Aprelin 6-da Brüsseldə Avropa İttifaqı Şurasının prezidenti Şarl Mişel, Azərbaycan Prezidenti İlham Əliyev və Ermənistanın baş naziri Nikol Paşinyan arasında görüş gözlənilir.
Ermənistanda çoxları hesab edir ki, Nikol Paşinyan “yeni kapitulyasiya” - “Bakının şərtləri ilə Azərbaycanla sülh müqaviləsi” hazırlayır. Buna görə Ermənistanda müxalifətin kütləvi mitinqləri elan edilib. Ancaq sosial şəbəkələrin erməni seqmentinə baxanda, hələ ki, xüsusi həvəs müşahidə olunmur. Bu o deməkdirmi ki, Ermənistanda revanşist əhval-ruhiyyə səngiyir?
Avropa İttifaqının vasitəçiliyi ilə keçirilən görüş Ermənistanı sülh müqaviləsi imzalamağa sövq edə bilərmi?
Politoloq Elşən Mustafayev “Bakı-Xəbər”ə bildirdi ki, bu, Ermənistan üçün son şanslardan biridir:
“ Brüssel görüşü ərəfəsində ermənilər sırf demoqogikadan istifadə edirlər. Onlar həm ATƏT-in Minsk Qrupunu diriltmək, həm də Qarabağın dağlıq hissəsindəki separatçıların saxlanılması yönündə uğur əldə etmək istəyirlər.
Azərbaycan tərəfi isə ATƏT-in Minsk Qrupunun yenidən dirilməsinə və Qarabağda separatçıların hansısa status almasına qətiyyən yol verməz. Çünki Azərbaycan Prezidenti bununla bağlı sərəncam da imzalayıb. Brüssel görüşü gərgin keçəcək. Ümumi nəticələr əldə edilməsi o qədər də asan olmayacaq. Son üç ayda Azərbaycan və Ermənistan liderləri dördüncü dəfə görüşəcək. Deməli, birinci görüş 2021-ci il dekabrın 14-də Şarl Mişelin təşəbbüsü ilə reallaşıb. İkinci dəfə tərəflər Brüsseldə təkbətək görüşüblər. Növbəti görüş isə bu il fevralın 4-də Fransa prezidenti Emmanuel Makronun təşəbbüsü ilə baş tutub. Görüş Prezident İlham Əliyev, Fransanın Avropa İttifaqına sədrliyi qismində Emmanuel Makron, Şarl Mişel və Nikol Paşinyanın iştirakı ilə videoformatda keçirilib. Görüşlərdə rəsmi Bakı iki ölkə arasında sərhədlərin delimitasiya və demarkasiyası, sülh sazişinin imzalanması, işğaldan azad edilmiş ərazilərin minalardan təmizlənməsi kimi məsələləri iştirakçıların diqqətinə çatdırıb. Azərbaycan 10 noyabr bəyanatının müddəalarının həyata keçməsinin vacibliyini də vurğulayıb.
Bu günlərdə Nikol Paşinyan da Ermənistanla Azərbaycan arasında sülh danışıqlarının dərhal başlamasını, sərhədlərin delimitasiya və demarkasiyası istiqamətində işlərin sürətləndirilməsinin vacibliyini söyləyib. Qeyd edək ki, Prezident İlham Əliyevlə Nikol Paşinyan arasında keçirilmiş əvvəlki görüşləri ABŞ və Rusiya da alqışlamışdı.
Avropa İttifaqının Azərbaycanla Ermənistan arasındakı problemlərin həllinə marağının Rusiyanın Ukraynada keçirdiyi hərbi əməliyyatlarla da bu və başqa şəkildə əlaqəsi var. Çünki Azərbaycan, Ermənistan, Ukrayna da Gürcüstan, Moldova və Belarusla yanaşı, Avropa İttifaqının “Şərq Tərəfdaşlığı” Proqramının üzvləridir. Avropa İttifaqı Cənubi Qafqazda sabitliyin Azərbaycan-Ermənistan münasibətlərinin tənzimlənməsindən başladığının vacib olduğunu dərk etdiyindən problemin həllinə diqqəti artırır. İttifaq bu fəallığı ilə rəsmi Bakı və İrəvan arasında etimad mühitinin yaranmasına səy göstərir. Çünki regionda maraqlı olan başqa qüvvələr iki ölkə arasında yaxınlaşmaya, Qarabağdakı erməni icmasının Azərbaycan cəmiyyətinə inteqrasiyasına mane olurlar. Bu baxımdan, rəsmi Bakı və İrəvanın İttifaqa xoş münasibəti nəzərə alınarsa, avropalılar tərəfsizlik nümayiş etdirərək bu istiqamətdə uğura nail ola bilərlər. Paşinyan bu şansı dəyərləndirməyə çalışacaq”.
Məhəmmədəli QƏRİBLİ
