"Türkiyənin "Bayraktar" PUA-larını Ukraynaya verməsi Rusiya cəmiyyətində ağrılı şəkildə qarşılanır". Bunu Rusiyanın Türkiyədəki səfiri Aleksey Yerxov deyib.
“Tam düzünü desəm: Rusiya cəmiyyətində bu tədarükün nə qədər ağrılı qəbul edildiyini təsəvvür belə edə bilməzsiniz. “Biznes biznesdir” kimi izahlar başa düşülmür, çünki dronlarınız əsgərlərimizi öldürür, bunun üçün alınır.
Xatırladım ki, Türkiyənin müttəfiqi olduğunu iddia edən bir ölkənin mehmetciklərlə döyüşən tərəfə külli miqdarda silah ötürmək vərdişi var və bu, Ankaranın xoşuna gəlmir. Belə olan halda, biz bunu niyə bəyənməliyik?
Yeri gəlmişkən dərhal deyim ki, Türkiyə ordusunun döyüşdüyü bu insanlara silah vermirik və Türkiyə bunu yaxşı bilir. Moskvada onların ofisi belə yoxdur”, – deyə diplomat vurğulayıb.
Rusiyanın Türkiyəyə bu iradı bildirməyə haqqı çatırmı?
“Tərxis Olunmuş Hərbçilərin Gəncləri Maarifləndirmə” İctimai Birliyinin sədri, hərbi ekspert Emin Həsənli “Bakı-Xəbər”ə bildirdi ki, Rusiyanın kimisə bu mövzuda qınamağa haqqı çatmır: “Dünyada bir neçə ölkə var ki, onlar ümumiyyətlə başqalarına silah satmağa görə irad bildirə bilməz. ABŞ və Rusiya bütün dünyaya silah satır. Məhz onların satdığı silahlarla dünyada müharibələr aparılır. Dünyada ən çox satılan silahlardan biri “Kalaşnikov” avtomatıdır. Uzun müddət Türkiyəyə qarşı terror təşkilatlarının istifadə etdiyi bu silahlar əvvəl SSRİ, sonra Rusiya istehsalı olub. Bu dövlətlər bir çox hallarda silah satışını gizli həyata keçiriblər. Yəni üçüncü ölkələrin əli ilə. Əvvəl onları üsyankar, inqlabçı adı altında dəstəkləyiblər, özlərinə lazım olmayanda isə həmin təşkilatlara terrorçu adını qoyublar. Ancaq Türkiyə bütün münasibətləri açıq və şəffaf aparır. Rusiya prezidentinin köməkçisi Peskov da dedi ki, Ərdoğan dünyada müstəqil siyasət yürüdən azsaylı siyasi liderlərdəndir. Türkiyə Rusiyadan “S400” raketlərini alır. Özü də Ukraynaya “Bayraktar” verdiyini gizlətmir. Türkiyə onları satanda bilmirdi ki, Ukrayna həmin silahdan Rusiyaya qarşı istifadə edəcək. Dünyada bir çox münaqişə olan yerdə Rusiya və ABŞ silahı var. Bu iradı silah satmayan ölkələr desə, hardasa anlamaq olar. Dünya mövcud olandan müharibə, ordu, silah var. Silah satışı təsir vasitələrindən biridir. Qardaş Türkiyənin hərbi potensialının güclənməsi ona satış da həyata keçirməyə imkan verir. Bu bizi sevindirir. Türkiyənin güclü olması bütün türk dünyasının güclü olması deməkdir”.
Qeyd edək ki, Rusiyanın ən çox silah satdığı ölkələrdən biri də uzun illər işğalçı siyasət yürüdən Ermənistandır.
Məhəmmədəli QƏRİBLİ
