Ermənistanın Baş naziri Nikol Paşinyan Rusiya sülhməramlı kontingentinin bir qrup erməni deputata Qarabağa daxil olmağa icazə verməməsinə münasibət bildirib. O bunu təəccüb doğuran hadisə kimi qiymətləndirib:
“Rusiya sülhməramlı kontingenti deputatlarımıza bəyan edib ki, bu davranış 10 noyabr 2020-ci il tarixli bəyanata ziddir”.
Qeyd edək ki, Ermənistan parlamentinin 10 müxalif deputatının bu günlərdə Azərbaycanın Qarabağ iqtisadi zonasının rus sülhməramlılarının müvəqqəti məsuliyyət zonasına daxil olmasına icazə verilməyib. Sülhməramlıların bu addımı doğrudanmı əldə olunan üçtərəfli razılaşmanın bəndlərinə ziddir, yoxsa Ermənistan yeni pozucu tezisə əl atıb?
Politoloq Yeganə Hacıyeva “ Bakı-Xəbər” ə açıqlamasında bildirdi ki, 44 günlük İkinci Qarabağ müharibəsinə son qoyan, Azərbaycan, Ermənistan və Rusiya liderləri arasında imzalanmış üçtərəfli bəyanatla Azərbaycan öz qələbəsini qanuniləşdirib: “Əldə olunmuş razılaşmaya əsasən, müharibədən sonra Rusiya sülhməramlıları atəşkəsin qorunmasını təmin etmək üçün Qarabağa yerləşdirilib. Orada həm də Rusiya-Türkiyə birgə monitorinq mərkəzi yaradılıb.
Üçtərəfli bəyanat əsasən tərəflərin məsuliyyət və öhdəlikləri var, sərhədlərin delimitasiya və demarkasiyası, bütün kommunikasiyaların açılması, Ermənistan ərazisindən keçərək Azərbaycan və onun tərkib hissəsi olan Naxçıvan arasında müstəqil əlaqələrin yaradılması və s.
Bugünə qədər həyata keçirilməyən əsas bənd 10 noyabr razılaşmasının 4-cü bəndində nəzərdə tutulan erməni silahlı qüvvələrinin hələ də bölgədən çıxarılmamasıdır. Razılaşmaya görə, Rusiya Federasiyasının sülhməramlı kontingenti erməni silahlı qüvvələrinin çıxarılması ilə paralel şəkildə yerləşdirilməli idi və bu hələ də baş verməyib. 10 noyabr bəyanatının 9-cu, sonuncu maddəsində regiondakı bütün iqtisadi və nəqliyyat əlaqələrinin bərpa edilməsi nəzərdə tutulur. Bu bənddə ikinci cümlə Azərbaycan və Naxçıvan arasında nəqliyyat əlaqəsinin təşkilindən və Ermənistanın hər iki istiqamətdə maneəsiz hərəkətin təhlükəsizliyinə zəmanətindən bəhs edir.
Bölgədə gələcək sülh və təhlükəsizliyin təminatı üçün üçtərəfli Bəyanatların tam şəkildə icrası vacibdir. Ermənistan tərəfi həmişə 10 noyabr Üçtərəfli Bəyanatın müddəalarını təhrif edir. Bəyanatda nəzərdə tutulan maddələrdə Rusiya sülhməramlı kontingentinin erməni rəsmilərinin Qarabağa səfərlərinin icrası öhdəliyi və ya ona aid hər hansı bir eyham belə yoxdur. Bununla Ermənistan hakimiyyəti növbəti təxribata əl atmaq istəyir. Rusiya sülhməramlıları öz öhdəliklərini bundan sonra da bu şəkildə yerinə yetirməlidir. Ermənistanın bu şantajlarından çəkinib, təxribatçı meylli insanları Qarabağa buraxmamalıdır”.
Məhəmmədəli QƏRİBLİ
