Fransa prezidenti Emmanuel Makron Ermənistan və Fransa arasında diplomatik münasibətlərin qurulmasının 30-cu ildönümü münasibətilə baş nazir Nikol Paşinyana geniş müraciət ünvanlayıb. Müraciətdə iki ölkə münasibətlərinə dair bir sıra məsələlər öz əksini tapıb.
Eyni zamanda, Makronun müraciətində Qarabağla bağlı real olmayan vədlər yer alıb: “Siz həm ikitərəfli əsasda, həm də ATƏT-in Minsk Qrupunun həmsədrliyi çərçivəsində gərginliyin azaldılması və Dağlıq Qarabağ münaqişəsinin həlli üzrə tədbirlərin qəbulu və həyata keçirilməsinə nail olmaq üçün Fransanın qətiyyətli səfərbərliyinə ümid edə bilərsiniz. Əmin olun ki, Fransa bugünkü dünyanın çoxsaylı çağırışlarını həll etmək üçün gələcək illərdə tərəfdaşlığımızı gücləndirməyə tam sadiq olacaq”.
Bütün bunlar onu göstərir ki, E.Makron əslində N.Paşinyanı aldadır. Bunu görməzdən gəlmək mümkün deyil. Söhbət ondan gedir ki, Ukraynada baş verənlərlə əlaqədar Rusiya ilə Qərb arasında ciddi qarşıdurma var. Belə olan halda nə Minsk Qrupu? Qarabağ məsələsində hansı Fransa-Rusiya əməkdaşlığından söhbət gedə bilər? Nə qədər sadəlövh, reallıqdan uzaq olmalısan ki, belə xam xəyallara inanasan. Hərçənd, siyasətdə bu mümkün olan iş deyil. Paşinyan nə qədər populist olsa da, onun bu deyilənlərə inanacağı mümkün görünmür. O baxımdan Makron faktiki olaraq bununla növbəti dəfə Paşinyanı aldatmağa çalışıb.
“Makron həm Paşinyanı, həm də erməniləri aldatmaqla seçkidə erməni lobbisinin dəstəyini almaq istəyir”
Məsələyə münasibət bildirən hərbi ekspert İbrahim Rüstəmlinin fikrincə, Minsk Qrupu formatının mümkün olmayacağını Makron hamıdan yaxşı bilir: “Ancaq o, indiki dövrdə bu yalanı təkrarlamaqla bir sıra məqsədlər güdür. Bir tərəfdən Paşinyanı aldatmaqla onları Minsk Qrupunun ətəyindən yapışmağa təhrik edir, o biri tərəfdən bununla ermənilərin rəğbətini qazanmağa çalışır. Əslində məsələnin kökündə dayanan amil bununla bağlıdır. Makron həm Paşinyanı, həm də erməniləri aldatmaqla seçkidə erməni lobbisinin dəstəyini almaq istəyir. Bunu ancaq belə dəyərləndirmək lazımdır. Çünki Makron özü də yaxşı bilir ki, bundan sonra Minsk Qrupu formatını bərpa etmək mümkün deyil. Birincisi ona görə ki, Azərbaycan müharibədən qalib çıxan tərəf olduğuna görə buna getməz. Çünki zatən ölkəmizdə həmsədrlərin fəaliyyətindən böyük narazılıq var. İkincisi, Ukraynaya görə Qərblə Rusiya arasında kəskin qarşıdurma hökm sürür. Belə olan halda Rusiyanın digər həmsədrlərlə Minsk Qrupunda əməkdaşlığı, nəinki praktiki, heç nəzəri baxımdan da mümkün deyil. Ukrayna müharibəsindən sonra ermənilərin Minsk Qrupuna bəslədiyi ümidlər sarsılıb. Bunu onların özləri də açıq etiraf edirlər. Belə olan halda Makron kimisə inandıra bilərmi? Əlbəttə ki, bu mümkünsüzdür”.
O üzdən, hərbi ekspert hesab edir ki, Makronun məlum müraciəti formal xarakterlidir.
Vidadi ORDAHALLI
