Azərbaycan Ordusunun Qarabağda son mövqe dəyişiklikləri Ermənistanda hələ də ciddi narahatlıq mənbəyi olmaqda davam edir. Ermənistan müxalifəti baş verənlərdən istifadə edib yenə burada vəziyyəti qarışdırmağa can atır.
Qeyd edək ki, aprelin 5-də müxalifət yenidən etiraz aksiyalarına start verəcəyini açıqlayıb. Parlamentdəki “Hayastan” fraksiyasının üzvü Vahe Akopyan bu xüsusda bildirib: “Dörd ildir dediyimizin pik həddi çatdı və biz tezliklə Qarabağı, sonra Ermənistanı və dövlətçiliyimizi, himnimizi və gerbimizi itirəcəyik. Biz həyəcan təbili çalmaq istəyirik ki, ictimaiyyətimiz artıq Qarabağı itirmək yolunda olduğumuzu başa düşsün. Bu hökumət bunun üçün aydın addımlar atır. Qarabağsız Ermənistan da olmayacaq”. O, Ermənistanın baş naziri Nikol Paşinyanla Azərbaycan prezidenti İlham Əliyev arasında Brüsseldə gözlənilən görüşü də şərh edib: “Mən əminəm ki, Nikol Paşinyan apardığı siyasətə görə Brüsseldən xalqın arxasında daha bir sənədə imza ataraq qayıdacaq. Xatırladaq ki, Brüsseldə baş tutacaq İlham Əliyev-Nikol Paşinyan görüşündən əvvəl Ermənistan müxalifəti aprelin 5-də saat 18:00-da “Azadlıq” meydanında mitinq keçirmək təşəbbüsü ilə çıxış edib. Ermənistanın “Qraparak” nəşri bu xüsusda yazır: “Maraqlıdır ki, əvvəllər İlham Əliyev-Paşinyan görüşünün Moskvada baş tutacağı ilə bağlı xəbərlər yayılırdı. Həftələr öncə Paşinyan apreldə Moskvaya edəcəyi rəsmi səfər barədə bildirmişdi, hətta gün olaraq 9 aprel qeyd olunurdu, lakin görüş təxirə salınıb və məlum olub ki, görüş aprelin 6-da Brüsseldə keçiriləcək. Bizdə olan məlumata görə, bu görüş Rusiya üçün sürpriz olub. Yeri gəlmişkən, Paşinyanın Rusiyaya səfərlərindən əvvəl həmişə Avropa ölkələrindən birinə - Litvaya, Belçikaya, Fransaya səfərləri olub. Daha sonra sərhəd eskalasiyası baş verib, Rusiya sərhədlərimizi qorumaq məsuliyyətindən imtina edərək Paşinyanı “cəzalandırıb”. Müxalifət Brüsseldə mühüm razılaşmaların əldə olunacağından və nəticədə Rusiyanın Ermənistana qarşı “sanksiyaları”nın bu dəfə daha sərt olacağından ehtiyat edir”. Qəzet yazır ki, indi Rusiya sülhməramlı qoşunları da ermənilərə yardım etmək istəmir: “Qarabağdakı gərgin vəziyyətin fonunda hamımızın, həm medianın, həm də vətəndaşların gözündən əslində aşkar olan bir şey yayındı. “Qarabağ informasiya qərargahı” yaydığı bəyanatda diqqətçəkən bir qeyd edib, daha doğrusu, əvvəlki günlərin oxşar bəyanatlarında edilən qeydin bir hissəsini qaçırıb. Söhbət rəqibi öz mövqelərinə qaytarmaq üçün Rusiya sülhməramlı qoşunlarının komandanlığı ilə birgə işdən bəhs edilməməsindən gedir. Beləliklə, Qarabağ informasiya qərargahında operativ-taktiki vəziyyətlə bağlı verilən bəyanatda aşağıdakıları oxuyuruq: “Qarabağ “səlahiyyətliləri” Azərbaycan Silahlı Qüvvələrinin təmas xəttinin şərq istiqamətində öz başlanğıc mövqelərinə qaytarılması üçün bütün səylərini göstərməkdə davam edir”. Və əvvəlki günlərdə eyni qərargah tərəfindən verilən eyni bəyanatda qeyd olunan hissədə oxuyuruq: “Qarabağ “səlahiyyətliləri” Rusiya sülhməramlı qoşunlarının komandanlığı ilə birlikdə Azərbaycan Silahlı Qüvvələrinin öz mövqeyinə qaytarılması və hərbi-siyasi vəziyyətin sabitləşdirilməsi üçün müxtəlif diplomatik vasitələrə əl atmaqda davam edir”. Gördüyünüz kimi, son bəyanatla əvvəlki bəyanatlar arasında ciddi fərq var: son bəyanatda Rusiya sülhməramlılarından bəhs edilmir. Bu xüsusda Qarabağda olan “yüksək dərəcəli rəsmi”dən indiki vəziyyəti təsvir etməyi xahiş etdik. O dedi ki, rəqib aqressivdir və irəli getmək üçün aydın planı var. Nikol Paşinyanın təhlükəli “güzgü variant”nda geri çəkilmə təklifi nəticəsində Azərbaycan ordusu Fərruxda peyda olub və Daşbaşı yüksəkliyinin bir hissəsini ələ keçirib. Gözlədiyimiz kimi, azərbaycanlılar nəyin bahasına olursa-olsun, aqressiv və sərt üsullarla öz proqramlarını irəli çəkməyə çalışırlar. Həmsöhbətimizin rəqibi başlanğıc mövqelərə qaytarmağın mümkün olacağına ümidi çox az idi”.
Ermənistanın sabiq müdafiə naziri, “Hayastan” fraksiyasının rəhbəri Seyran Ohanyan da İrəvanın çətin duruma düşdüyünü etiraf edir: “Ermənistan üçün vəziyyət həqiqətən kifayət qədər ağırdır və hər zaman müharibə təhlükəsi var, lakin mən hesab edirəm ki, Nikol Paşinyanın müharibə təhlükəsi ilə bağlı sözləri “sülh gündəmi”ni irəli aparmaq üçün edilən manipulyasiya ola bilər”. Onun sözlərinə görə, Ermənistanın hazırkı hakimiyyəti mövqeləri gücləndirmək əvəzinə sülh gündəmi, “güzgü versiyası” ilə geri çəkilmə haqqında düşünür. Müxalifət fraksiyasının rəhbəri bildirib ki, onlar Azərbaycanın təklif etdiyi 5 bəndin əleyhinədir, çünki bunlar həyata keçirilərsə, Qarabağın gələcəyi təhlükə altına düşəcək: “Hakimiyyətin hərəkətsizliyi ucbatından Ermənistan sərhədlərində və Qarabağda açıq yerlər var: bütün təhlükəsizlik sistemi səfərbər olunmayıb, müvafiq müdafiə strukturları formalaşmayıb”. Ohanyan vurğulayıb ki, sülhməramlıları günahlandırmaq və ya günahlandırmamaq Ermənistan hakimiyyətinin vəzifəsidir: “Niyə Qarabağ “müdafiə ordusu”nun bölmələri arasında, eləcə də sülhməramlı qüvvələr arasında əməkdaşlıq lazımi səviyyədə deyil? Niyə cəbhə xətti tam öyrənilməyib, bütün boşluqlar bağlanmayıb? Fərrux və Pirlərin dinc sakinlərinə kim cavab verməlidir? Rusiya sülhməramlılarından soruşmalıdırlar? Və hesab edirəm ki, biz vəziyyətə real təşəbbüskar qiymət vermək əvəzinə, yenə ikinci dərəcəli məsələlərlə məşğul oluruq”. Bu səbəbdən o, əhalini mitinqdə fəal iştiraka çağırıb. “Hayastan” fraksiyasının digər deputatı Qeqam Manukyan isə mitinqlə bağlı qeyd edib: “Biz insanlara başa salmağa çalışacağıq ki, əslində, müharibə təhlükəsi məhz bu kompromis siyasətidir. Bu hakimiyyət və Paşinyan insanlarda qorxu toxumu səpərək, müharibədən, düşmənin 5 dəqiqədən az müddətdə hücuma keçə biləcəyindən danışaraq, elə əhval-ruhiyyə yaratmağa çalışır ki, guya başqa çıxış yolu yoxdur. Özünüzü ləyaqətlə təqdim edəndə beynəlxalq aləmdə daha hörmətli və daha məqbul bir mövqeyə sahib olacaqsınız”.
Nahid SALAYEV
