ABŞ Dövlət Departamenti dünyada insan haqlarının vəziyyətini əks etdirən hesabatını açıqlaylb. 2021-ci ili əhatə edən hesabatda Azərbaycandakı duruma da yer ayrılıb.
Dövlət Departamentinin saytında dərc olunan hesabatda ölkəmizdə insan hüquqlarının durumu kəskin tənqid edilib.
İllik hesabatın Azərbaycanla bağlı hissəsində ölkədə ciddi insan haqları pozuntularının olduğu qeyd edilib. Hesabatda qanunsuz və ya özbaşına qətllər, işgəncə, güc strukturları tərəfindən qəddar rəftar, qanunsuz və ya özbaşına həbslər, “siyasi məhbuslar”, ölkədən xaricdə olan fərdlərə qarşı siyasi repressiyalar, cinsi oriyentasiyaya görə fərdlərə qarşı polis zorakılığı, ağır həbsxana şəraiti kimi pozuntular yer alır.
Əlavə olaraq, ABŞ Dövlət Departamentinin dünyada insan haqlarının durumuna dair hesabatının Azərbaycan hissəsində məhkəmə sisteminin müstəqilliyi ilə bağlı geniş yayılmış problemlərin olduğu, jurnalistlərə qarşı zorakılıq mövcudluğu qeyd edilir.
ABŞ Dövlət Departamentinin Azərbaycanla bağlı ifadə etdiyi mövqeyi nə dərəcədə əsaslı saymaq olar?
Milli Qeyri Hökumət Forumunun prezidenti, hüquq müdafiəçisi Rauf Zeyni “Bakı-Xəbər”ə açıqlamasında bildirdi ki, bu cür qərəzli münasibətin dəfələrlə şahidi olmuşuq: “Təəssüflə qeyd etmək lazımdır ki, bu cür qeyri-obyektiv münasibət artıq davamlı xarakter alır. Hesabatda çox ciddi ittihamlar və eləcə də qərəzli fikirlər var. Çox təəssüflər olsun ki, Amerika kimi bir dövlətin Dövlət Departamenti dəqiqləşdirməmiş belə məlumatlar yayıb. Biz hər zaman bəyan etmişik ki, ölkəmiz bu cür məlumatların dəqiqləşdirilməsinə hazırdır. Dəfələrlə beynəlxalq qurumlarda məsələni qaldırmışıq ki, bu kimi hesabatlar Azərbaycanla məsləhətləşdirilməlidir.
Bu gün dünyada gedən prosesləri, qlobal dəyişiklikləri, regiondakı həssas münasibəti nəzərə alaraq bütün məsələlərə biz də diqqətli yanaşma ortaya qoymalıyıq. Təəssüflər olsun ki, həmişə olduğu kimi, yenə də bəzi dövlətlər və beynəlxalq təşkilatlar bizə qarşı ikili standartlarından, ədalətsiz, əksər hallarda isə qərəzli mövqeyindən əl çəkmir. ABŞ Dövlət Departamentinin son hesabatında, yenə də Azərbaycanla əlaqədar olaraq bir çox məsələlərdə ədalətsizlik nəzərə çarpır. Fikir verirsinizsə, bizim əldə etdiyimiz müsbət nailiyyətlərdən yox, yalnız çatışmazlıqlardan danışırlar. İnsan haqları ilə bağlı elə ABŞ-ın özündə də ciddi problemlər var. Ancaq onlar başqa ölkələrdəki problemləri aşırı dərəcədə şişirdərək təqdim edirlər. Bütün bunlar Azərbaycanın artan beynəlxalq nüfuzuna kölgə salmağa yönəlib. Belə alətlərdən istifadə etməklə, Azərbaycana təzyiqləri artırmağı düşünürlər. Biz də Qeyri Hökümət Təşkilatları olaraq bu cür qərəzli kampaniyalara dəfələrlə münasibətimizi bildirmişik. Çox təəssüflər olsun ki, belə böhtanlar davam edir. ABŞ çalışmalıdır ki, bu cür təzyiq metodundan imtina etsin. Bu münasibətlər əməkdaşlıq müstəvisinə transformasiya edilməlidir. Hər hansı nöqsanlar varsa belə, onların birgə müzakiəsi, aradan qaldırılması lazımdır”.
Məhəmmədəli QƏRİBLİ
