Bir neçə gün əvvəl Azərbaycan Prezidentinin köməkçisi Hikmət Hacıyev Humanitar Mina Fəaliyyəti və Davamlı İnkişaf Məqsədləri üzrə beynəlxalq konfransın açılışında çıxışı zaman bildirib ki, Azərbaycanın işğaldan azad edilmiş əraziləri dünyada ən çox minalarla çirklənmiş ərazilərdən biridir.
O qeyd edib ki, ermənilər tərəfindən həmin ərazilərdə millyonlarla mina basdırılıb:“Onlar ərazilərimizdə ağac yerinə minalar basdırıb. Minalar partlaması nəticəsində həm hərbçilər, həm mülki insanlar həlak olub, yaralanıb. Təəssüflər olsun ki, Ermənistan tərəfindən təqdim edilən mina xəritələrinin yalnız 25 faizi faydalı olub”.
O bildirib ki, Azərbaycan ərazilərin minalardan təmizlənməsi üçün genişmiqyaslı işlər görür.
Maraqlıdır, beynəlxaq təşkilatlar Ermənistanın mina xəritəsi saxtakarlığına niyə göz yumur? Azərbaycan dəfələrlə rəsmi şəkildə bəyan edib ki, bu xəritələrin faydası ya olmur, ya da çox az olur, amma beynəlxalq aləm Ermənistana heç bir təpki göstərmir, səbəb nədir?
“İkili standartlar mina xəritələri məsələsində də özünü göstərməkdədi, beynəlxalq təşkilatlar bir addım da olsun Ermənistanpərəstliklərindən geri çəkilmək istəmirlər”
Tanınmış hərbi ekspert və siyasi şərhçi Tərlan Eyvazov “Bakı-Xəbər”ə şərhində bildirdi ki, birincisi, təkcə mina xəritələri məsələsində deyil, başqa məsələlərdə də Ermənistana “gözün üstə qaşın var” deyilmir: “Ermənistanın hələ Sovet dövründən Azərbaycan ərazilərinə təcavüzünə əvvəl daxil olduğumuz ittifaq dövləti mərkəzi, müstəqillik illərində isə bütün Avropa və dünya ictimaiyyəti tərəfindən laqeyd yanaşıldı. Düzdür, ilk illərdə bəzi beynəlxalq sənədlər qəbul edilsə də, başqa münaqişələrdən fərqli olaraq, bu sənədlərin icra olunması, yerinə yetirilməsi üçün heç bir əməli addım atılmadı. 2020-ci ildə Azərbaycan özü bu sənədlərin əsasında 44 günlük Vətən müharibəsi nəticəsində torpaqlarımızı işğaldan azad edəndən sonra məlum oldu ki, bizim torpaqlarda ermənilər fauna və floranı məhv edib, bir ağac əkməyiblər, amma 30 ildə torpaqlarımıza milyonlarla mina basdırıblar. Təbii ki, Ermənistanın Azərbaycan ərazilərini minalaması və xəritələri bizə verməməsi, verdikləri xəritələrin az yararlı olması birbaşa müharibə cinayətidir. Çox təəssüflər olsun ki, bizə qarşı “hərbi əsirlər” və sair kimi əsassız ittihamlar irəli sürən beynəlxalq təşkilatlar Ermənistana münasibətdə “xəritələri verin” tövsiyəsindən uzağa getmədilər. Halbuki, indiyə qədər bizə verilən mina xəritələri əvəzsiz verilməyib, bu xəritələr erməni terrorçularının müəyyən qisminin qaytarılması əvəzində verilib. Yəni Ermənistan heç vaxt öz üzərinə düşən öhtəliyi yerinə yetirməyib və beynəlxalq təşkilatlar yenə də erməniprəstliklərini davam etdirib bu ölkəyə qarşı heç bir tələb irəli sürmürlər. Beynəlxalq təşkilatların hələ də Ermənistanı himayə etməsi təəssüf doğurur və bu onların ermənipərəst mövqeyindən, ikili yanaşmalar sərgiləməsindən irəli gəlir. Dövlət rəsmisi açıq şəkildə beynəlxalq konfransda bildirir ki, Ermənistanın bizə verdiyi xəritənin 25 faizi faydalı olub. Mütəxəssislər də yaxşı bilirlər ki, bizə verilən xəritələr yarıtmaz sənədlərdir”.
T.Eyvazovun sözlərinə görə, o sənədlərdə təkcə minanın olduğu yeri deyil, minanın xarakteri barədə də məlumat verilməli idi. T.Eyvazov qeyd etdi ki, bu məlumatlar isə yoxdur və nəticə də azad olunmuş ərazilərdə insanların işləməsi, evlərin tikilməsi, yolların çəkilməsi, didərginlərin öz evlərinə qaytarılması üçün çox ciddi çətinliklərlə üzləşirik. “Bütün bunlar da onun göstəricisidir ki, Azərbaycan tərəfi hər hansı bir hərəkət edərkən Avropa, Amerika, Qərb institutları dövlət səviyyəsində ayağa durduqları halda Ermənistanın bu ərköyünlüklərinə göz yumurlar, ona heç bir təzyiq göstərilmir. Yenə də ümid özümüzə qalıb. Biz əlimizdə olan vasitələrlə məcbur etməliyik ki, həmin xəritələri əldə edək. Hətta əldə etməyəndə belə yenə də o öz büdcəmizdən ayırdığımız çox böyük xərclər hesabına biz ərazilərimizi minalardan təmizləyirik. Halbuki, dünyanın özünün elə maliyyə institutları var ki, onlar minaların təmizlənməsi üçün minalı ərazilərə qrantlar ayırırlar. Biz həmin institutların bizə maliyə ayırdığını da görmürük. Çox təəssüf ki, bizə 30 il əvvəl münasibət necə idisə bu gün yenə həmin münsibət davam edir. İkili standartlar mina xəritələri məsələsində də özünü göstərməkdədi, beynəlxalq təşkilatlar bir addım da olsun Ermənistanpərəstliklərindən geri çəkilmək istəmirlər”- deyə T.Eyvazov qeyd etdi.
İradə SARIYEVA
