Məlum olduğu kimi, Ermənistan parlamentinin üzvləri – Robert Köçəryanın lideri olduğu müxalif “Ermənistan” blokunun deputatları Qarabağa buraxılmayıb. Seyran Ohanyanın rəhbərlik etdiyi deputat qrupu sülhməramlılar tərəfindən Laçının girişində saxlanılıb.
Bildirilir ki, sülhməramlılar Azərbaycan tərəfi ilə əlaqə yaratdıqdan sonra gələnlər geri qaytarılıb. Erməni deputatların Azərbaycan ərazilərinə qanunsuz səfərinin qarşısının alınması onu deməyə imkan verir ki, artıq Rusiya sülhməramlı qüvvələri missiyalarını Azərbaycan tərəfi ilə koordinasiyalı şəkildə həyata keçirirlər. Azərbaycanın əldə etdiyi üstünlüklər, bölgədə əməliyyat prosesinə tam nəzarət yeni reallıqları şərtləndirən əsas cəhətlərdən biridir. Üstəlik, Ermənistan parlamentində qondarma rejiminin tribunaya yapışdırılmış “bayrağı”nın məhz deputatlar tərəfindən çıxarılması da onların mövcud reallığı qəbul etdiklərinə işarədir.
Ermənistan hər ötən günün onların əleyhinə işlədiyini başa düşür. Ona görə də Ermənistan tərəfi qısa müddətdə Azərbaycanla sülh müqaviləsinin imzalanmasına razılıq ifadə edib.
Erməni deputatlar istəklərinə nail ola bilməsələr də, bu mövzu ilə bağlı səs-küy yarada biliblər. Hətta ölkə başçısı Nikol Paşinyan da bu məsələyə reaksiya verib.
Məlumdur ki, Xankəndi Azərbaycanın inzibati ərazi vahidinə aid şəhərdir. Hazırda sülhməramlıların nəzarəti altında olan və ermənilərin kompakt yaşadığı ərazi vahidlərindən Azərbaycan parlamentinə seçilən deputatlar var. Onlar niyə həmin ərazilərə səfərə cəhd etmir?
Müstəqil siyasətçi Bünyamin Qəmbərli “Bakı-Xəbər”ə açıqlamasında bildirdi ki, Ermənistan deputatlarının Qarabağa buraxılmaması tam normaldır: “Çünki Qarabağ Azərbaycanın inzibati ərazi vahididir. Ora da xaricdən Azərbaycan dövlətinin razılığı olmadan kiminsə səfər etməsi yolverilməzdir. Rusiya hərbçiləri keçmişdə ciddi səhvə yol verərək, Ermənistanın bir çox rəsmi şəxslərini, Fransanın prezidentliyə namizədinin ora buraxılmasını təmin ediblər. Bununla bizim suverenliyimizə qarşı hörmətsizlik etdiklərini göstəriblər. Rusiya dəfələrlə bildirib ki, Azərbaycanın ərazi bütövlüyünü tanıyır. Buna görə də, heç Rusiyadan olan nümayəndə heyətlərini də bizim icazəmiz olmadan ora buraxmamalıdırlar. Bizim Xankəndidən olan deputatın niyə ora səfər etməyə cəhd etməməsilə bağlı obyektiv səbəblər var. Sülhməramlılar təhlükəsizliklə bağlı məsələni bəhanə edib, bizim Xankəndidən olan deputatlarımızı ora buraxmasalar ciddi qalmaqal olar. Görünür, bizim hakimiyyət bunları nəzərə aldığı üçün ermənilərin hazırda kompakt yaşadığı ərazilərdən seçilən deputatların ora səfər təşəbbüsü ilə çıxış etməsinə şərait yaratmır. Mən bu fikirdəyəm ki, həm millət vəkilləri, həm də mühüm dövlət qurumlarının təmsilçiləri Xankəndiyə səfər təşəbbüsü ilə çıxış etməlidir. Qoy bizə icazə verməsinlər. Buna heç bir əsas gətirə bilməzlər. Bunu etməməklə sülhməramlıları bir qədər sərbəst buraxmış oluruq. Ora səfər edənlərin təhlükəsizliyni təmin etmək birbaşa sülhməramlıların funksiyasına aid olan məsələdir”.
Məhəmmədəli QƏRİBLİ
