Erməni mətbuatının yaydığı məlumata görə, Tiflisdə erməni icmasının gənclər təşkilatları Sumqayıt, Bakı və Marağa “qırğınlarının qurbanlarının” xatirəsinə həsr olunmuş fotoşəkillərdən ibarət sərgi keçirib, yürüş ediblər. Guya 1988-ci il fevralın 27-29-da Azərbaycanın Sumqayıt şəhərində, 1990-cı ilin yanvarında Bakıda, 1992-ci ilin aprelində Marağada ermənilərə qarşı “qırğın” “baş verib”. Marağa “qırğınını” da ermənilər yeni icad ediblər. Marağada nə “qırğın” olub ki, ermənilər vay-şivən qoparırlar?
Məlumata görə, qondarma sərgi Tiflisin məşhur Avlabar rayonunun “İrəvan parkı”nda açılıb. Guya ki, Sumqayıt hadisələri zamanı saysız erməni “öldürülüb”, “yaralanıb” və “işgəncələrə məruz qalıb”. Ermənilər o qədər yeni yalanlar uydurublar ki, adam eşidəndə məəttəl qalır. Marağa “qırğını”da son günlər beynəlxalq ictimaiyyətə sırınan iddiadır.
Marağa “qırğını” hardan çıxdı, ermənilər bu “qırğını” necə icad edib? Onlar indi də İranımı hədəfə alıblar? İranın Marağa şəhərində onlara qarşı hansı “qırğın” törədilib?
Tarixçi Hafiz Cabbarov “Bakı-Xəbər”ə şərhində çox maraqlı faktlar açıqladı və bildirdi ki, ermənilərin məqsədi özlərini “qırğın qurbanı” kimi dünyada təbliğ etməkdir. “Ermənilər hər zaman olduğu kimi məkrli taktikalarını davam etdirirlər. Ümumiyyətlə, Sumqayıt hadisələri də, Bakıda törədilən hadisə də o vaxtkı Sovet xüsusi xidmət orqanları və hər zaman xüsusi xidmət orqanlarının aləti olan, istifadəsinə yarayan ermənilərin birgə təşkil etdiyi hadisələr idi. 34 il əvvəl törədilən Sumqayıt hadisələrinin məqsədi tarixi Azərbaycan torpaqlarında süni olaraq yaradılan Ermənistan dövləti ərazisindən azərbaycanlıların sürgün edilməsi idi. Bakı hadisələrində isə Sovet xüsusi xidmət orqanlarının məqsədi Bakıya qoşun yeridiləməsinə nail olmaq və Azərbaycanın azadlıq hərəkatını yatırmaq idi. Bu məsələdə də xüsusi xidmət orqanları ermənilərdən istifadə etdi. Bu da təsadüfi deyil. Çünki hələ 200 il əvvəl çar Rusiyası erməniləri bizim ərazilərə köçürməklə onu hədəfləyirdi ki, nə zaman Azərbaycanda milli azadlıq hərəkatı baş versə ermənilərdən katalizator kimi istifadə etsinlər. Ona görə də, tarixin müxtəlif dönəmlərində ermənilərdən istifadə ediblər”.
H.Cabbarovun fikrincə, Rusiyada siyasi rejimlər dəyişsə də, çar Rusiyasını Sovet hakimiyyəti, Sovet hakimiyyətini isə Rusiya Federasiyası əvəz etsə də, yenə də Cənubi Qafqazda ermənilərdən istifadə etmək doktrinası hər zaman aktual olub. Marağa “qırğını” iddiasına gəlincə, H.Cabbarovun bildirdiyinə görə, burada söhbət İran İslam Respublikasının Marağa şəhərindən getmir, məsələ başqadır. Tarixçi xatırlatdı ki, 200 il əvvəl çar Rusiyası tərəfindən İrandan Qarabağa köçürülüb gətirilən ilk 200 erməni ailəsi Ağdərə rayonu ərazisində Marağa (indiki Şıxarx) adlı kənddə yerləşdirilib. Tarixçinin sözlərinə görə, İrandan ilk 200 erməni ailəsinin köçürülməsinin 150 illiyi münasibətilə 1978-ci ildə Marağa-150 abidəsi də qoyulmuşdu, sonradan bu abidəni ermənilər özləri darmadağın etdilər ki, Qarabağ torpağına gəlmə olduqlarının izini itirsinlər. “Ermənilərin “Marağa qırğını” iddiasına gəlincə, bu da başdan-ayağa uydurmadan ibarətdir. 1992-ci ildə Əbülfəz Elçibəy Azərbaycan prezidenti seçildikdən sonra həmin ilin iyununda ordumuz torpaqlarımızın azad olunması uğrunda əks hücumlara başladı. Bilirsiz ki, bu hücum Ağdərə-Əsgəran əməliyyatı da adlandırılır. Keçmiş Ağdərə rayonun Marağa kəndində İrandan ilk 200 erməni ailəsinin köçürülməsinin 150 illiyi münasibətiylə 1978-ci ildə “Marağa-150” abidəsi də qoyulmuşdu. Sonradan başa düşdülər ki, bu abidə onların ziyanına işləyir onu dağıtdılar. Ermənilər indi həmin Marağa kəndindən danışırlar. Həmin o Marağa kəndində Azərbaycan ordusu Ermənistan ordusunu darmadağın etdi. Xocalıda dinc, əliyalın əhaliyə qarşı “qəhrəmanlıq” göstərən, qətliamlar törədən, vəhşiliklər edən erməni ordusunun əsgərləri və erməni terrorçuları həmin Marağa kəndində layiqincə cəzalandırılıblar. Ermənistan burada xeyli itki verdi və indi onu “Marağa qırğını” adlandırırlar. Ermənilər bu kəndin adını Marağa kimi qeyd edirlərsə, demək özləri də bilmədən özlərini ifşa edirlər. Ermənilər özləri etiraf edirlər ki, Marağa Cənubi Azərbaycandır, burada yaşayan erməni icması da 200 il əvvəl Qarabağa köçürülüb... Bu hadisə 1992-ci ilin iyun-iyul hərbi əməliyyatları çərçivəsində baş vermişdi. 1992-ci il əməliyyatında Azərbaycan ordusu dinc əhalini deyil, erməni terrorçularını və Ermənistan silahlı qüvvəllərinin hərbiçilərini məhv edib”.
Marağa “qırğını” ssenarisinin sonrakı vaxtlarda necə hazırlandığı, müəlliflərinin kim olduğu, bu yalanın, iftiranın, saxtakarlığın dünya ictimaiyyətinə hansı yollarla çıxarlıldığı barədə də danışan H.Cabbarov qeyd etdi ki, Marağa kəndində heç bir dinc erməninin burnu da qanamayıb, amma terrorçular və hərbçilər məhv edilib. “Marağa kəndində heç bir dinc erməni öldürülməyib, ermənilərin indi dedikləri uydurmadır. Ermənilərin “istinad” etdiyi uydurmaları Tomas De Vaalın da kitabında var, ondan əvvəl isə qatı ermənipərəst kimi tanınan və erməni lobbisinin kuklası olan Karolina Koks adlı Böyük Britaniya parlamentarisinin “təsvirlər”ində vardı. Onlar əsl həqiqəti təhrif edib, Azərbaycan hərbçiləri tərəfindən öldürülən erməni hərbçilərini sivil kimi qələmə veriblər. Ermənilər də onlara “istinad edib” danışırlar. Əslində isə hadisə tamamilə başqa cür olub. Məlumat üçün deyim ki, həm 1992-ci ilin iyun-iyul aylarında, ondan əvvəl isə aprel ayında əməliyyatlar baş verib. Dediyim kimi, 1992-ci ilin yayında Marağa azad olunub və oradakı erməni terrorçu-silahlı qüvvələri layiqincə cəzasını alıb. 1992-ci ilin aprelində isə Azərbaycan könüllü hərbi birləşmələri Marağaya hücum edirlər, bu kəndi geri qaytarırlar, eyni zamanda da sivil insanları yox, hərbçiləri və terrorçuları öldürürlər, əsir götürürlər. Məqsəd də o idi ki, onları 1992-ci ilin fevralında Xocalıda əsir götürülən dinc əhali və öldürülən insanların meyitləri ilə dəyişsinlər. Çünki ermənilər həm soyqırım törətmişdilər, həm də vətəndaşlarımızı əsir götürmüşdülər. İndi ermənilər min cür uydurmalar icad edirlər, amma bunun heç bir əsası yoxdur” - deyə H.Cabbarov qeyd etdi.
İradə SARIYEVA
