Ukraynadan təxliyə olunanların sırasında Azərbaycan vətəndaşları da az deyil. Bu ölkədən çıxan Azərbaycan vətəndaşlarının xeyli bir hissəsi ölkəmizə gətirilsə də, hələ də yollarda qalan, başqa ölkələrdə təyyarə reysi gözləyənlər var.
Əlbəttə, Prezident İlham Əliyev vətəndaşlarımızın problemsiz təxliyəsi, ölkəyə gətirilməsi üçün müvafiq qurumlara tapşırıq verib. Dövlət xətti ilə bu işlər həyata keçirilir. Amma bəzi vətəndaşlarımız Ukrayandan çıxarılarkən problemlə üzləşdiklərini, səfirliklərimizin onların problemlərinə səssiz qaldıqlarını iddia edirlər. Vətəndaşlarımız konkret adlar çəkməklə səfirlərimizi tənqid edirlər.
Bu arada Azərbaycanın Moldovadakı səfiri Qüdsi Osmanov təxliyələrdən danışıb və vətəndaşlarımıza qarşı sərt ittihamlar irəli sürüb: “Vətəndaşları Rumıniyaya aparırıq. Çox çətindir. Vətəndaşları avtobuslara mindirərkən özlərini çox pis aparırlar. Bir-birini didməyə hazırdırlar. Biz öncədən siyahı hazırlasaq da, avtobusun üstünə çökürlər. Biabırçılıq, utandırıcılıq ondan ibarətdir ki, mən gün ərzində onların problemini həll etməkdən yorulmuşam. Bir çoxları içirlər, sərxoş vəziyyətdə ona-buna sataşırlar. Burada hər millətin nümayəndəsi var. Sığınacaq məntəqələrinin rəhbərləri ancaq mənfi tərəflərimizdən danışırlar. Onlara nə qədər diqqət edirsən, yaxşılıq edirsən, onlardan o qədər pis cavab alırsan. Amma problem deyil. Biz dövlət nümayəndəsi olaraq məcburuq iradəmizlə dözək, səbrli olaq”.
Ekspertlər bildirir ki, səfir indiki şəraitdə camaatın qeydinə qalmaq əvəzinə durub bu cür xoşagəlməz fikir bildirilib.
“Bu adamlar səfir olduqlarını niyə anlamırlar?”
Hazırda proseslərin ortasında olan İSBAM sədri Samir Adıgözəlli Azərbaycanın Moldovadakı səfirinin səsləndirdiyi fikirləri sərt qarşıladı. “Əvvəla, bir ölkənin səfirinin öz ölkəsinin vətəndaşı barədə bu cür danışması qətiyyən düzgün deyil. Hətta bu cür olsa da belə, onun bu formada deyilməsi yolverilməzdir, doğru sayılmır. Özü də ki, indiki şəraitdə, insanların bu vəziyyətində belə fikirlərin qeyd edilməsi çox yersizdir. İnanmıram ki, bizim vətəndaşlarımız özünü pis aparsın. Ola bilsin, bir-iki nəfər özünü pis aparıb. Amma bunu hamıya şamil etmək və bir-iki adamın hərəkətini şişirtmək düzgün deyil. Hazırda olduğum nöqtədə 200-ə yaxın azərbaycanlı var. Mən 4-5 gündür ki, Polşada vətəndaşlarımızla bir yerdəyəm, hələ bir nəfərin özünü qeyri-etik aparmasını, kiminsə özünü kobud aparmasını görməmişəm. Burada istənilən yaş qrupunda vətəndaşımız var, amma hamısı özlərini olduqca yaxşı aparır. Hansısa vətəndaşımızın Polşada hansısa bir nalayiq hərəkətə yol verdiyini görmədim, hamısı özünü sakit, mədəni, təmkinli aparır. Necə olur ki, özünü Polşada mədəni, səbrli, təmkinli, səviyyəli aparan Azərbaycan vətəndaşları Moldova istiqamətində özlərini belə aparırlar? Bizim bu səfiri tərifləyirdilər ki, camaata canyananlıq edir, öz fəaliyyətini doğru-dürüst qurur, insanlarımıza yardım göstərir. Deyirdilər ki, bu səfir çox qayğıkeşdir, indi bəs nə oldu ki, səfir vətəndaşlarımız haqda belə danışır? Bu adamlar səfir olduqlarını niyə anlamırlar? Niyə anlamırlar ki, mən ölkənin simasıyam, nəyi danışmalıyam, nəyi danışmalı deyiləm, mənim vəzifəm nədən ibarətdir. Bunlar niyə bunu başa düşmür?”
İradə SARIYEVA
