Terror ölkəsi olan Ermənistan separatizmə dəstək verməkdən əl çəkmək istəmir. Bütün separatçı qurumlar öz qondarma tədbirlərini məhz Ermənistanda keçirir və öz aləmlərində Ermənistanı özlərinə “arxa-dayaq” bilirlər. Bir neçə gün əvvəl Ermənistan mediasında bu ölkədə aprelin 4-də “Krım günləri” keçiriləcəyi barədə məlumat yayılmışdı. Bu barədə jurnalistlərə Krımın “baş nazirinin” müavini Georgi Muradov bildirmişdi.
Muradov, hətta daha da irəli gedərək, “gündəlikdə duran” məsələləri də açıqlamışdı: “Gündəliyimizdəki ən aktual məsələlərdən biri “Donetsk və Luqansk Xalq Respublikaları” ilə əlaqələrin qurulmasıdır. Tezliklə bizim Abxaziya ilə “hökumətlərarası komissiyamız və ya bizim adlandırdığımız müştərək komissiyamız olacaq”.
TASS-ın yaydığı məlumata görə, Ermənistanda “Krım günləri” aprelin 4-dən start götürüb.
TASS xəbər verir ki, bu barədə Krımın “baş nazirinin” müavini Georgi Muradov bildirib.
“Bu gündən (4 aprel) etibarən Ermənistanda Krım günləri başlayır. Burada bizi gözləyirlər, ictimaiyyət Krımda baş verən hər şeylə maraqlanır. Krım və erməni biznes nümayəndələrinin görüşləri, ictimaiyyətlə görüşlər, çıxışlar, konfranslar, yaradıcı kollektivlərimizin çıxışları keçiriləcək. Bunlar tammiqyaslı tədbirlərdir” - Muradov bildirib.
Qeyd edək ki, Ermənistanda “Krım günləri”nin təşkilatçısı “Konstitusiya hüququ ittifaqı” partiyasının sədri, “Krımın dostları” klubunun rəhbəri Ayk Babuxanyandır.
“Ermənistan adlanan ofisin əsas fəaliyyət istiqaməti separatçılığı, milli zəmində qarşıdurmanı yaymaqdır”
Tarixçi, siyasi analitik, hərbi ekspert, Qafqaz Tarixi Mərkəzinin direktoru Rizvan Hüseynov “Bakı-Xəbər”ə şərhində bildirdi ki, Ermənistanda “Krım günləri”nin keçirilməsi təsadüfi deyil, Ermənistan bununla açıq şəkildə separatizmi dəstəklədiyini, separatçılardan yana olduğunu göstərir. R.Hüseynovun sözlərinə görə, Ermənistan indiki vəziyyətdə məqsədli şəkildə “Krım günləri”ni keçirib. “Dəfələrlə qeyd etmişik ki, əslində Ermənistan müstəqil dövlət deyil, bəzi xarici ölkələrin marağına xidmət edən ofisdir. İstər Rusiya, istər bəzi Qərb ölkələri, istərsə də xaricdəki erməni diasporu üçün bir ofis, bir alət rolunu oynayır. Ermənistan adlanan ofisin əsas fəaliyyət istiqaməti separatçılığı, milli zəmində qarşıdurmanı yaymaqdı və Qarabağ münaqişəsi bunun bariz nümunəsidir. Bu ölkənin fitnə-fəsad törətməkdən başqa bir peşəsi yoxdur. Bu "dövlət" elə bunun üçün də yaradılıb - regionda fitnə-fəsad, münaqişə yaratmaq, stabilliyi pozmaq. Bu barədə bütün sifarişlər xaricdən gəlir, erməni diasporundan gəlir, Ermənistan da bunun əvəzində həm pul, həm də bəzi məsələlərdə siyasi dəstək alır. Ona görə də, əsas missiyası pul və siyasi dəstək müqabilində separatizmə dəstək vermək, milli münaqişə yaratmaq olan Ermənistanda qondarma “Krım günləri”nin keçirilməsi heç də təəccüblü deyil”.
R.Hüseynov hesab edir ki, Ermənistanın əsas işi başqa qüvvələrin sifarişlərini yerinə yetirmək olduğu üçün separatçılara da qucaq açır. R.Hüseynovun sözlərinə görə, istər qondarma Krım, istər Luqansk, Donetsk "respublikalarının", istər Abxaziyanın, bir sözlə qondarma respublikaların tədbirlərinin Ermənistanda keçirilməsi heç təəccüb doğurmur. “Ən maraqlısı odur ki, bu tanınmamış "respublikaların" bir qismi guya ki, Rusiya ilə birləşib. Məsələn, Krım. Burada sual doğur. Guya ki, bu Krım "respublikasıdır", amma Rusiya Federasiyası qanunvericiliyinə görə, respublika adlanan yerli inzibati ərazi mütləq milli tərkibdə yaranır. Yəni hansısa milli azlığın, millətin, xalqın Rusiyanın tərkibində öz müqəddəratını həll edərək respublika yaratmaq hüququ var. Burada bir sual ortaya çıxır ki, Krımda hansı millət öz müqəddaratını təyin edib? Rusdursa rusun öz ölkəsi-Rusiya Federasiyası var. Krım hansı xalqın respublikasıdır? Bu elə Rusiya qanunvericiliyin kobud şəkildə pozulması deməkdir. Biz bu barədə çox misallar çəkə bilərik. İstər Donetsk, istərsə də Luqansk haqda da misallar çəkmək olar. Burdan da sual doğur ki, bir xalq necə dəfə respublika qura bilər, neçə dəfə rus xalqı öz müqəddəratını təyin edə bilər? Bilirik ki, bu yolu Ermənistan gedirdi, Qarabağda guya "respublika" və "Qarabağ xalqı" var idi. Əslində, bunlar ermənilərdir və onlar öz “müqəddəratını” həll edirdi. Azərbaycan daim dünya ictimaiyyətinin yadına salırdı, bu necə ola bilir ki, Ermənistan istədiyi yerdə dəfələrlə "müqəddəratını həll" edə bilər? Ermənistan Respublikası var, erməni xalqı öz müqəddəratını həll edib, respublika yaradıb. Görürsüzmü, bir sıra beynəlxalq qanunları, təməl prinsipləri pozan Ermənistan bu məsələdə həm daim xarici maraqları təmsil edir, həm də hansı bölgədə milli zəmində münaqişə yaratmaq lazım olanda mütləq Ermənistanın təcrübəsindən istifadə olunur. Mən bunu təkcə Qarabağ münaqişəsinə şamil etmirəm, dünyanın başqa regionlarında da, elə həmin Krımda da mütləq "erməni təcrübəsindən" istifadə olunur. Yəqin ki, Azərbaycan bu məsələni nəzarətə götürməlidir. İstər beynəlxalq səviyyədə, istər diplomatik, istərsə də başqa müstəvidə rəsmi İrəvana mesajlar verməlidir”.
Ekspert hesab edir ki, dünya birliyi də Ermənistanın separatizmə açıq meydan verdiyini görməli və buna reaksiya verməlidir. Onun sözlərinə görə, tanınmamış qondarma qurumların Ermənistanda bu şəkildə təbliğ olunması, “müstəqil qurum” kimi təqdim edilməsi yolverilməzdir, bunu dünya görməlidir.
İradə SARIYEVA
