Məlum olduğu kimi, Ermənistan parlamenti ikinci turda Vaaqn Xaçatryanı prezident seçib. Onun namizədliyinin lehinə 71 deputat səs verib. Bunlar hakim “Vətəndaş müqaviləsi” fraksiyasının nümayəndələri olub. Birinci turda isə iqtidarı təmsil edən deputatlar keçmiş yüksək texnologiyalar sənayesi naziri Xaçatryanı seçə bilməmişdilər. Bunun üçün 10 səs kifayət etməyib. Müxalifətin “Hayastan” və “Şərəf duyuram” fraksiyaları öz namizədlərini irəli sürməyib və bu məsələ ilə bağlı müzakirələri boykot ediblər.
Qeyd edək ki, 1959-cu ildə anadan olmuş V.Xaçatryan Ermənistanın beşinci prezidentidir. 1990-cı illərin əvvəllərində V.Xaçatryan İrəvanın meri və parlamentin deputatı olub. O, ötən ilin avqustunda yüksək texnologiyalar sənayesi naziri təyin edilib.
Azərbaycanda bəzilərində belə bir inam yaranıb ki, V.Xaçatryanın prezident seçilməsi ilə Ermənistanın daxili və xarici siyasətində böyük yeniliklər olacaq. Bu əminlik əsasən ondan irəli gəlir ki, yeni prezident mötədil, praqmatk düşüncəli bir şəxsdir. Sülhlə bağlı müəyyən çağırışlar edib.
Ümumilikdə, yeni prezidentin seçilməsi Azərbaycan-Ermənistan münasibətlərinin gələcəyinə, İrəvanın siyasətinə nə kimi dəyişikliklər vəd edir?
“Ermənilərin Qarabağla bağlı iddialarından əl çəkəcəklərini düşünmək doğru olmaz”
Sözügedən məsələ ilə bağlı fikirlərini “Bakı-Xəbər”lə bölüşən Aydınlar Partiyasının sədr müavini Qorxmaz İbrahimlinin açıqlamasından belə məlum oldu ki, bu məsələdə aşırı nəyəsə ümid etmək doğru olmaz. O bunu bir sıra arqumentlərlə əsaslandırdı: “Müəyyən mənada təsir edə bilər. Ən azından ona görə ki, V.Xaçatryan mövcud hakimiyyətə yaxın olan fiqurdur. Çünki əvvəlki prezident Armen Sarkisyan Paşinyandan qabaqkı hakimiyyətdə olan siyasi qüvvələrə yaxın idi. O cümlədən, Paşinyan hakimiyyətinə qarşı idi. V.Xaçatryanın prezident seçilməsi ilə nəzəri və praktiki baxımdan Paşinyanın hakimiyyəti güclənəcək. Nəzərə almaq lazımdır ki, əvvəlki prezidentlə Paşinyan arasında tez-tez fikir ayrılıqları yaşanırdı. Hesab edirəm ki, bundan sonra Ermənistan hakimiyyətində buna bənzər hallar baş verməyəcək. Qeyd etmək istərdim ki, Paşinyan Azərbaycanla sülh müqaviləsinin bağlanmasının sözdə tərəfdarıdır. Bu baxımdan yanaşanda yeni prezidentin sözügedən məsələlərə müsbət təsiri ola bilər. Ancaq bu o demək deyil ki, hər şey göründüyü kimidir. Məsələ ondadır ki, Ermənistanda prezidentin fövqəlada geniş səlahiyyətləri yoxdur. Konstitusiyaya görə, əsas səlahiyyət baş nazirə məxsusdur. Bu isə o deməkdir ki, onun əlində təsir imkanları məhduddur. Paşinyan hansı siyasət yeridəcəksə, yeni prezident də ona uyğun davranacaq. Belə olan halda V.Xaçatryandan fövqəladə ciddi yenilik gözləmək sadəlövhlük olacaq. Bununla belə, ermənilərin Qarabağla bağlı iddialarından əl çəkəcəklərini düşünmək doğru olmaz. O üzdən, bütün bunlar nəzərə alınmalıdır”.
O baxımdan sədr müavini hesab edir ki, arxayınlaşmaq olmaz.
Vidadi ORDAHALLI
