Rusiya-Ukrayna müharibəsindən 40 gün ötür. Çoxları müharibənin başlandığı 24 fevral tarixində savaşın bu qədər davam edəcəyini düşünmürdü. Son məlumatlardan biri budur ki, rus qoşunları artıq Kiyev istiqamətindən geri çəkilib.
Amma Qərb ölkələri durmadan bəyan edirlər ki, burada hiylə var. Putin Rusiyasının yenidən hücuma keçəcəyi iddia olunur.
Onu da qeyd edək ki, Ukraynaya verilən böyük dəstəyin fonunda Rusiyanın çox duruş gətirə bilməyəcəyi, məğlub olacağı bildirilirdi. Amma görünən odur ki, şimal qonşumuz nəinki dirənir, yeni hücum əməliyyatları üzərində baş sındırır.
Qeyd edək ki, hər iki ölkədə çoxlu sayda azərbaycanlı yaşayır. Keçmiş SSRİ məkanında bizim ən böyük diasporumuz məhz bu iki ölkədədir. Qeyri-rəsmi rəqəmlərlə Ukraynada təxminən 500 min nəfər azərbaycanlı yaşayır. Krımın ilhaqı, Donetsk və Luqanskda baş verən proseslərdən sonra vətəndaşların əksəriyyəti Odessa, Xarkov, Dneprə köçdü. Bir qisim isə ümumiyyətlə ölkəni tərk etdi. Amma hazırda ümumi vəziyyət acınacaqlıdır. Daimi yaşayış yerini tərk edənlərin sırasında kifayət qədər azərbaycanlılar da var.
Hər iki ölkədə olan diasporumuz belə məqamda hansı mövqeyi tutmalıdır ki, ümumi maraqlarımıza ziyan gəlməsin?
“Xarı-Bülbül” Dünya Azərbaycanlıları Mədəniyyət Assossiyasiyasından nümunəvi davranış...
Azərbaycan güc yolu ilə ölkələrin ərazilərinin bölünməsinə, sərhədlərin dəyişməsinə qarşıdır və bundan sonra da Ukraynanın ərazi bütövlüyünü dəstəkləyir. Azərbaycanın Rusiya və Ukrayna ilə çox yaxşı və strateji tərəfdaşlıq əlaqələri mövcuddur. Buna baxmayaraq bəzən hər iki ölkıdə olan diadporumuz fərqli mövqe sərgiləyir. Bu da normaldır. Çünki hər vətəndaş ilk növbədə öz ölkəsinin maraqlarını təmin etməlidir. Biz Ukrayna müharibəsi fonunda müharibə tərəfi olmayan üçüncü ölkələrdə Azərbaycan diasporunun çox fəal fəaliyyətini gördük. Xüsusilə də Ukraynadan çıxan soydaşlarımızın ilk olaraq üz tutduğu ölkələrdə. Məsələn, Polşa və Moldovada. Məlumdur ki, Ukraynadan çıxmaq üçün əsasən bu iki marşrutdan istifadə olunurdu.
“Xarı-Bülbül” Dünya Azərbaycanlıları Mədəniyyət Assossiyasiyasından bizə verilən məlumata görə, onlar Ukraynada baş verən müharibə ilə əlaqədar Polşa Respublikası ərazisinə keçən soydaşlarımıza dəstək kompaniyasının başladıb. Polşanın Krakov şəhərində fəaliyyət göstərən Xarı-Bülbül Dünya Azərbaycanlıları Mədəniyyət Assossiyasiyası gəncləri öz vəsaitləri, Krakov şəhərində yaşayan həmvətənlilərimizin ianələri və azərbaycanlı iş adamlarının dəstəyi hesabına 380 nəfərdən çox soydaşımızı qalmağa yer, qida və nəqliyyat xidmətləri ilə təmin edilib. Assossiyasiyanın sədri Muxtar Şeyxzamanlı, sədr müavini Elmir Qocayev, İdarə heyyətinin üzvləri Müşviq İbrahimov, Ülkər Əzizova, Fərəh Ağazadə, Rəşad Nəsirov, Mütalib Qədirov, aktiv üzvlər Cahan Bayramova, Kənan Abdullayev, Şəms Təhməzli, Fəxriyyə Hüseynova və Krakovda yaşayan azərbaycanlı ailələr Ukraynadan gələn soydaşlarımızı hətta öz evlərində qonaq etmiş və təxliyyə prosesi baş tutana qədər bütün maddi ehtiyyaclarını təmin ediblər. Krakovda fəaliyyət göstərən azərbaycanlı sahibkar Rufan Səfərov öz restoranında soydaşlarımız üçün təmənnasız şəkildə qidalanma imkanları yaradıb. Kordinasiya və yerləşdirmə prosesində Krakovun azərbaycanlı icmasından Saleh Sabili, Yasin Həsənov, Əli Zeynallı və digər könüllü fəaliyyət göstərən gənclər yüksək səviyyədə iştirak edib. Qurumun sözçüsünün dediyinə görə, onlar Assossiyasiya olaraq dəfələrlə sərhəddə gedib azərbaycanlı ailələri Krakov şəhərinə gətiriblər. Təxliyyə ilə bağlı Azərbaycan Respublikasının Polşa Respublikasında yerləşən səfirliyi ilə daimi əlaqə saxlayır və bunun üçün siyahılar hazırladıqlarını da bildirdilər.
Diasporumuzun fədakar gəncləri…
Ukrayna sərhəddindən Polşa Respublikasına keçən soydaşlarımızın təxliyə işinə könüllü gənclərimiz də dəstək göstərirlər. Bir neçə qruplarda birləşən gənclərimiz gecələrini gündüzlərinə qataraq Ukraynadan Polşaya təxliyə olunan soydaşlarımıza əllərindən gələn köməklikləri edirlər. Məlumat üçün bildirək ki, Polşanın Krakov şəhərində, Malopolski və Silesia regionlarında Azərbaycan icma rəhbərləri Hüseyn Salehov və Saleh Sabili, həmçinin Yasin Həsənov, Əli Zeynallı könüllü koordinasiya yaradaraq, Ukraynadan Polşaya keçən soydaşlarımıza heç bir maddiyyat tələbi olmadan, Polşa dövlətinin qanunları ilə yerləşdirilmə və qarşılama xidmətləri həyata keçiriblər. Krakovda Azərbaycan icma rəhbəri Hüseyn Salehov bu gənclər adından bildirib ki, könüllülük qruplarına daha sonra bir çox soydaşımız, xüsusən də tələbələr qoşularaq günün müəyyən saatlarında onlara qonaqlama və insanlara bələdçilik etməkdə yardım ediblər: “Qeyd etmək istərdim ki, Polşa Respublikasında yeganə azərbaycanlı könüllü koordinasiya qrupunun təşkili və idarəsi bizə məxsusdur. Heç bir dövlət qurumuna müraciət etmədən könüllü fəaliyyət göstərərək, Azərbaycan Respublikasına olan vətəndaş borcumuzu yerinə yetirmişik. Bu günə qədər 250-dən çox soydaşımız bizim tərəfimizdən qarşılanmış və Krakov şəhərində Polşa dövlətinin yardım qeydiyyat məntəqələri vasitəsilə üç və dörd ulduzlu otellərə, villalara yerləşdirilib.
Təbiidir ki, bütün bu addımlar təqdirəlayiqdir. Kökündə Azərbaycan dövlətinin yürütdüyü düzgün diaspor siyasəti dayanır.
Məhəmmədəli QƏRİBLİ Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
