Rusiyanın İrəvandakı səfiri Kopırkin yenə təəccübləndirdi. Səfir deyib ki, Qərb ölkələri öz ambisiyaları və geosiyasi maraqları naminə Minsk Qrupu formatında Rusiya ilə işləməkdən imtina etdilər və bununla da Ermənistanın maraqları zərər görür. Diqqət edirsinizmi?..
Bunu “Bakı-Xəbər” Media Qrupunun rəhbəri, politoloq Aydın Quliyev öz Facebook səhifəsində yazıb.
A.Quliyev daha sonra yazır:
Əvvəla, niyə məhz Ermənistanın maraqları prioritet olaraq önə çıxarılır? Tərəfsiz vasitəçi olmaq istəyən ölkə Azərbaycanın da maraqlarının fərqində olduğunu göstərməli idi. Səfir isə birtərəfli mövqe tutdu...
İkinci, səfir bilməyərəkdən, ya qəsdlə göstərdi ki, Minsk Qrupunun həmsədrləri formatında Ermənistanın himayədarı olan tək ölkə Rusiya imiş və guya Qərb ölkələri bu formatda Rusiya ilə işləməkdən imtina etməklə Ermənistana ziyan vurublar...
Üçüncü, belə çıxır ki, Rusiyanın Qarabağ mövzusunda xüsusi nümayəndə təyinatı Qərbin Ermənistana ziyan vuran addımına cavabdır. Deməli, Rusiyanın xüsusi nümayəndəsinin normallaşma prosesində Ermənistanın maraqlarının müdafiəsinə üstünlük verəcəyi bu başdan anons edilir...
Səfirin "Ermənistan bundan ziyan görür" arqumenti çox səhv və ziyanlıdır. Bu səhv ondan irəli gəlir ki, Rusiya səfiri Minsk Qrupunun de-fakto olaraq buraxılmasının həqiqi səbəblərini bilmək istəmir. Ola bilməz ki, bilməsin. Onun ölkəsinə belə sərf edir. Səfir bilməlidir ki, Minsk Qrupunun buraxılması ABŞ və Fransanın Rusiya ilə bu formatda işləməkdən imtina qərarından başlamadı. Əksinə, ABŞ və Fransanın bu qərarına qədər Minsk Qrupu de-fakto artıq buraxılmışdı. Əvvəla, Minsk Qrupunun buraxılmasının əsası onun özünün 28 illik səmərəsiz fəaliyyəti ilə qoyulmuşdu. İkinci, Minsk Qrupu o zaman buraxıldı ki, Azərbaycanın son çarə olaraq Vətən müharibəsinə əl atmasına Rusiya səssiz qaldı və əslində Azərbaycanı dəstəklədi. Üçüncü, Minsk Qrupunun de-fakto buraxıldığı o zaman rəsmən bəyan edildi ki, müharibədən düz bir ay sonra bizim Prezident İlham Əliyev Minsk Qrupunun iki həmsədrini və Rusiyanın Bakıdakı səfirini onların təşəbbüsü ilə qəbul etdi və açıq dedi ki, niyə gəlmisiniz, Qarabağ mövzusunda sizlik bir iş qalmayıb, münaqişə həll edilib və onu sizsiz biz özümüz həll etdik. Bizim Prezident onlara hətta bundan sonra bölgədə hansı işləri görə biləcəkləri ilə bağlı fəaliyyət çərçivəsi də təqdim etdi. Vaxt almamaq üçün o barədə yazmaq istəmirəm. Dördüncü, Minsk Qrupu o vaxt buraxıldı ki, Prezident Əliyev ötən ilin sonlarında bir mötəbər müşavirədə bəyan etdi ki, Minsk Qrupunun üç həmsədr ölkəsinin arasında düzəlməz ixtilaflar var. Qeyd edim ki, bizim Prezident bu bəyanatı verəndə Ukrayna müharibəsinin hələ barıt iyi də yox idi. Təbii ki, bu gün səfir Kopırkinin dediyi "geosiyasi maraqlar və ambisiyalar naminə Rusiyadan imtina etdilər, Ermənistana ziyan vurdular" kimi mətləblərdən də əsər-əlamət yox idi. Nəhayət, bir neçə gün əvvəl Prezident İlham Əliyev Minsk Qrupunun de-fakto buraxıldığını qəti olaraq bəyan etdi. Əslində ardıcıl olaraq baş verən hadisələr Minsk Qrupunun de-fakto buraxıldığı barədə Azərbaycan Prezidentinin müharibədən az sonra bəyan etdiyi kursu təsdiqlədi.
Səfir Kopırkin bunları bilsəydi və ya bilmək istəsəydi, Minsk Qrupunun buraxılmasını Qərbin Rusiyaya qarşı hansısa ambisiyaları ilə bağlamazdı, təbii olaraq da "Ermənistan bundan ziyan çəkir" deyə tam yanlış və ziyanlı bir mövqeyə gəlməzdi...
Minsk Qrupunun de-fakto buraxıldığını və gərəksiz quruma çevrildiyini bu qrupun öz dişsizliyi şərtləndirdi. Prosesə son layiqli nöqtəni isə Prezident Əliyev qoydu...
Bütün bu arqumentlərdən sonra Azərbaycanın Ermənistanla normallaşma prosesində Rusiyanın xüsusi nümayəndəsinə tam etimad göstərməsi ciddi problemə çevrilə bilər...
