Yeni hücumların və itkilərin qaçılmaz olduğunu bilən NATO şüurlu şəkildə Ukraynanın hava məkanını bağlamamağa qərar verdi. Bu gündən etibarən ölənlərin hamısının səbəbkarı siz olacaqsınız.
Bunu Ukrayna prezidenti Volodimir Zelenski NATO-nun qərarını şərh edərkən deyib.
“Bu gün alyansın edə biləcəyi yeganə şey Ukraynanı 50 ton dizel yanacağı ilə təmin etməkdir! Yəqin Budapeşt Memorandumunu yandırmaq üçün ki, daha yaxşı yansın”, - Zelenski qeyd edib.
Ukrayna prezidenti NATO-nun hər kəsi, o cümlədən alyansın üzvü olan dövlətləri müdafiə edə biləcəyinə şübhə etdiyini bildirib:
“Bilmirəm, siz kimi qoruya bilərsiniz? Və müttəfiq ölkələrinizi qoruya bilirsinizmi? Ortaq Avropamız, ümumi azadlığımız, ümumi gələcəyimiz üçün tökülən qanımızın hər litrinin əvəzini litrlərlə yanacaqla ödəyə bilməyəcəksiniz”.
Zelenskinin bu ittihamlarını nə dərəcə əsaslı saymaq olar?
Təhlükəsizlik məsələləri üzrə ekspert Elşən Həsənov “Bakı-Xəbər”ə açıqlamasında bildirdi ki, Ukraynanın başına gələnlər NATO amilinə görədir: “Putin açıq deyir ki, Ukraynaya hücuma səbəbkar NATO-dur. Çünki NATO-nun Şərqə doğru genişlənməsi onları narahat edir. Faktiki olaraq, NATO ilə yaxın əməkdaşlıq Ukraynanı müharibəyə sürüklədi. Onlar isə Ukraynanı sanki meydanda tək buraxmış kimi görünürlər. Əsgəri yardım etmirlər, yalnız Rusiyaya sanksiya verməklə işlərini bitmiş sayırlar. Zelenski dəfələrlə bu narazılığını açıq ifadə edib. Bir neçə gün əvvəl NATO-nun Baş katibi Yens Stoltenberqlə Ukrayna prezidenti Zelenski arasında telefon danışığı olub. Alyansın rəhbəri deyib ki, Ukrayna xalqının cəsarətini təqdir edir: “NATO müttəfiqləri tank əleyhinə silahlar, həmçinin humanitar və maliyyə yardımı ilə dəstəyi artırır”. Göründüyü kimi, tənqidlərdən nəticə çıxarıblar. Silah yardımı etmək qərarına gəliblər. Ukraynalı aktivist Daria Kaleniuk Varşavada Britaniyanın baş naziri Boris Consonun qarşısında çıxışı zamanı Böyük Britaniyanın Ukraynaya dəstəyinin yetərsiz olduğunu bildirib. Onun dediklərini nəzərinizə çatdırıram:
“Ukraynalı uşaqlar zərbə alır. Siz daha çox sanksiyadan danışırsınız, baş nazir, amma Roman Abromoviç sanksiyaya məruz qalmayıb, o Londondadır. Uşaqları Londondadır, bombardman altında deyil. Putinin uşaqları Hollandiyada və Almaniyada malikanələrdədir. Bu malikanələr onlardan alınıbmı? Mən görmürəm. Mən ailə üzvlərimi, komanda üzvlərimi görürəm. Biz ağlayırıq, hara qaçacağımızı bilmirik. Baş verənlər bunlardır, baş nazir”.
NATO indi də Ukraynanın hava məkanını bağlamır. Bunu etsə, Risiya qırıcılarını vurmalı olacaq. Belə açıq konfliktə getmək istəmir deyə, sanki Ukraynanı qurban verir”.
Məhəmmədəli QƏRİBLİ
