Müvəqqəti olaraq Rusiya sülhməramlılarının nəzarəti altında olan ərazilərimizdəki separatçılar yenə oyunbazlıqlarla məşğul olurlar. Son zamanlar separatçıların başçısı Araik Arutunyanın separatçılarını tərk edəcəyi barədə məlumatlar yayılır. Ermənistanın “Hraparak” qəzeti yazır ki, Araik Arutunyan separatçılara başçılıq etməkdən imtina edir.
Separatçıbaşı yenidən oyuncaq “prezident”liyə namizədliyini irəli sürməmək qərarına gəlib. Qəzet yazır ki, separatçılar, guya 2023-cü ilin əvvəlində "parlament", daha sonra isə "prezident" seçkiləri keçirməyi nəzərdə tutur və seçkidə “Daşnaksütyun"un təmsilçisinin əsas namizəd olduğu yazılır. Yəni Araik gedəcək, daşnaklar gələcək (? ).
Qəribədir ki, onlar özlərini orada “dövlət” saymaqda və “seçki” keçirmək iddialarını ortaya qoymaqda davam edirlər. Heç şübhəsiz, Rusiya sülhməramlıları buna reaksiya verməli olduğu halda yenə də görməzdən gəlirlər. Bu vəziyyətdə “Daşnaksütyun”nun ortaya çıxması da təsadüfi deyil. Araikin separatçıbaşı olmaqdan imtina etməsinin səbəbini əsasən onunla izah edirlər ki, o yaxın vaxtlarda Azərbaycanın aidiyyəti qurumları tərəfindən həbs ediləcək. O özü də bunu bilir və indidən çəkilmək istəyir ki, bəlkə cəzası yüngül oldu.
“Araik olmasın, hər hansı bir daşnak olsun, bu ünsürlərin ümumi amalı birdir - separatçılıq və işğalçılıq”
Siyasi ekspert Rövşən Rəsulov “Bakı-Xəbər”ə bildirdi ki, görünür, onların “təfəkkürləri” müharibədən sonra get-gedə daha da sarsılır ki, bu cür ağılsız nəticələrə gəlirlər. “Ümumiyyətlə, onlar necə saxta “artsax” tarixlərini utopiya xarakterində zorla insanlara sırımağa cəhd edirlərsə, siyasi məqamlarda da utopik və xam xəyallarından geri qalmırlar. Rusların bir sözü var, “meçtat ne vredno”, yəni xəyal etməyin ziyanı yoxdu, amma xam xəyalların reallığa çevriləcəyinə sərsəmcəsinə inanmaq artıq nəinki separatçıların ziyanına səbəb ola bilər, həm də onların birdəfəlik məhvi ilə nəticəsini tapar. Görəsən bu sərsəmlər yığnağı hələ də anlamır ki, 2023-cü ili deyil, hazırkı aqibətləri haqqında düşünməlidirlər? Araik Arutunyan olmasın Aşot olsun, yaxud Mkrtıç olsun! Yəni kimliyindən, siyasi baxışından asılı olmayaraq, separatçılığın kökləri kəsilmək üzrədir və bunu yalnız biz demirik, bunu son vaxtlara qədər bel bağladıqları Ermənistanda da anlamağa başlayıblar. İndi Araik olmasın, hər hansı bir daşnak olsun, bu ünsürlərin ümumi amalı birdir - separatçılıq və işğalçılıq!”
R.Rəsulovun sözlərinə görə, bu ünsürlər birdəfəlik dərk etməlidirlər ki, üçtərəfli bəyanatın təxminən 1 il 4 ayı geridə qalıb və yerdə qalan müddət ərzində Qarabağ torpaqlarından rədd olub getməlidirlər. “Əks halda, acınacaqlı sonluqla üzləşəcəklər və buna qətiyyən şübhəmiz yoxdur. Proses gedir, həmçinin, bugünlərdə Ermənistanın baş naziri Nikol Paşinyanın Azərbaycanla sülh danışıqlarına başlamağa, sərhədlərin delimitasiya və demarkasiya prosesi müxanizminin işə salınmasına hazır olduğunu deməsini də unutmamalıyıq. Bəli, Qarabağdakı separatçılar özlərindən “proqnoz” və udyudrmalar səsləndirə bilərlər, amma bu fikirlər əsla həmin ərazilərdən kənara çıxmır, çünki bu məsələ artıq qapanıb. Nə “parlament”, nə də “prezident” seçkiləri keçirilə bilməz və keçirilməyəcək də. Daha yaxşı olardı ki, bu quldurlar yığnağı hər tərəfdən Azərbaycan Ordusunun mühasirəsində qaldıqları barədə fikirləşinlər. Misal üçün, 44 günlük müharibə vaxtı Silahlı Qüvvələrimiz Şuşada tikilən “parlament” binasını necə hədəfə almışdısa, növbəti cəhddə Xankəndidəki müvafiq binaları da hədəfə ala bilər və bu heç də çətinlik yaratmır. Azərbaycanın öz torpaqlarında antiterror əməliyyatları keçirməsinə kimsə mane ola bilməz.
Biz bu xüsusda dünyada baş verən qlobal siyasi gərginlikləri də yaddan çıxarmamalıyıq, yəni hazırda dünyanın diqqəti Ukraynadakı hadisələrə tərəf yönəlib və bu proses davam edəcək. O cümlədən, Rusiyanın Azərbaycanla hərbi müttəfiqlik sazişi imzalaması faktı da məhz bu ölkənin Azərbaycanın ərazi bütövlüyünü tanıması əsasında baş verib. Əgər kimlərsə separatçılara bundan sonra rus dəstəyinin veriləcəyini düşünürsə, kökündən yanılır. Burada kiçik və bəlkə də görünməyən bir faktı da diqqətə çatdırmaq istərdim”.
R.Rəsulovun sözlərinə görə, son günlər, xüsusilə İlham Əliyevin Moskvaya rəsmi səfər edib Putinlə görüşündən sonrakı müddətdə Rusiya sülhməramlılarının Qarabağdakı fəaliyyətlərinə çəki-düzən vermələri diqqətlərdən yayınmır. “Misal üçün, Xocalı rayonunun Pirlər kəndi ilə Əsgəranın Xramort kəndi arasında separatçıların səngər qazmalarına edilən xəbərdarlıqlarımız, sonradan isə ermənilərin Rusiya sülhməramlılarına şikayətləri, Rusiya sülhməramlılarının olay yerinə gələrək separatçıları oradan qovmaları da bu cür nəticələr hasil etməyə kifayət qədər zəmin yaradır. Artıq Moskvadan Qarabağdakı sülhməramlı komandanlığına da əmr göndərilib ki, separatçıların həyasızlıqlarına göz yumulmasın, onlar üzərlərinə düşən vəzifələrini məsuliyyətlə icra etsinlər və s. Bütün bunların fonunda isə separatçı tör-töküntülərin “biz də varıq” tipli dırnaqrarası prinsiplərdən çıxış etmələri isə həqiqətdə onların “quyruqlarının” qapı arasında qalması reallığını isbatlayır. Bu “quyruğu” isə, təbii ki, Azərbaycan kəsib atacaq. Bu baxımdan, nə daşnakların, nə də digərlərinin Qarabağda əl-qol açmalarına qətiyyən izn verilməyəcək”- deyə R.Rəsulov bildirdi.
İradə SARIYEVA
