Türkiyə Bosfor və Dardanel boğazlarının Rusiya hərbi gəmiləri üçün bağlanması barədə qərar qəbul edib. Bunu Xarici işlər naziri Mövlut Çavuşoğlu açıqlayıb. O bildirib ki, Ukraynada baş verənlər adi hərbi əməliyyat deyil, əsl müharibədir.
Bu isə Türkiyənin Montrö razılaşmasına əsaslanmaqla boğazlardan hərbi gəmilərin keçməsini dayandırması üçün əsas yaradır. Türkiyənin bu qərarı Rusiya-Türkiyə münasibıtlərinə necə təsir edə bilər?
“Güman edirəm ki, bu davranış Türkiyə-Rusiya münasibətlərində heç bir problem yaratmayacaq...”
Azərbaycan Naminə Alyans Partiyasının sədri Abutalıb Səmədov “Bakı-Xəbər”ə şərhində bildirdi ki, əvvəlcədən Türkiyənin mövqeyi açıq olub və o öz münasibətini başdan bildirib: “Türkiyə hərbi əməliyyatlar ərəfəsində və Rusiyanın Ukraynaya hücuma başlamasından sonra açıq şəkildə öz mövqeyini ortaya qoydu, Rusiyanın bu addımını pislədi. Eyni zamanda Rusiya ilə münasibətləri qorumağın Türkiyə üçün mühüm əhəmiyyət daşıdığını da qeyd etdi. Rusiya Türkiyə üçün çox vacib dövlətdir. Boğazların bağlanması məsələsini bir neçə dəfə Ukrayna da qaldırıb. Həm Ukrayna prezidenti, həm də Ukraynanın
Türkiyədəki səfirliyi səviyyəsində bu məsələ qaldırılıb. Onlara izah olunub ki, Türkiyə Montrö razılaşmasını çox diqqətlə icra edir və bütün məsələləri diqqətlə araşdırmağa çalışır. Ona görə boğazlar bağlanmayıb. Montrö razılaşmasında göstərilən şərtlər çərçivəsində Rusiya hərbi gəmiləri Qara dənizə keçmək imkanı əldə ediblər. Bir şərtlə ki, onların bazası o ərazidə olsun. Onu da demək lazımdır ki, Baltik donanmasının gəmilərini artıq əvvəlcədən Rusiya Qara dənizə keçirmişdi və ona görə digər gəmilərə artıq Rusiyanın ehtiyacı yoxdur. Türkiyə bundan sonra da Montrö razılaşmasını dəqiq və dönmədən icra edəcəyini hamının nəzərinə çatdırıb. Güman edirəm ki, bu davranış Türkiyə-Rusiya münasibətlərində heç bir problem yaratmayacaq və yaratmamalıdır. Türkiyə Xarici işlər nazirinin öz həmkarı ilə, Türkiyə prezidentinin isə Rusiya prezidenti ilə apardığı danışıqlar və Türkiyənin bu hadisələrdə, bu prosesdə tutduğu mövqe də onu göstərir ki, hələlik bu münasibətlər üçün heç bir təhlükə yoxdur”- deyə A.Səmədov qeyd etdi.
Qeyd edək ki, Ukrayna prezidenti Volodimir Zelenski Tvitter səhifəsində qeyd edib ki, Türkiyə Bosfor və Dardanel boğazlarını Rusiya döyüş gəmiləri üçün bağlayıb. “Güclü dəstəyə görə dostum, cənab Prezident Rəcəb Tayyib Ərdoğan və Türkiyə xalqına təşəkkür edirəm. Xalqımız bunu heç vaxt unutmayacaq!" - deyə Zelenski qeyd edib.
Rusiyanın Türkiyədəki səfirliyinin yaydığı informasiyada isə bildirilir ki, Türkiyənin boğazları Rusiya hərbi gəmilərinin keçidi üçün bağlaması ilə bağlı məlumat yoxdur. “Səfirliyə Türkiyə tərəfdən boğazların Rusiya hərbi gəmiləri üçün bağlanması ilə bağlı heç bir rəsmi bildiriş daxil olmayıb”- vurğulanıb.
İradə SARIYEVA
