkələr tərəfindən digər yerlərə yozulması qəbul edilməzdir. Heç bir dövlət öz daxilində separatizmi qəbul etmir..."
F.Ələkbərli hesab edir ki, Azərbaycanın haqlı mövqeyi Güney azərbaycanlılar tərəfindən dəstəklənir və onlar da zaman-zaman Azərbaycan Respublikasının mövqeyini lazımı şəkildə rəsmi Tehrana çatdıra bilirlər və yeri gələndə, yenə də öz sözlərini deyəcəklər.
İradə SARIYEVA
