Qarabağdakı separatçı rejimin “ombudsmanı” Qeqam Stepanyan cümə günü - aprelin 1-də İrəvanda ATƏT-in fəaliyyətdə olan sədri, Polşanın xarici işlər naziri Zbiqnev Rau ilə görüşüb. Bu haqda erməni mediası məlumat yayıb.
Stepanyan ATƏT sədrinə Azərbaycanın guya "koordinasiyalı, məqsədyönlü və ardıcıl şəkildə həyata keçirdiyi etnik təmizləmə siyasəti", "işğal olunmuş ərazilərdə erməni mədəni irsinin dağıdılması", "erməni hərbi əsirlərin və əsir götürülən mülki şəxslərin qanunsuz mühakimə olunması" və s. haqda böhtanlar söyləyib.
Heç bir dünya dövləti tərəfindən tanınmayan qondarma bir qurum nümayəndəsini qəbul edən ATƏT rəhbərinin məqsədi nədir?
Politoloq Yeganə Hacıyeva “Bakı-Xəbər”ə açıqlamasında bildirdi ki, ATƏT-in fəaliyyətdə olan sədri, Polşanın xarici işlər naziri Zbiqnev Rau Azərbaycan XİN rəhbəri Ceyhun Bayramovla birgə mətbuat konfransında dedi ki, ATƏT regionda həssas vəziyyətin fərqindədir , Polşa isə ATƏT sədri olaraq münaqişədən sonrakı dövrdə dayanıqlı sülh və barışığa istiqamətlənmiş bütün səyləri təşviq edir və dəstəkləyir:
“Bu, ATƏT-in fəaliyyətdə olan sədri, Polşanın xarici işlər naziri Rau Zbiqnevin sözdə fikirləridir. Zbiqnevin əməldə fəaliyyəti bunun tam əksini göstərir, çünki o heç kimin tanımadığı, heç vaxt tanınmayacaq separatçı quruluşun özü-özünü ombudsman elan etmiş, hər addımda separatçı, sülh və stabilliyin əleyhinə mesajlar verən şəxslə görüşür. Regiona səfər etməzdən öncə o, əslində ATƏT sədri olaraq qurumun zədələnmiş imicini bərpa etməyi düşünməliydi. ATƏT-in fəaliyyətdə olan sədri Gürcüstanda da separatçı quruluşların özünü ombudsman elan etmiş şəxsləri ilə görüşmüş olsa idi, qəbuledilməz olsa da, bunu hardasa bütün iştirakçılarla görüşüb vəziyyəti dəyərləndirmək səyləri kimi təqdim edə bilərdi. Ancaq digər separatçı quruluşların deyil, yalnız Azərbaycanın separatçı bölgəsinin qondarma və saxta “ombudsmanı” ilə görüş onun özünün təşəbbüslərindən xəbər verir. Burda onu da qeyd etmək lazımdır ki, bütün dünyanın beynəlxalq təşkilatlara güvənin zədələndiyi, onlara etimadın artırılmasının yollarını axtardığı belə bir çətin vaxtlarda təşkilatların rəsmilərinin bu tip addımları onlara olan onsuz da olmayan etimadi tamamilə sındırır.
ATƏT-in fəaliyyətdə olan sədrinin bu addımı Qarabağdakı kriminal xuntanın kriminal ünsürlərinin dünyaya təqdimatı, onların belə görüşlər sonrası səsləndirdiyi absurd mesajlar beynəlxalq ictimaiyyəti aldatmağa yönəlik fəaliyyətdir”.
Məhəmmədəli QƏRİBLİ
