Rusiyanın Ermənistandakı fövqəladə və səlahiyyətli səfiri Sergey Kopırkin yenə ermənidən artıq erməni olmağa çalışır. Yenə diplomatik çərçivələrdən kənara çıxaraq aşırı ermənipərəst mövqe sərgiləməkdədir.
Belə ki, S.Kopırkin telekanallardan birinə müsahibəsində bəyan etdi ki, Rusiya heç vaxt ATƏT-in Minsk Qrupunda iştirakdan imtina etməyib: “Həmişə bu formatda fəal işləyib, lakin bizim qərbli tərəfdaşlarımız öz ambisiyalarına və geosiyasi maraqlarına görə Rusiya ilə əməkdaşlıq etmək istəmirlər. Bunun nəticəsində region ölkələri, xüsusən də Ermənistan əziyyət çəkir. Xarici İşlər Nazirliyimizin rəhbərinin dediyi kimi, problem Rusiya ilə işləməkdən imtina edən Minsk qrupundakı fransız və amerikalı tərəfdaşlarımızdadır. Burada sualı Rusiyaya ünvanlamaq olmaz. Mən deməzdim ki, Rusiya ATƏT-in Minsk Qrupunun fəaliyyətini şübhə altına alır. Biz həmişə bu formatı dəstəkləmişik, onun üzərində fəal işləmişik, heç vaxt deməmişik ki, ondan imtina edirik. Ermənistanın maraqları ABŞ və Fransanın ambisiyalarına görə zərər görür. Onların ambisiyaları və geosiyasi maraqları ucbatından təhlükəsizliyin gücləndirilməsinə xidmət edən mexanizmlər və beynəlxalq formatlar məhv edilir. Sülh və təhlükəsizliyin, region ölkələrinin, xüsusən də Ermənistanın maraqlarının geosiyasi və digər maraqlara qurban verilməsi təəssüf doğurur”.
Rusiyanın Minsk Qrupuna belə qahmar çıxmasında diqqəti çəkən məqam həm də ondan ibarətdir ki, məhz Ermənistanın maraqları önə çəkilir. Belə baxanda, vasitəçi ölkə gərək tərəfsiz mövqedən çıxış etsin və hər iki ölkənin maraqlarına eyni ölçüdə yanaşsın. Ancaq məlum olur ki, Rusyiya sözügedən formatın fəaliyyətini dayandırmasını məhz Ermənistanın maraqları baxımından məqsədəuyğun saymır. Yalnız bu kontekstdə məsələni qiymətləndirirlər. Bəs Azərbaycan haqda düşüncə niyə yoxdu?
“Kreml üçün Azərbaycanın maraqları heç vaxt önəmli olmayıb”
Məsələyə münasibət göstərən AMİP sədri Arzuxan Əlizadənin fikrincə, səfir Kopırkin əslində bununla Rusiyanın əsl niyyətini rəsmi şəkildə ortaya qoydu: “Prinsipcə, Rusiyanın bu oyunbazlığı bizim üçün yeni deyil. Rusiya hər zaman ATƏT-in Minsk Qrupundan öz məqsədləri üçün istifadə etməyə çalışıb. Bir tərəfdən Rusiya istəmir ki, Qərb Cənubi Qafqazda təşəbbüsü ələ alsın. Hər vasitə ilə bunun qarşısını almağa çalışıb. O biri tərəfdən, Rusiya 30 ilə yaxın Minsk Qrupunda əməkdaşlıq etdi. Məhz Qarabağ məsələsində ABŞ və Fransa ilə eyni mövqedən çıxış etdi. Hansı ki, bu nadir hadisə idi. O mənada ki, əksər məsələlərdə Rusiya ilə Qərb arasında kəskin fikir ayrılıqları olub. Qarabağ məsələsinə gəldikdə isə eyni mövqedən çıxış ediblər. 2020-ci ildə baş verən Vətən müharibəsi nəticəsində Azərbaycan ərazilərinin böyük hissəsini işğaldan azad etdi. Nəticədə tamamilə yeni reallıqlar yarandı və Minsk Qrupunun Qarabağ məsələsində vasitəçilik etməsinə ehtiyac qalmadı. İki ölkə arasında birbaşa təmaslar, Avropa İttifaqının vasitəçiliyi daha səmərəlidir, nəinki özünü doğrultmayan Minsk Qrupunun vasitəçiliyi. Üstəlik, Ukraynadakı müharibə fonunda Qərbin Rusiya ilə Minsk Qrupu formatında əməkdaşlığı mümkünsüzdür. Ancaq görünən odur ki, Rusiya Qarabağ məsələsinin birdəfəlik həll olunmasını istəmədiyi üçün belə narahatdır. Ona görə də ölü Minsk Qrupunu yenidən diriltməyə çalışır. Aradan bir belə vaxt keçəndən sonra ölünü diriltmək mümkünsüzdür. Kreml üçün Azərbaycanın maraqları heç vaxt önəmli olmayıb. Ona görə də zaman-zaman bu özünü göstərib”.
Partiya sədri onu da qeyd etdi ki, Rusiya məsələnin həllini istəsəydi, 10 nayabr razılaşmasından irəli gələn məsələlərin həlli ilə bağlı Ermənistana təzyiq göstərərdi.
Vidadi ORDAHALLI
