Aprelin 5-də Amerika Birləşmiş Ştatlarının Dövlət Katibi Antoni Blinken Prezident İlham Əliyevə zəng edib. Bu barədə Prezidentin Mətbuat Xidməti məlumat yayıb. Telefon danışığı əsnasında Antoni Blinken aprelin 6-da Brüsseldə Avropa İttifaqının dəstəyi ilə Ermənistan və Azərbaycan arasında liderlər səviyyəsində keçiriləcək görüşə ABŞ-ın önəm verdiyini bildirib.
Prezident İlham Əliyev regionda sülhün və sabitliyin təmin olunması, Ermənistan və Azərbaycan arasında münasibətlərin normallaşdırılması və sülh müqaviləsi üzrə danışıqlara başlanması, nəqliyyat bağlantıları və kommunikasiyaların qurulması üçün Azərbaycanın irəli sürdüyü təkliflərini və mövqeyini qeyd edib. Prezident humanitar məsələlərə toxunaraq, birinci Ermənistan-Azərbaycan müharibəsindən itkin düşmüş hesab olunan 3 890 nəfər azərbaycanlının taleyinə Ermənistan tərəfindən aydınlıq gətirilməsi və kütləvi məzarlıqların yerləri barədə məlumat verilməsinin vacibliyini diqqətə çatdırıb. Söhbət zamanı, həmçinin qarşılıqlı maraq doğuran digər məsələlər barəsində fikir mübadiləsi aparılıb.
Ermənistanın Baş naziri Nikol Paşinyan da ABŞ dövlət katibi Entoni Blinkenlə Brüsseldə keçiriləcək üçtərəfli görüşü müzakirə ediblər. Bu barədə Ermənistan hökumətinin mətbuat xidməti məlumat yayıb. Baş nazir və ABŞ dövlət katibi telefon danışığı zamanı Ermənistanla Azərbaycan arasında sərhədin demarkasiyası və delimitasiyası, regionda kommunikasiyaların açılması imkanları, həmçinin Ermənistan və Türkiyə arasında dialoqla bağlı fikir mübadiləsi aparıblar. Tərəflər Cənubi Qafqazda baş verən proseslərə toxunublar və regional sabitliyin, sülhün təmin edilməsinin vacibliyini qeyd ediblər. Həmçinin beynəlxalq platformalarda əməkdaşlıq məsələləri, eləcə də Ukraynadakı vəziyyət müzakirə edilib.
Qeyd edək ki, aprelin 6-da Brüsseldə Azərbaycan Prezidenti İlham Əliyev, Ermənistanın Baş naziri Nikol Paşinyan və Avropa Şurasının Prezidenti Şarl Mişelin birgə görüşü keçiriləcək.
Politoloq Əhəd Məmmədli “Bakı-Xəbər”ə açıqlamasında bildirdi ki, kimlərin prosesə müdaxilə etməsindən asılı olmayaraq biz ölkəmizin bu görüşlərdən nə qazandığını və nə itirdiyini nəzərdən keçirməliyik: “ Görünən budur ki, müxtəlif bəhanələrlə prosesi yubadırlar. Bizə fərq etməz kim prosesə müdaxilə edir. Yetər ki, ortada ciddi irəliləyişlər olsun. Biz Xankəndiyə və ətrafına nəzarət edə bilməyəcəyiksə, bu cür danışıqlar yalnız vaxt uzatmağa xidmət edəcək. Ən maraqlısı isə budur ki, bir-birilə hazırda didişən bu ölkələrin Qarabağla bağlı siyasətləri üst-üstə düşür. Yəni hər üç tərəf ermənilər üçün imtiyaz tələb edir. Konkret olaraq onlara imtiyaz istəyirlər. Azərbaycan öz mövqeyini konkretləşdirməlidir. Qısa müddətdə rus sülhməramlılarının yerləşdiyi ərazilərdə öz yurisdiksiyasını bərpa etməlidir. Belə getsə, bu prosesi də danışıqlar adı ilə 30 il uzadacaqlar. Rusiya konkret olaraq prosesi öz nəzarətində saxlamağa çalışır. Çünki bizim regionu öz təsir dairəsi sayır. Görüşqabağı Putinin zəngi də məhz bu məqsədə xidmət edir. Demək istəyir ki, formallıq xatirinə görüş ola bilər, ancaq konkret nəticə onsuz mümkün deyil. Bu görüşdən mən də konkret hansısa ciddi nəticə gözləmirəm. Çünki Ermənistanda Paşinyan süni etiraz mitinqləri təşkil etdirir ki, güya ona basqı var. Yəni hər hansı bir güzəştə gedərsə, onu ölkəyə buraxmazlar kimi təəssürat yaratmaq istəyir”.
Məhəmmədəli QƏRİBLİ
