Azərbaycanın Ukraynadakı səfiri Elmira Axundova sosial şəbəkələrdə və mediada barəsində yayılan məlumatlarla bağlı bəyanat yayıb. Səfir hazırda Bakıda olduğunu deyib.
O, səfirliyin qadın əməkdaşlarından və ailə üzvlərindən ibarət ümumilikdə 40 nəfər heyətlə bu gecə Bakıya gəlib. Səfir qeyd edib ki, həmin şəxslərin təxliyəsi çox çətinliklə baş tutub. Elmira Axundova, eyni zamanda, səhhəti ilə bağlı yayılan məlumatlara da aydınlıq gətirib: "Müəyyən müxalif dairələrin yenidən mənə qarşı ləyaqətsiz kampaniyaya başlaması son dərəcə xoşagəlməz haldır. Bu dəfə məni Ukrayna hadisələri ilə bağlı fəaliyyətsizlikdə və susmaqda ittiham edirlər. Ona görə mən bunu bəyan etmək istəyirəm: iki ay əvvəl keçirdiyim onurğa əməliyyatı ilə bağlı müəyyən problemlərə baxmayaraq, mən eyni fədakarlıq və məsuliyyətlə Kiyevdə fəaliyyətimi davam etdirdim. Səfir kimi mənə gəldikdə, siz bilirsiniz ki, mən yalnız səfir deyil, həm də qadınam. Ona görə də qadın diplomatların, o cümlədən səfirlik əməkdaşlarının ailə üzvlərinin təxliyəsi barədə qərar verildikdə, biz bu təxliyəni təşkil etdik. Mən də, həmçinin, ölkəni tərk etdim. Bizim qrupumuzda təxminən 40 nəfər (əsasən qadınlar, yaşlılar və 17 yaşa qədər uşaqlar) var idi. Biz hər blokpostda dayanaraq Moldova sərhədinə qədər uzun və ağır yol qət etdik. Kişinyovda Bakıya uçmaq qərarı verildi. Moldovadakı səfir Qüdsi Osmanov mənə və bəzi diplomatlara çarter reysi ilə uçmağı təklif etsə də, biz təyyarədə Azərbaycan dövlətinin pulsuz təxliyə etdiyi həmyerlilərimizin yerini tutmamaq üçün bu imkandan istifadə etmədik. Çox çətinliklə hamıya bilet aldıq, karvanı “yaşıl” dəhlizlə Rumıniyaya (Moldova və Rumıniya səfirliklərinin əməkdaşlarına təşəkkür) apardıq və təxliyə olunduq. Beləliklə, həyatlarına şəxsən cavabdeh olduğum 40-dan çox səfirlik əməkdaşı və onların ailə üzvləri xilas edildi. Hazırda səfirliyi minlərlə azərbaycanlı üçün sığınacaq adasına çevrilən Qüdsi Osmanova bir daha təşəkkür edirəm. Ukraynada olan onlarla, bəlkə də yüz minlərlə həmyerlimiz bu ölkəyə könüllü gəlib. Hamının evakuasiyasını bir anda təşkil etmək mümkün deyil. Dözüm və səbr tələb olunur ki, bu da bəzən vətəndaşlarımızda olmur. Başqa bir şey də demək istəyirəm: bir çoxları yaşadığı illər ərzində Ukrayna vətəndaşlığı alıb, indi isə ondan təcili imtina etmək istəyirlər. Çünki Ukraynada ümumi səfərbərlik elan edilib. Bəziləri bizdən qanundankənar hərəkətlər etməyimizi tələb edir. Bütün məsuliyyətimlə bəyan edirəm: Bəzi KİV-də səfirliyin hansısa arayışları 200 dollara satması barədə yayılan xəbərlər tamamilə yalan və böhtandır. Son günlər ərzində bizim konsulumuz tərəfindən 7 və ya 8 qanuni yollayış verilib. O, vətəndaşların vəziyyətini nəzərə alaraq, hətta 10 dollar məbləğində olan rüsumu götürməyib. Bu kinli böhtan hansı məqsədlə yayılır?! Kiyevdəki səfirliyimizdə sutkada 24 saat mümkün olduğu qədər çalışan kişi diplomatlar və mühafizəmizin əməkdaşları qalıb. Onlardan artıq etdiklərindən daha çoxunu tələb etmək mümkün deyil. Mənə və öz ailələrini təxliyə edərək Ukraynanı tərk edən digər əməkdaşlara gəldikdə, onlar vəziyyət imkan verdikdə geridə qayıdacaqlar. Mən də həmçinin. Buna şübhəniz olmasın. Və hər kəsdən mənə qarşı layiq olmadığım kampaniyanı dayandırmağı xahiş edirəm. Mənə indi tək fiziki deyil, həm də mənəvi cəhətdən çətindir: anamın vətəni od içindədir, qohumlarım da daxil olmaqla, artıq mənə yaxın olan bir neçə şəxs xəsarət alıb. Bu gün yalnız bir şey üçün dua edirəm: qoy hər iki tərəfdən minlərlə əsgər və zabitin həyatına son qoyan bu qəddar və mənasız müharibə tezliklə başa çatsın. Ukraynada humanitar fəlakət başlayıb. Bunun da nəticələri təkcə ukraynalılar və ya ruslar üçün deyil, bütün Avropa üçün gözlənilməz ola bilər".
Göründüyü kimi, Elmira xanım tələm-tələsik Bakıya gəlməsini əsasən qadınlıq amilinə bağlamaq istəyir. Çox maraqlıdır, qadın olmağı niyə Elmira Axundovanın məhz indi yadına düşüb? Bəs, yüz kişinin çəkə bilməyəcəyi yükün altına girib deputat, səfir olanda zərif cins amilini niyə dilə gətirmirdi? Niyə demirdi ki, mən qadınam, bu ağır məsuliyyətin altına girə bilmərəm?!
Belədirsə, hazırda Ukraynanın bir çox şəhərlərində bombalar altında qalan, hər an ölümlə çarpışan Azərbaycan vətəndaşı olan qadınlarımız barədə kim düşünməlidir?
Politoloq Rəşad Bayramov “ Bakı-Xəbər”ə açıqlamasında bildirdi ki, Elmira xanlmın bu məsələni qadınlıq, xəstəlik amili ilə izah etməsi doğru deyil: “Məlum olduğu kimi, Azərbaycanın Ukraynadakı səfiri Elmira Axundova müharibə başlayan kimi Ukraynanı tərk edərək Bakıya qayıtmasının səbəbləri barədə açıqlama verib. Açıqlamanın bəhanələr hissəsi ilə bağlı nəsə deməyə lüzum görmürəm. Çünki dediyim kimi, xanım səfirin arqumetnləri bəhanədən başqa bir şey deyil və münasibət bildirməyə belə dəyməz. Bir sözlə deyim ki, səfir həmin ölkəni hamıdan sonra tərk etməliydi. Amma onun bəyanatında soydaşlarımızı aşağılayan və faktiki olaraq Rusiya xüsusi xidmət orqanlarının mövqeyini təsdiqləyən olduqca təhlükəli bir məqam da var. E.Axundova deyir ki, “bir çox azərbaycanlılar yaşadığı illər ərzində Ukrayna vətəndaşlığı alıb, indi isə ondan təcili imtina etmək istəyirlər. Çünki Ukraynada ümumi səfərbərlik elan edilib”. Bu isə Ukraynada yaşayan soydaşlarımızı qorxaqlıqda günühlandırmaq və təhqir etməkdən başqa bir şey deyil. Digər bir tərəfdən, artıq bir neçə gündür ki, Rusiya xüsusi xidmət orqanlarının nəzarətində olan ayrı-ayrı KİV Ukraynada yaşayan müxtəlif millətlərin və xalqların Rusiyaya qarşı döyüşməkdən imtina etdikləri barədə dezinformasiya xarakterli təbliğat aparır. İndi eyni mövqenin səfirimiz tərəfindən də elan olunması həmin təbliğatı aparanların çörəyinə yağ sürtməkdir və heç bir halda qəbuledilən sayıla bilməz. XİN rəsmilərinin səfirin bu bəyanatına münasibət bildirməsi lazımdır”.
Məhəmmədəli QƏRİBLİ
