BMT İnsan Haqları Şurasında Rusiyanın Ukraynaya hücumunu araşdırmaq üçün xüsusi komissiya yaradılıb. Sübutlar sənədləşdiriləcək və beynəlxalq məhkəmələrdə istifadə olunacaq, Rusiya hərbi cinayətkarları məsuliyyətə cəlb olunacaqlar.
Bu barədə Ukrayna prezidenti Volodimir Zelenski tviter səhifəsində yazıb: “Mən Beynəlxalq Təhqiqat Komissiyasının yaradılmasını alqışlayıram. Sübutlar sənədləşdiriləcək və beynəlxalq məhkəmələrdə istifadə olunacaq. Rusiya hərbi cinayətkarları məsuliyyətə cəlb olunacaqlar”.
Bəs BMT ötən 30 ildə Ermənistanın Azərbaycana hücumu ilə bağlı niyə bir komissiya yaratmadı? Azərbaycana, vətəndaşlarımıza, soydaşlarımıza qarşı hərbi cinayətlər edən, soyqırımlar törədən canilər hələ də azadlıqdadır. Biz hələ də onların cəzalanacaqları günü gözləyirik.
“Çox yaxşı olar ki, yaradılan həmin komissiya Ermənistanın Azərbaycana qarşı həyata keçirdiyi işğal faktını da araşdırsın”
Qarabağ Azadlıq Təşkilatının (QAT) sədri Akif Nağı “Bakı-Xəbər”ə bildirdi ki, Ukrayna da işğala məruz qalıb, bu da həm regional, həm də beynəlxalq təşkilatları, dövlətləri ciddi şəkildə narahat edir, bu səbəbdən də işğal faktına görə hər kəs səsini qaldırmalı, müəyyən tədbirlər həyata keçirməli idi. “Amma ikili yanaşma, ikili standart yenə də ortadadır, bu da bizi çox narahat edir. Dünya başa düşməlidir ki, ikili standartlarla bu ya digər hadisələrə yanaşanda onun başqa yerlərdə də davamı olur. Ona görə BMT də, başqa beynəlxalq təşkilatlar da istənilən situasiyada obyektiv mövqe tutmalı idilər. Amma indi gözümüzün qarşısındadır, müşahidə edirik ki, müsəlman ölkələrinə qarşı ayrı bir münasibət var. Sanki müsəlman ölkələrinin başına gələn faciələri görmək istəmirlər. Çox təəssüf ki, belədir. İstənilən halda, BMT Rusiyanın Ukraynaya müdaxiləsi ilə bağlı hansısa komissiya yaradıbsa, bunu da müsbət dəyərləndirməliyik. Çalışmalıyıq ki, o komissiya obyektv işləsin, qərəzli bir mövqe tutulmasın. Obyektiv araşdırmalar aparılsın, düzgün nəticələr ortaya qoyulsun. Təkcə Rusiya-Ukrayna münasibətləri ilə bağlı yox, ümimiyyətlə dünyada baş verən işğal faktları ilə bağlı ümumi bir mövqe ortaya qoyulsun. Çox yaxşı olar ki, yaradılan həmin komissiya Ermənistanın Azərbaycana qarşı həyata keçirdiyi işğal faktını da araşdırsın və Rusiyanın Ukraynaya müdaxiləsi ilə müqayisə etsin. Hər iki hadisəni, faktı müayisəli şəkildə təhlil edə bilərdir. Bizim istəyimiz bundan ibarətdir. Digər tərəfdən, əgər BMT İnsan Haqları Şurasında bu məsələ gündəmə gəlibsə biz bundan yararlanmağa çalışmalıyıq”.
A.Nağının sözlərinə görə, Azərbaycan dəfələrlə rəsmi və qeyri-rəsmi qaydada Ermənistanın Azərbaycana qarşı törətdiyi cinayətlərlə, Xocalı soyqırımı ilə bağlı məsələ qaldırıb, amma beynəlxalq qurumlardan istədiyimiz reaksiyanı görməmişik. “Bu situasiyada Azərbaycan rəsmi qaydada yenidən Ermənistanın işğalçılığı ilə bağlı məsələni gündəmə gətirməlidir. Bu gün bütün dünyanın gözü qarşısında Rusiya Ukraynaya təcavüz edib, hamının diqqəti bu məsələnin üstündədir, eyni zamanda hamının diqqəti işğal faktına yönəlib. Ona görə biz də Azərbaycanın başına gətirilən faciələrlə bağlı məsələləri gündəmə gətirməliyik. Konkret şəkildə sənəd hazırlanmalıdır, BMT müstəvisində müzakirəyə çıxarılmalıdır. Son günlərdə Azərbaycan Ermənistanın Azərbaycana qarşı törətdiyi cinayətlərlə bağlı BMT müstəvisində müəyyən sənədlər ortaya çıxarıb və BMT-nin sənədi kimi paylanmasına nail olur. Çox müsbət bir tendensiyadır. Bu işə daha ciddi yanaşılmalıdır. Konkret şəkildə Azərbaycan BMT Təhlükəsizlik Şurasına, yaxud İnsan Haqları Şurasına sənədlərlə müraciət etməli, bu sənədlərin baxılmasına nail olmalıdır. Görək biz bu sənədi hazırlayıb orataya qoyandan sonra BMT bizə yenə də susqunluqla yanaşacaq, yoxsa yox. Əgər BMT Rusiyanın işğalçılıq hərəkətləri ilə bağlı məsələyə baxırsa, bizim də müraciətimizə diqqət yetirməyə ən azından məcburdur... Biz indiyə qədər onlardan obyektv mövqe görməmişik. Amma indi özləri öz başlarına gələn hadisələrlə bağlı məsələləri müzakirəyə çıxara bilirlərsə, biz də öz məsələmizi gündəmə gətirməyi bacarmalıyıq. Kifayət qədər də faktlarımız, əsaslarımız var...” - deyə A.Nağı qeyd etdi.
İradə SARIYEVA
