Rusiyanın Ermənistandakı səfiri Sergey Kopırkin erməni telekanallarına müsahibə verib. Müsahibəsində Qarabağla bağlı məsələlərə toxunan səfir yenə səlahiyyətlərinə aid olmayan məsələlərə toxunaraq fikirlər səsləndirib.
“4 ildən sonra rus sülhməramlılarının taleyi necə olacaq” sualına cavabında o deyib ki, sülhməramlıların qalma müddətini uzatmaq üçün imkanlar var: “İndi mənim üçün 4 ildən sonra nə olacağı barədə danışmaq çətindir. Razılaşmalar var. Amma mən tam əminəm ki, sülhməramlıların qalma müddətini uzatmaq imkanları var. Düşünürəm ki, sülhməramlıların taleyi vəziyyətin necə inkişaf edəcəyindən, bütün tərəflərin mövqeyindən asılıdır”.
Kopırkin xüsusi olaraq vurğulayıb ki, Qarabağdakı ermənilərin təhlükəsizliyi nəzərə alınmalıdır. Necə yəni sülhməramlıların qalma müddətini uzatmaq imkanları var? Hələ 4 il bitməyib, bunlar indidən müddəti uzatma barədə danışırlar.
“Moskva razılıqlarının icrası Ermənistan hakimiyyəti tərəfindən yubadılır”
Sözügedən məsələ ilə bağlı fikirlərini “Bakı-Xəbər”lə bölüşən politoloq Elşən Manafov bununla bağlı bir sıra məqamlara toxundu: “Hazırda Rusiya və Qərb arasında MDB məkanına nüfuz dairəsi uğrunda mübarizə özünün kəskin bir mərhələsinə daxil olub. Rusiya və Ukrayna arasındakı hərbi münaqişənin əsl səbəbkarı rəsmi Kiyevi 2014-cü ilin məlum hadisələrindən sonra istiqamətləndirən Qərb, onun qlobal maliyyə mərkəzləridir. 2014-cü ildən sonra isə Qərbin Rusiya ilə növbəti qarşıdurması Ermənistanda baş verdi. Məlum hadisələr Rotşild-Soros klanı ilə bağlı olan Paşinyanın Ermənistanda hakimiyyətə gəlməsi ilə nəticələndi. Cənubi Qafqazda geopolitik duruma Rusiyanin təsir imkanlarını məhdudlaşdırmaq və bu bölgəni büsbütun Qərbin təsir dairəsinə salmaq üçün Qərbin sifarişi ilə Ermənistanın Azərbaycana qarşı apardığı müharibə dolayısı ilə həm də Rusiya üçün düşünülmüş tələ idi. Ancaq onların bu planı alınmadı”.
Politoloq hesab edir ki, Azərbaycanın qələbəsi bölgədə qlobal maliyyə mərkəzlərini qane etməyən yeni geosiyasi reallıqlar yaratdı: “Ermənistanda Rusiya səfirinin bölgədə rus sülhməramlılarının saxlanma müddətinin hadisələrin hansı axarda gedə biləcəyi ilə bağlı amillərdən asılı ola biləcəyi ilə bağlı açıqlaması məhz yeni geosiyasi reallıqlardan narazi qalan və fürsət düşəcəyi halda onu dəyişmək ümidlərini itirməyən Qərbdəki bəlli dairələrə ismaric kimi qəbul olunmalıdır. Azərbaycan Prezidenti İlham Əliyev Rusiyaya sonuncu rəsmi səfəri zamanı iki dövlət arasındakı münasibətlərin mahiyyətcə yeni mərhələyə - müttəfiqlik münasibətləri mərtəbəsinə qalxması ilə bağlı məsələlərə munasibət bildirdi. Ölkə başçısı qeyd etdi ki, Rusiya Qarabağ probleminin nizamlanması ilə əlaqədar proseslərə həlledici təsirə malikdir. Müasir dövrun qlobal çağırışlarına rəğmən Rusiya ilə münasibətləri müttəfiqlik münasibətləri səviyyəsinə qaldirmaqla, dövlətimiz təkqütblü deyil, çoxqütblü dünya tərəfdarlarının yanında yer aldığını bəyan etdi. Ermənistanla münasibətlərimiz normal məcraya hələ də duşmədiyindən, bəllidir ki, münaqişə bölgəsində Rusiya sülhməramlılarının hələ bir müddət qalmasına ehtiyac olacaq. 2020-ci ilin Moskva razılıqlarının icrası, bəllidir ki, Ermənistan hakimiyyəti tərəfindən yubadılır. Bu istiqamətdə danışıqlarda intensivliyin artırılması münaqişə tərəfləri arasında dövlət sərhədlərinin müəyyənləşməsinə, nəqliyyat kommunikasiya dəhlizlərinin nəhayət ki, açilmasına öz töhfəsini verə bilər”
Yalnız bu halda və ən əsas tərəflər arasında sülh müqaviləsi imzalandıqdan sonra sülhməramlıların ərazimizdən çıxarılması müzakirə predmeti ola bilər.
Vidadi ORDAHALLI
