ABŞ Dövlət Departamentinin rəsmi saytında 2021-ci il dünya ölkələrində insan hüquqlarının vəziyyətinə dair illik hesabatın Ermənistan hissəsində bildirilib ki, 2020-ci ildə etnik erməni qüvvələrinin bəzi azərbaycanlı əsirləri qanunsuz şəkildə qətlə yetirdiklərinə və işgəncəyə, ləyaqəti alçaldan rəftara məruz qoyduqlarına dair məlumatlar yayılıb.
Bundan əlavə, Azərbaycan Baş Prokurorluğu Kəlbəcər rayonunun Başlıbel kəndində 1993-cü ildə erməni silahlı qüvvələri tərəfindən öldürüldüyü iddia edilən azərbaycanlılara aid məzarların axtarışına başlayıb. Həmçinin, Füzuli, Ağdam, Zəngilan, Kəlbəcər və Cəbrayılda azərbaycanlılara məxsus onlarla qəbirstanlığın dağıdılması ilə bağlı sübutlar üzə çıxıb. 2020-ci ildə atəşkəsin əldə olunmasından sonra Ermənistanın daha əvvəl nəzarət etdiyi Azərbaycan ərazilərində 7 azərbaycanlı hərbçi və 29 mülki şəxsin minaya düşərək həlak olduğu, xeyli sayda insanın yaralandığı qeyd edilib.
Ermənistanın Azərbaycan ərazisində törətdiyi vəhşi qətliamlar, müharibə cinayətləri ABŞ Dövlət Departamentinin hesabatına düşüb.
Hesab etmək olarmı ki, artıq səsimizi dünya eşitməyə başlayıb? Bunun ABŞ Dövlət Departamentinin hesabatına düşməsi nə deməkdir?
“ABŞ Ermənistanı Rusiyanın təsir dairəsindən çıxarmaq üçün onun müharibə cinayətlərini bu şəkildə yayır”
AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO başqanının müavini, siyasi şərhçi Faiq Ələkbərli “Bakı-Xəbər”ə bildirdi ki, son dövrlər rəsmi Vaşinqtonun, ABŞ Dövlət Departamentinin Azərbaycana münasibətinin müsbətə doğru dəyişdiyi hiss olunur. O hesab edir ki, biz bunu Böyük Britaniyanın münasibətində də görürük. F.Ələkbərlinin fikrincə, məhz bu məsələnin ABŞ Dövlət Departamentinin hesabatına salınması təsadüfi deyil: “Bu daha çox Rusiya ilə münasibətlə bağlıdır. Rusiyanın təsiri altında olan ölkələrdən biri də, şübhəsiz ki, Ermənistandır. Bu baxımdan, ABŞ Dövlət Departamenti Ermənistanın azərbaycanlı əsirlərə verdiyi işgəncələri, yaxud mülki əhaliyə qarşı törətdiyi cinayətləri öz hesabatına daxil etməklə bu ölkə ilə bağlı siyasətində dəyişiklik etdiyinə işarə vurur. Yadınıza gəlirsə, bir müddət əvvəl ABŞ-ın Rusiyanın forpostu olan Ermənistana qarşı sanksiya tətbiq edəcəyi barədə məlumatlar yayıldı. Mənə elə gəlir ki, ABŞ Ermənistanın ona əks mövqe tutub Rusiyanı dəstəkləməsini bağışlaya bilmir, bu səbəbdən də Ermənistanın hərbi cinayətlərini, hərbi əsirləri qanunsuz şəkildə qətlə yetirdiyini, işgəncəyə, ləyaqəti alçaldan rəftara məruz qoyduğunu öz hesabatında əks etdirir. Yoxsa nə baş verdi ki, Azərbaycana qarşı həmişə ikili standartlar sərgiləyən, bizə qarşı əks mövqe tutan ABŞ Dövlət Departamenti birdən-birə belə bir qərar qəbul etdi? Qarabağ müharibəsi dövründə 907-ci düzəlişi qəbul edib. Amma son dövrlər, xüsusilə də Rusiya ilə keçmiş postsovet ölkələrinin münasibətlərinin kəskinləşdiyi dövrdə ABŞ rəhbərliyindən Azərbaycana müəyyən isti münasibətlər sezilir. Son dövrlər ABŞ-ın Azərbaycana münasibətində müsbətə doğru dəyişiklik nəzərdən qaçmır. Ermənilərin istər Birinci Qarabağ Müharibəsində, istər ondan əvvəl, istərsə də, sonradan dinc əhaliyə qarşı törətdiyi müharibə cinayətlərindən ABŞ-ın xəbər tutması çox yaxşıdır. Bunu biz özümüz onsuz da bilirik, amma ABŞ-ın bilməsi və qəbul etməsi lazımdır. Dövlət Departamentinin son davranışları ona işarədir ki, ABŞ Ermənistanı Rusiyanın təsir dairəsindən çıxarmaq üçün onun müharibə cinayətlərini bu şəkildə yayır. Yəni ABŞ Azərbaycanın haqlı mövqeyni ifadə etməklə, dəstəkləməklə yanaşı, həm də Ermənistanın Rusiyadan uzaqlaşdırılmasına çalışır. Ona görə bu yoldan istifadə edir”.
Ümumiyyətlə, ABŞ-ın Rusiyaya yaxın ölkələrə bu şəkildə “yumşaq təzyiqlər” göstərəcəyini ehtimal edən siyasi şərhçinin sözlərinə görə, bundan Rusiyapərəst ölkələr nəticə çıxarmalıdır.
“ABŞ Dövlət Departamenti eyni zamanda Ermənistana xəbərdarlıq edir. Görürsüz ki, son dövrlər ABŞ Dövlət Departamenti Ermənistana yardımların həcmini məhdudlaşdırıb. Qarabağ separatçılarına ayırdığı pulu da kəsdi. Bu da onu göstərir ki, ABŞ-ın Ermənistana və ermənilərə münasibətində ciddi dəyişikliklər baş verib. Eyni zamanda Ermənistana yönəlik bu mesaj Paşinyanın rəhbərlik etdiyi hökumətin Rusiyanın təsirindən uzaqlaşdırılmasına yönəlib. Bütün hallarda Azərbaycan hər zaman özünün haqlı mövqeyini ifadə edib. Ermənistan tərəfindən törədilən bu qətlimaları zaman-zaman dünya gündəminə gətirib. Bütün bunların fonunda ABŞ Dövlət Departamentinin bu addımı rəsmi Bakının mövqeyini daha da gücləndirəcək”- deyə F.Ələkbərli vurğuladı.
İradə SARIYEVA
