Azərbaycan dövləti ənənəvi olaraq dar gündə olan, problemlərlə üzləşən ölkələrə humanitar yardımlar göstərir. Məlum olduğu kimi, dövlətimiz pandemiya dövründə də bu humanist, nəcib əməllərini davam etdirib. Ukraynaya da kifayət qədər humanitar yardım göstərən Azərbaycan bununla dövlətimizin və xalqımızın əzəli xüsusiyyətini, yardımsevərliyini bir daha ifadə edib.
Bütün dünya bilir ki, pandemiya dövründə Azərbaycan koronavirusla mübarizəni dəstəkləmək məqsədilə 80-ə yaxın ölkəyə birbaşa və Ümumdünya Səhiyyə Təşkilatının xətti ilə maliyyə və humanitar yardımı edib, Pakistan və digər ölkələrə yardımlar, Heydər Əliyev Fondunun xətti ilə yardımlar və s. göstərib. Göründüyü kimi, həm dövlətin, həm də Heydər Əliyev fondunun xətti ilə humanitar yardımlar göstərilib.
Azərbaycanda uzun illərdən bəri humanitar yardımla bağlı ardıcıl siyasət mövcuddur. Bu güb Azərbaycan pandemiya dövründən başlatdığı humanitar diplomatiyanı Ukraynada davam etdirir və dövlətimizin bu addımları Ukrayna rəhbərliyi, ictimaiyyəti tərəfindən minnətdarlıqla qarşılanır.
“Azərbaycan uzun illərdir beynəlxalq müstəvidə ardıcıl humanitar siyasət yürüdür”
“Müasir İnkişaf” Birliyinin sədri, siyasi şərhçi Mübariz Göyüşlü “Bakı-Xəbər”ə şərhində qeyd etdi ki, Azərbaycan ən çətin dövrlərdə belə dünyadan öz köməyini əsirgəməyib. M.Göyüşlü deyir ki, pandemiya dövründə hər dövlət ehtiyacı olan ölkələrə dəstək göstərmirdi. Hətta ən varlı dövlətlər belə, Azərbaycandan fərqli olaraq, humanitar yardım məsələsinə ürəkdən yanaşmırdı. “Amma Azərbaycan o dövrdə ağır şəraitdə olan onlarla ölkəyə humanitar yardım göstərib. Ukraynada müharibə başlayandan indiyə kimi Azərbaycan bir deyil, bir neçə dəfə Ukraynaya humanitar yardım göndərib. Dövlətimiz bu ölkəyə ciddi humanitar dəstək verir, Ukrayna xalqına, müharibədən zərər çəkən insanlara mənəvi və humanitar kömək edir. Bu Azərbaycanın dünyada sülhə, təhlükəsizliyə, dinc yaşayışa, eyni zamanda humanitar fəalkətlə üzləşən dövlətlərə, xalqlara münasibətinin, həmçinin də iqtisadi gücünün göstəricisdir. Azərbaycan artıq regional bir gücə çevirilməkdədir. Qarabağ problemini həll etdikdən sonra öz imkanlarını genişləndirməkdədir və bu imkanlarından da təkcə özü üçün deyil, həmçinin qonşu və dost dövlətlərin inkişafına töhfə verir. Bu gün Azərbaycan humanitar fəlakətlərdən, müharibədən əziyyət çəkən insanlar üçün bir humanitar, mənəvi dayaqdır”.
Azərbaycan BMT-nin üzvü kimi çox çox böyük təşəbbüslərlə çıxış edən bir ölkədir, eyni zamanda da Qoşulmama Hərəkatının sədri olaraq dünyada aparıcı mövqedə olan bir ölkədir: “Azərbaycan beynəlxalq əməkdaşlığa həmişə sadiqdir. Dövlətimizin fəaliyyəti inkişafa dəstək verməyə, çətinliklərlə üzləşən xalqlara, dövlətə yardım etməyə yönəlib. Azərbaycan uzun illərdir beynəlxalq müstəvidə ardıcıl humanitar siyasət yürüdür. Ölkəmizin Ukraynaya bir neçə dəfə humanitar yardım göndərməsi Azərbaycanın öz humanist ənənələrinə sadiq qaldığını təsdiqləyir”.
İradə SARIYEVA
