Ukraynanın yüzlərlə dinc sakininin qətlə yetirildiyi Buça şəhərinin fotoları yayılıb. Görüntülərdə şəhərdə kütləvi dağıntılar, xaos əks olunub. Qeyd edilir ki, müharibə zamanı Rusiya hərbi qüvvələrinin Belarusdan Kiyevə qədər irəliləməsinə mane olan sakit Buça şəhəri kütləvi atəşə və yerli əhaliyə qarşı qəddar rəftara məruz qalıb.
Qeyd edək ki, şəhərdə silahlı toqquşmalar bir aydan çox davam edib. Martın sonunda Buça Ukraynanın qəhrəman şəhəri adına layiq görülüb. Şəhər Ukrayna Silahlı Qüvvələrinin nəzarəti altındadır.
Buça Rusiya işğalçılarından təmizləndikdən sonra hərbçilər və hüquq-mühafizə orqanlarının əməkdaşları Ukrayna xalqına qarşı amansız cinayətlər - kütləvi edamlar, işgəncələr və zorlamalar faktlarını qeydə almağa davam edirlər. Şəhərin küçələri yanmış avtomobillərlə yanaşı, insan meyitləri ilə doludur, yerli hakimiyyət orqanlarının məlumatına görə, həlak olanlar arasında 14 yaşlı yeniyetmə də var.
Aprelin 1-də Buça meri Anatoli Fedoruk Ukrayna hərbçilərinin rus işğalçılarını şəhərdən qovduğunu təsdiqləyib. Geri çəkilən ruslar qəsəbə daxilində mülki tikililəri, infrastruktur obyektlərini və bəzi əraziləri minalayıblar. Mer bildirib ki, Ukrayna hərbçiləri burada 280 insanın dəfn olunduğu kütləvi məzarlıq aşkarlayıb, şəhərin dağıdılmış küçələri meyitlərlə doludur, təkcə bir küçədə mülki geyimli azı 20 kişinin cəsədi tapılıb.
“XXI əsrdə özünü mədəni Avropa kimi qələmə verən ölkənin bu cür qətliam etməsi, dinc insanları öldürməsi təəccüb doğurur”
Qeyd etdiyimiz kimi, ruslar Buça qəsəbəsində qətliam törədib. Rusların bu qətliamı nə səbəbdən törətməsi barədə fikir bildirən Azərbaycan Milli Elmlər Akademiyası (AMEA) Fəlsəfə və Sosiologiya İnstitutunun aparıcı elmi işçisi, tarix üzrə fəlsəfə doktoru, siyasi şərhçi Faiq Ələkbərli “Bakı-Xəbər”ə şərhində bildirdi ki, Ukraynanın Buça qəsəbəsində baş verən qətliam olduqca dəhşətlidir: “XXI əsrdə özünü mədəni Avropa kimi qələmə verən ölkənin bu cür qətliam etməsi, dinc insanları öldürməsi təəccüb doğurur. Qoca, yaşlı, uşaq demədən insanların amansızcasına qətlə yetirilməsi soyqırım anlamına gəlir. Avropanın ortasında bu cür hadisə baş verib. Ümid edirəm ki, Avropa bu qətliamdan bir nəticə çıxarar. Çünki onlar hər zaman ikili standart yürüdüb. Xüsusən də Xocalı soyqırımı və digər məsələlərdə bağlı normal münasibət görməmişik. Ukraynada yaşanan bu hadisə ikili yanaşmalara son qoyar”.
Həmsöhbətimiz onu da əlavə etdi ki, Ukraynanın Buça qəsəbəsində baş verənlər üzücüdür. Rusiya tərəfi iddia edir ki, onlar qoşunlarını geri çəkdikdən sonra bu hadisə baş verib. Ancaq Rusiyanın məlum açıqlaması inandırıcı görünmür. Ukraynanın belə bir provokasiyaya əl atması mümkün deyil.
F.Ələkbərlinin sözlərinə görə, bu cür qətliamlar qəbuledilməzdir: “Ukraynanın Buça qəsəbəsində dinc əhalini qətlə yetirənlər hökmən cəzalandırılmalıdır. Ümid edirəm ki, bu hadisə beynəlxalq məhkəməyə çıxacaq. Beynəlxalq məhkəmədə Buça qətliamı ilə bağlı qərar verilərkən Xocalı soyqırımı, 20 Yanvarla bağlı məsələlər gündəmə gələcək”.
Günel CƏLİLOVA
