UNESCO-nun İcraiyyə Şurasının 214-cü sessiyasında Azərbaycan Respublikasının milli bəyanatı təqdim edilib. Sessiya çərçivəsində ölkəmizin bu qurumdakı daimi nümayəndəsi Elman Abdullayev üzv dövlətlərin geniş dəstəyi ilə UNESCO-nun bu mühüm orqanına - İcraiyyə Şurasına seçilən Azərbaycan Respublikasının milli bəyanatını təqdim edib.
E.Abdullayev çıxışında bir sıra məsələlərə toxunub, o cümlədən də Ermənistanın Azərbaycana qarşı maddi-mədəni irs cinayətlərini növbəti dəfə ifşa edib. “…Bütün bu illər ərzində Ermənistan hökuməti həm 30 il işğal altında saxladığı ərazilərdə, həm də Ermənistanın özündə Azərbaycanın mədəni irsinin məhv edilməsi, talan edilməsi və mənimsənilməsi istiqamətində sistemli siyasət həyata keçirib. Ermənistan silahlı qüvvələrinin geri çəkilməsi zamanı XIII əsrə aid Xudavəng monastırının zəngləri, xaçları, məşhur freskaları və qədim əlyazmaları, eləcə də Azıx mağaralarından və Şahbulaq qalasında olan qiymətli artefaktlar qanunsuz olaraq Ermənistana aparılıb”.
Diqqətə çatdırılıb ki, Şuşa Xalça Muzeyindən qanunsuz olaraq 160 qiymətli xalça çıxarılıb və onlardan 71-i Ermənistanın paytaxtı Yerevandakı muzeydə nümayiş etdirilib. Sadalanan bütün bu faktların hamısı İkinci Protokol Komitəsinə ölkəmizin təqdim etdiyi milli və könüllü hesabatlarda öz əksini tapır.
Azərbaycanın UNESCO-ya təqdim etdiyi Milli Bəyanatda olduqca mühüm məsələlər əksini tapıb və Ermənistanın cinayətləri ifşa olunub. Bəyanatda ifadə olunan məsələlər dünyaya onu çatdırır ki, Ermənistan Azərbaycan irsini işğal dövründə dağıdıb, talan edib, yerlə yeksan edib.
Hər kəs yəqin ki, 2022-ci ilin fevral ayının 4-də Azərbaycan Prezidenti İlham Əliyevin, Fransanın Avropa İttifaqına sədrliyi qismində Prezident Emmanuel Makronun, Avropa İttifaqı Şurasının Prezidenti Şarl Mişelin və Ermənistanın baş naziri Nikol Paşinyanın iştirakı ilə videoformatda keçirilən görüşü və orada nə barədə razılığa gəlindiyini bilir. Amma yenə xatırladaq ki, görüşdə UNESCO-nun Azərbaycana və Ermənistana missiyasının göndərilməsinə dair razılığa gəlinib və Azərbaycan qapılarını UNESCO-nun üzünə açsa da, Ermənistan bütün imkanlarından istifadə edərək UNESCO-nun missiyasının səfərinə mane olmağa çalışır. Həmin görüşdə UNESCO-nun regiona səfərinə şərait yaradılması qərara alındı və hər kəs də buna razılaşdı, Ermənistanın baş naziri razılıq versə də, bu gün bu ölkədə tamam başqa proses gedir.
Azərbaycanın UNESCO-ya təqdim etdiyi Milli Bəyanatdan da açıq görsənir ki, Ermənistan UNESCO-nun bölgəyə missiya göndərməsini istəmir. Çünki missiya bölgəyə səfər edərsə, Ermənistanın törətdiyi bütün cinayətləri görəcək və bu da Ermənistan üçün ağır zərbə olacaq.
“Heç şübhəsiz, Azərbaycan yenə də reallıqdan çıxış edib və Ermənistanın cinayət əməllərini bir-bir UNESCO səviyyəsində səsləndirib”
Tarixçi-etnoqraf Ənvər Çingizoğlu bizimlə söhbətində bildirdi ki, keçən ilin noyabrında Azərbaycan UNESCO Baş Konfransının 41-ci sessiyası çərçivəsində qurumun İcraiyyə Şurasına üzv seçilib. “Əvvəlcə onu deyim ki, Azərbaycanın UNESCO İcraiyyə Şurasına növbəti dəfə üzv seçilməsinin özünün böyük əhəmiyyəti var. Xatırladım ki, ölkəmiz bundan əvvəl 2005-2009-cu illərdə də UNESCO İcraiyyə Şurasının üzvü olub. Bu gün UNESCO-nun İcraiyyə Şurasının 214-cü sessiyasında Azərbaycan Respublikasının milli bəyanatının təqdim edilməsi çox mühüm hadisədir. Heç şübhəsiz, Azərbaycan yenə də reallıqdan çıxış edib və Ermənistanın cinayət əməllərini bir-bir UNESCO səviyyəsində səsləndirib. Bilirsiz ki, bu ilin fevralında keçirilən dörtərəfli görüşdə UNESCO-nun bölgəyə missiya göndərməsi məsələsində razılığa gəlinib. Amma çox təəssüf ki, UNESCO-nun missiyasının bölgəyə gəlməsinin qarışısını almaq üçün Ermənistan hər vasitəyə əl atır. Ermənistan o zaman missiyanın gəlməsini istəyir ki, UNESCO-dan gələnlər Azərbaycana gəlməsin və Qarabağa da Ermənistandan Laçın dəhlizi vasitəsilə keçməklə getsinlər. Əlbəttə, bu birmənalı olaraq yolverilməzdir. Ermənistan bütün hallarda UNESCO nümayəndələrinin bölgəyə səfərini sabotaj edir, necə ki, işğal dövründə edirdilər. Azərbaycan işğal dövründə bizim ərazilərdə tarixi abidələrimizə dəymiş ziyanla tanış olmaq üçün UNESCO-nu bölgəyə dəvət etsə də, UNESCO ermənilərin əli ilə bölgəyə gəlməkdən imtina etmişdi. Müharibə bitdikdən sonra UNESCO bölgəyə gəlmək niyyətində olduğunu bəyan etdi. Azərbaycan hər zaman UNESCO-nun missiyasının bölgəyə səfər etməsinə nail olmaq istəyib, Ermənistan isə hər zaman etiraz etdiyi üçün missiyanın gəlişi indiyə qədər ləngiyir”.
Ə.Çingizoğlunun sözlərinə görə, Ermənistan həm öz ərazisində, həm də Qarabağ və ətraf rayonlarda Azərbaycanın maddi-mədəni, tarixi irsini, mədəniyyətini, abidələrini məhv edib, məscidləri, alban kilsələrini dağıdıb, bəzilərini isə mənimsəyib. Ə.Çingizoğlunun bildirdiyinə görə, Ermənistanın missiyanın bu şəkildə gəlməsinə qarşı olmasının səbəbi ifşa edilməsidir. Ermənistan uzun illərdir ki, dünyaya saxtakarlıq toxumları səpir, yalanlarla beynəlxalq aləmi zəhərləyir, ermənilərin “qədim tarixə”, “mədəniyyətə” malik olduqlarını, Qarabağda erməni “izlərinin” yaşadığını iddia edir. Bunların isə kökündən yanlış olduğunu deyən Ə.Çingizoğlunun sözlərinə görə, UNESCO bütün təsirlərdən yayınmalı və 2022-ci ilin fevral ayının 4-də Prezident İlham Əliyevin, Fransanın Avropa İttifaqına sədrliyi qismində Prezident Emmanuel Makronun, Avropa İttifaqı Şurasının Prezidenti Şarl Mişelin və Ermənistan Respublikasının baş naziri Nikol Paşinyanın iştirakı ilə videoformatda keçirilən görüşdə gəlinən razılığa əməl etməlidir: “Ermənistan yenə də UNESCO missiyasının gəlməsini gecikdirir, çünki bilir ki, missiya gələrsə onun törətdiyi bütün cinayətlər ifşa ediləcək. Əlbəttə, illərdir yaratdığı miflərin dağılmasından, uydurmalarının, yalanlarının faş olunmasından çox qorxduqlarına görə missiyanın gəlməsinə qarşıdırlar”.
İradə SARIYEVA
