Məlum olduğu kimi, Birləşmiş Ştatlarının Dövlət Katibi Entoni Blinken Prezident İlham Əliyevə zəng edib. Telefon danışığı əsnasında Entoni Blinken aprelin 6-da Brüsseldə Avropa İttifaqının dəstəyi ilə Ermənistan və Azərbaycan arasında liderlər səviyyəsində keçiriləcək görüşə ABŞ-ın önəm verdiyini bildirib.
Prezident İlham Əliyev ölkəmizin regionda sülhün və sabitliyin təmin olunması, Ermənistan və Azərbaycan arasında münasibətlərin normallaşdırılması və sülh müqaviləsi üzrə danışıqlara başlanması, nəqliyyat bağlantıları və kommunikasiyaların qurulması üçün Azərbaycanın irəli sürdüyü təklifləri və mövqeyini qeyd edib. Bununla belə, dövlət başçısı humanitar məsələlərə toxunaraq, birinci Ermənistan-Azərbaycan müharibəsindən itkin düşmüş hesab olunan 3890 nəfər azərbaycanlının taleyinə Ermənistan tərəfindən aydınlıq gətirilməsi və kütləvi məzarlıqların yerləri barədə məlumat verilməsinin vacibliyini diqqətə çatdırıb.
Ümumilikdə, artıq neçənci dəfədir ölkə başçısı ən yüksək səviyyəli danışıqlarda Qarabağda itkin düşənlərin məsələsini qaldırır. Bu günlərdə ATƏT sədri ilə görüşdə də bunu qabartdı. Ancaq hələ də beynəlxalq təşkilatların timsalında bu yönümdə Ermənistana təzyiq göstərmək üçün tərpəniş hiss olunmur.
Maraqlıdır, beynəlxalq təşkilatların sözügedən məsələ ilə bağlı passivliyi nə ilə bağlıdır?
“İkili standartlar səbəbindən beynəlxalq qurumlar passivdir və itkin düşən vətəndaşlarımızın taleyinə biganədilər”
Sözügedən məsələ ilə bağlı fikirlərini “Bakı-Xəbər”lə bölüşən “SƏS” Media Qrupunun rəhbəri, politoloq Bəhruz Quliyev hesab edir ki, ikili standartlar səbəbindən beynəlxalq qurumlar passivdir: “ABŞ Dövlət Katibi Entoni Blinkenin Prezident İlham Əliyevə zəng etməsi, eləcə də dövlət başçımızın bir sıra önəmli məsələləri amerikalı dövlət rəsmisinin diqqətinə çatdırması ilk növbədə onu sübut edir ki, ABŞ Azərbaycanı Cənubi Qafqazın lider dövləti kimi tanıyır. Eləcə də digər regional və qlobal məsələlərdə qarşılıqlı fikir mübadilələri aparmaqda maraqıldır. Əbəs deyil ki, Blinken Avropa İttifaqının dəstəyi ilə Brüssel görüşünə də toxunub, habelə ABŞ-ın Azərbaycanla Ermənistan arasındakı danışıqlara önəm verdiyini vurğulayıb. Buna müvafiq olaraq Prezident İlham Əliyev Azərbaycanın regionda sülhün və sabitliyin təmin olunması, Ermənistan və Azərbaycan arasında münasibətlərin normallaşdırılması, sülh müqaviləsinin imzalanması istiqamətində danışıqlara başlanması, iqtisadi çağırışlar ətrafında, xüsusilə nəqliyyat infrastrukturları və kommunikasiyaların təmin edilməsi yönündə Azərbaycanın irəli sürdüyü təşəbbüslərini amerikalı rəsminin diqqətinə çatdırıb. Lakin ən mühüm məsələ budur ki, cənab İlham Əliyev humanitar xarakterli məsələlərə xüsusi olaraq toxunub. Eyni zamanda, Birinci Qarabağ müharibəsi dövründə itkin düşmüş 3890 nəfər azərbaycanlının taleyinə Ermənistan tərəfindən aydınlıq gətirilməsini tələb edib. Dövlət başçısı paralel olaraq kütləvi məzarlıqların yerləri barədə də İrəvan tərəfindən Bakıya məlumatın verilməsinin vacibliyini vurğulayıb. Yəni Ermənistan ABŞ qarşısında hər hansı şikayət xarakterli və təsdiq olunmamış məsələləri qaldırırsa, bu zaman Azərbaycanın faktlara əsaslanan haqlı tələbləri ilk olaraq dinlənilməlidir. Məhz bu məqamın vacibliyi Blinkenin diqqətinə çatdırılıb. Əslində bu çox mühüm bir məsələdir və dövlət başçısı sübut edib ki, burada söz sahibi məhz qalib Azərbaycandır. Bütün bunlar isbat edir ki, dünya, beynəlxalq aləm Azərbaycanın yaratdığı yeni reallıqları qəbul edir. Ancaq o da bir reallıqdır ki, beynəlxalq təşkilatlar itkin düşən azərbaycanlılarla bağlı Ermənistana gərəkən təzyiqi göstərmirlər. Bu, həmin təşkilatların Azərbaycana münasibətdə ədalətsiz mövqe sərgilədiklərini ortaya qoyur. Hesab edirəm ki, ikili standartlar səbəbindən beynəlxalq qurumlar passivdir və itkin düşən vətəndaşlarımızın taleyinə biganədilər”.
Bu baxımdan politoloq hesab edir ki, sözügedən qurumlar ədalətsiz yanaşmaya son qoymalıdır.
Vidadi ORDAHALLI
