“Rusiya Ukraynanın şərq sərhədləri boyunca əraziləri öz nəzarətinə götürmək və Krımdan başlayaraq Kiyevə qədər ələ keçirilmiş ərazilərdə möhkəmlənməyə çalışır”.
Bunu Bakupost.az -a “Bakı-Xəbər” qəzetinin baş redaktoru Aydın Quliyev Rusiya-Ukrayna müharibəsi ilə bağlı son vəziyyəti şərh edərkən deyib.
O bildirib ki, Rusiya-Ukrayna cəbhəsindəki vəziyyət Gürcüstandakı müharibə ilə oxşarlıq təşkil edir:
“2008-ci ildə Rusiya Tiflisə qədər getsə də, sonra geri çəkilməyə və cənubi Osetiyanın bütün sərhədi boyu möhkəmlənməyə başladı. İndi də cənubi Osetiyanın bütöv şəkildə Rusiyaya birləşdirilməsi kursu götürülüb. Eynilə bu gün Rusiyanı Kiyevə qədər gedən, onun ətrafında dayanmağa məcbur olan və geri çəkilməyə meyilli bir vəziyyətdə görürük. Təbii ki, Ukraynanın müqaviməti əvvəlki kimi davam edir. Amma hiss olunur ki, Rusiya Ukraynanın şərq sərhədləri boyunca əraziləri nəzarətinə götürmək və Krımdan başlayaraq Kiyevə qədər ələ keçirilmiş ərazilərdə möhkəmlənməyə çalışır”.
A.Quliyev düşünür ki, Rusiyanın Kiyevin ətrafından geri çəkilməsinin özü arqumentlərə və məntiqə cavab verməlidir:
“Çünki arqumentsiz və məntiqsiz geri çəkilmək siyasətdə uğurlu gediş sayılmır. 2008-ci ildə Gürcüstanda Tiflisə qədər rus qoşunlarının irəlilədiyi bir vəziyyətdə Fransanın vasitəçiliyi ilə əməliyyatlar dayandırlıdı və rus qoşunları geri çəkildilər. Amma bu gün Ukraynada Qərb dövlətlərinin hər hansı birinin prosesə aktiv şəkildə müdaxiləsi, Rusiyanın dayandırılması və onun Kiyevdən geri çəkilməsi istiqamətində ciddi səylərini görmürük. Əksinə, Qərb dövlətləri Rusiyanın Kiyevdən geri çəkilməsində o qədər də maraqlı deyil. Çalışırlar ki, Rusiya Kiyevin ətrafında, hətta Kiyevin özündə mümkün qədər çox qalsın”.
Baş redaktor Rusiya-Ukrayna msəsələsində Türkiyənin vasitəçiliyinə də diqqət çəkib:
“Türkiyə iki dövlətin arasında barışıq sənədinin imzalanmasına nail olmaq və hansısa bir formada razılığın əldə olunması üçün vasitəçilik səylərini inamla davam etdirir. Lakin hər şey Türkiyənin əlində deyil və apardığı vasitəçilik missiyasının kollektiv Qərb qurumları tərəfindən lazımınca dəstəkləndiyinin özü şübhəlidir. Görüntü belədir ki, Türkiyənin vasitəçilik missiyasının nəticə verməsindən Qərb o qədər də məmnun deyil. Ona görə də bu misiyyasnın baş tutacağı o qədər də ümidli görsənmir”.
A.Quliyev Rusiya və Ukrayna dövlət başçılarının görüşünün baş tutması ehtimalından da danışıb: “Rusiya və Ukraynanın dövlət başçılarının görüşdürülməsi ideyası zahirən çox cəlbedici görünsə də, baş tutması hələlik real deyil. İstər Rusiya, istərsə də Ukrayna rəhbərliyinin üz-üzə görüşmək barədə bəyənatları daha çox deklarasiyaya bənzəyir, nəinki ciddi bir niyyətə. Sanki hər iki tərəf dünyaya nümayiş etdirmək istəyir ki, sülhün tərəfdarıyıq. Amma əslində hər iki tərəfin ayrılıqda planları var. Onlar yaxşı başa düşürlər ki, bu vəziyyətdə liderlərin görüşməsi real nəticə ortaya qoya bilməz. Bunu Zelenski və Putin arasında az qala şəxsi düşmənçilik səviyyəsinə çatmış münasibətlərə rəğmən də demək olar. Əgər belə vəziyyətdə görüş baş tutsa belə, bu, qarşılıqlı ağır ittihamlar və hücumlarla müşahidə olunacaq. Nəzərə alasaq ki, Putin və Zelenskidən əvvəl onların səlahiyyətli məmurlarının danışığı heç bir real nəticəyə gətirib çıxarmayıb. Ancaq təcrübə göstərir ki, dövlət başçıları səviyyəsində görüşlər adətən o zaman nəticə verir ki, aşağıda olan məmurlar hansısa bir nəticəyə gəlmiş olsunlar”.
Fəridə Baku Post
