Fransa hakimiyyəti, hər zaman olduğu kimi, aşırı ermənipərəst siyasətindən əl çəkmək istəmir. Hər fürsətdə bunu göstərməyə çalışır. Düzdür, Fransa-Ermənistan yaxınlığı əslində yeni bir şey deyil. Ancaq məsələ ondadır ki, əksər hallarda yaranan reallıqları nəzərə almadan bunu edir.
Əsasən də Fransanın Ermənistandakı fövqəladə və səlahiyyətli səfiri Ann Luyo. Hərçənd, əvvəlki səfir də bu sahədə yenisindən geri qalmırdı. Məsələ ondadır ki, Fransanın Ermənistandakı səfiri yenə səlahiyyətlərindən kənara çıxaraq aşırı ermənipərəstlik edir. Səfir Ermənistanda keçirdiyi bir sıra görüşlərdə bəyan etdi ki, “Artsax” ətrafında vəziyyət narahatedicidir. Minsk Qrupu çərçivəsində səylər artırılmalıdır. Budəfəki görüşlərdə də yenə Fərrux kəndi ətrafında yaranan vəziyyət əsas müzakirə mövzusu olub. Ermənistan tərəfi görüşlərdə Fransa səfirini hər vasitə ilə inandırmağa çalışır ki, guya Azərbaycanın məqsədi bir nəfər də olsun erməninin Qarabağda qalmamasıdır. Guya biz bütün mülki ermənilərin Qarabağdan çıxarılmasına çalışırıq. Hansı ki, bu tamamilə yalandır. Azərbaycanın məqsədi mülki erməniləri yox, qanunsuz silahlı erməni birləşmələrini Qarabağdan çıxarmaqdır. Zatən bununla bağlı məqamlar 10 noyabr razılaşmasının 4-cü bəndində öz əksini tapıb. Ancaq nədənsə, Fransa səfiri Ann Luyo bu məqamı Ermənistan tərəfinin diqqətinə çatdırmaq istəmir.
“Qarabağda vəziyyətin gərginləşməsinin səbəbkarı Azərbaycan yox, oradakı erməni separatçılarının qanunsuz fəaliyyətidir”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə hesab edir ki, Fransa hər vasitə ilə Ermənistanı məğlub durumundan çıxarmağa çalışır: “Fransa səfirinin məlum həyasızlığı da buna hesablanıb. Çünki Vətən müharibəsi zamanı Ermənistanın necə sarsıdıcı zərbə almasının fərqindədilər. Bu həmin Fransadır ki, BMT-nin Qarabağla bağlı məlum 4 qətnaməsinə, həmsədr ölkənin yaratdığı məsuliyyətə tüpürərək müharibə dövründə açıq şəkildə Ermənistanın yanında durdu. Müharibəyə qədər bir dəfə də olsun rəsmi Paris törədilən dağıntılara, vandalizm aktlarına görə İrəvandan hesabat tələb etmədi. Bəşəri dəyərlərin qoruyucusu qismində çıxış edən Fransanın yadına bunlar düşmədi. Yaxşı olardı ki, səfir Ann Luyo bunlardan danışsın. Qarabağda vəziyyətin gərginləşməsinin səbəbkarı Azərbaycan yox, oradakı erməni separatçılarının qanunsuz fəaliyyətidir. Minsk Qrupunun yenidən fəaliyyətə başlamasına gəldikdə isə, bu mümkün deyil. Ən azından ona görə ki, buna ehtiyac yoxdu. 30 il ərzində Minsk Qrupunun etmədiyini 44 gün ərzində Azərbaycan Ordusu edib. Digər tərəfdən, Ukrayna məsələsinə görə Rusiyanın münasibətləri nəinki ABŞ-la, Fransa ilə də gərginləşib. Belə vəziyyətdə Minsk Qrupu formatının mümkünsüz olduğunu diplomatik fəaliyyətlə məşğul olan səfir də yaxşı bilir”.
O baxımdan politoloq hesab edir ki, gərəksiz təşəbbüslərlə çıxış etməyin bir anlamı yoxdur.
Vidadi ORDAHALLI
