Ramiz Mehdiyev daşa dirəndi - korrupsiyaya görə Fətəli Abdullayevin adını çəkdi, o isə...

“Ramiz Mehdiyevin ədalətli olduğunu o zaman bilərəm ki, o, bu qanunsuzluqların başında duran şəxsin adını çəksin, onu ifşa etsin ”

img

Azərbaycan Milli Elmlər Akademiyasının  prezidenti, akedemik Ramiz Mehdiyev AMEA-nin Elmi İnnovasiyalar və Alternativ Enerji Texnologiyaları üzrə Elmi Şurasının ilk iclasında çıxışı zamanı AMEA-da baş verən yeyinti və korrupsiya faktına görə AMEA-nın İşlər İdarəsinin sabiq müdiri Fətəli Abdullayevi ittiham edib: “Yoxlamalar nəticəsində meydana çıxan acınacaqlı mənzərəyə görə AMEA-nın İşlər İdarəsinin sabiq müdiri Fətəli Abdullayev ciddi məsuliyyət daşıyır”.

O, Akademiyanın elmi-tədqiqat müəssisələrində son vaxtlar aparılan yoxlamalar zamanı aşkarlanan ciddi qanun pozuntularını, korrupsiya faktlarını və idarəetmədə hökm sürən hərc-mərcliyi kəskin tənqid edib və qarşıya çıxan problemlərin tezliklə həllinin vacibliyini vurğulayıb.

R.Mehdiyevə Fətəli Abdullayevin cavabı gecikməyib. AMEA-nın sabiq işlər müdiri Abdullayev Mehdiyevin cavabını verib: “Çox saylı KİV nümayəndələrinin, məni istəyən və istəməyən yoldaşların zənglərini nəzərə alaraq bildirirəm ki, Azərbaycan Milli Elmlər Akademiyasının nüfuzuna xələl gətirəsi hər hansı bir məsələnin ictimaiyyiləşməsinin qəti əleyhinəyəm. Qaldı konkret şəxsimlə bağlı səsləndirilən fikirlərə görə isə yaşını və vəzifəsini nəzərə alaraq çox təəssüfləndiyimi bildirirəm. Onu da xatırlatmaq istərdim ki, mən artıq 2 ildir AMEA-da çalışmıram”. 

R.Mehdiyev AMEA-nın İşlər İdarəsinin sabiq müdiri F.Abdullayevi ittiham etsə də, F.Abdullayev onun ittihamlarını rədd edib.

R.Mehdiyev kimlərin günahını F.Abdullayevin üzərinə atır? Abdullayev deyir ki, iki ildir Akademiyadan uzaqlaşmışam. Belə olduğu halda Mehdiyev nə üçün onu ittiham edir? Əslində günahkar kimlərdir?

  • “Fətəli Abdullayevlə yanaşı bu qanunsuzluqlara rəhbərlik edən...” 

Gənc Alim, Doktorant və Magistrlər Cəmiyyətinin sədri, fizika-riyaziyyat üzrə fəlsəfə doktoru, elm üzrə ekspert İlqar Orucov “Bakı-Xəbər”ə bildirdi ki, AMEA-da korrupsiya, maliyə yeyintiləri hallarının əsası 2013-cü ildə qoyulub. “2013-cü ildə Akif Əlizadə Akademiyaya rəhbərlik etdikdən sonra orada baş verən korrupsiya halları, qanunsuzluqlar, qurumdakı acınacaqlı vəziyyətin səbəbləri barədə mütamadi olaraq mətbuatda çıxışlar etmişəm. O zaman baş verənlərlə barışmadım, Alif Əlizadə ilə işləmədim, o qurumdan ayrıldım, amma burada cərəyan edilənləri müşahidə etdim. Təsəvvür edin ki, Ramiz Mehdiyevin AMEA-nın sabiq işlər müdiri Fətəli Abdullayevlə bağlı dediyi fikirləri mətbuatdan oxuyuruq, amma biz bunu uzun illər idi danışırdıq. Təkcə Akif Əlizadə və Fətəli Abdullayev cütlüyünün vaxtilə birbaşa mənim təşəbbüsümlə və AMEA-nın sabiq prezidenti mərhum Mahmud Kərimovun böyük əziyyəti, yataqxanada yaşayan insanların böyük zəhməti hesabına gənc alimlər və yataqxanada yaşayanlar üçün tikilən binalarda etdikləri biabırçılıqlar, dəhşətli cinayət faktları bəs edir ki, bu insanlar ömürlərini həbsxanada keçirsinlər. Təkcə bu fakt kifayət edir. Təsəvvür edin ki, yataqxana ərazisində biz həm yataqxana sakinləri, həm də mənzilə ehtiyacı olan gənc alimlər üçün yaşayış binasının tikintisinə nail olmaq üçün nə qədər əziyyətlər çəkdik. Dövlətimiz, Prezidentimiz  sağ olsun, bizim çağırışımıza, narahatlığımıza səs verdilər, dəstək oldular, bu binanın tikilməsi üçün dövlət nə lazımdır hamısını etdi. Bu işdə heç bir rolu, əməyi olmayan Akif Əlizadə və onun “köməkçisi” Fətəli Abdullayev bu binadakı mənzilləri ilk növbədə öz qohumları arasında bölüşdürdülər. Məndə faktlar var ki, onlar bu nəcib işdən hətta qazanc məqsədilə istifadə edib, nə qədər insanı dövlətdən narazı salıblar. İnsanları dövlətdən narazı salmaq ən böyük cinayətdir, xüsusilə də sənə dövlət postu, məsul vəzifə həvalə olnubsa. Bu yaşda bu cür əqidə sahibi olsan, bu cür cinayətlərə qol qoyasan, bu biabırçılıqdır. Mən yenə o yataqxana ərazisində inşa edilən bina məsələsinə qayıdıram, 85 yaşınlı Akif Əlizadə həmin binadan 4 mənzil, iki dörd, iki iki otaqlı mənzil aldı. Obyekt olmalı olan birinci mərtəbəni isə gəlinin adına keçirdi və oranı zəbt etdi. Fətəli Abdullayev Akademiyada heç bir rolu olmayan adamdı. Biz o siyahıda həmin binada kimlərin mənzilə ehtiyacı olduğunu qeyd etmişdik. Təsəvvür edin binanın tikintisini təşkil etmişik, tikintisinə nail olmuşuq, bütün işləri görmüşük. Fətəli Abdullayev məndən o siyahını istədi ki, siz siyahını qalanını biz edəcəyik. Bir gün də olsun elmlə məşğul olmayan, elmi işi belə saxta olan bir adam gəlib Akademiyada alimlər üçün tikilmiş binanı qamarladı. Fətəli Abdullayev o binadan iki mənzil götürdü. Görün AMEA kimi mötəbər bir qurumun rəhbərliyində olan bir adam bu cür işlər görüb, onlar buranı hansı səviyyədə idarə ediblər? Dəfələrlə Akif Əlizadənin bu cinayətlərdə əli olduğunu demişəm, tələb etmişəm ki, onunla bağlı tədbir görülsün, bu binada işğal etdikləri mənzillər əllərindən alınsın. Onların heç bir haqqı yoxdur. Burada ev verdikləri adamların ayrı yerlərdə evləri var. Bunların qanunsuz fəaliyyətləri bununla məhdudlaşmır. Onların bütün əməlləri təftiş edilməlidir. Akademiyanı nüfuzdan salmış adamlar cəzalandırılmalıdır. Müşahidə edirəm, sən 7 il Akademiyaya rəhbərlik edəsən, bu gün Akademiyanın həyətinə çıxanda bir adam sənə salam verməsin. Bu gün Akif Əlizadənin durumu budur. Fətəli Abdullayev deyir ki, mən iki ildir Akademiyada işləmurəm. İki ildir Akademiyada işləmədiyini deməklə özünü məsuliyyətdənmi qurtardığını düşünürsən?Bu Abdullayevi məsuliyyətən azad edir? Nə qədər ki, adamlar məsuliyyətə cəlb edilməyiblər biz indən sonra da Akademiya ilə bağlı belə faktları eşidəcəyik. Akademiya kimi mötəbər, çox nəhəng kişilərin rəhbərlik etdiyi bir ocaq cılız və bazar təfəkkürlü insanların “fəaliyyət obyektinə” çevirilib. Akademiyanın binalarında bunlar nə qədər qanunsuz ticarətxanalar saxlayırdılar? Buradan yığdıqları pullar hara gedirdi? Bu vəsaitlər yalnız bu insanların cibinə gedir, şəxsi mənafelərinə xidmət edirdi”.

İ.Orucov hesab edir ki, gələcəkdə Akademiya rəhbərliyində təmsil olunacaq şəxslərin bu kimi hallara yol verməməsi, başqalarına dərs olması üçün onlar mütləq cəzalanmalıdır. O, qeyd edir ki, AMEA-nın idarəedilməsində A.Əlizadənin rəhbərliyi dövründə həqiqətən də böyük hərc-mərcliklər olub. “Ramiz Mehdiyev AMEA prezidenti seçiləndə məndən bir neçə KİV müsahibə götürdü, münasibət öyrəndi. O vaxt dedim ki, fikrimcə, böyük təcrübəyə malik olan Ramiz Mehdiyev Akademiyadakı bu biabırçılıqların üstünü açacaq. Amma Ramiz Mehdiyev iki ildən çoxdur ki, Akademiya prezidentidir, niyə o binalarla bağlı cinayət işi açdırmır? Məlum olur ki, Nəbatat bağında, o unikal məkanda torpaq satılıb kimlərsə orada villalar tikib? Bu torpağı kimlər satıb? Akif Əlizadənin icazəsi olmadan Akademiyada heç bir iş etmək mümkün deyildi. Ramiz Mehdiyev Fətəli Abdullayevlə yanaşı bu qanunsuzluqlara rəhbərlik edən Akif Əlizadənin də adını çəkməlidir, qurumun rəhbərliyində olub onun fəaliyyətini təftiş etdirsin. Mən Ramiz Mehdiyevin ədalətli olduğunu o zaman bilərəm ki, o, bu qanunszluqların başında duran şəxsin adını çəksin, onu ifşa etsin. Edirmi? Etmir...

Əlizadənin dövründə Akademiyaya yol tapan dələduzlar Mahmud Kərimovun dövründə Akademiyaya yol tapa bilmirdilər. Fətəli Abdullayevdən əvvəl Akademiyanın işlər idarəsinin müdiri, həm də prezident müavini çox dəyərli ağsaqqal Turab Əhmədov idi. Turab Əhmədovun vaxtında belə hallar var idimi? Təbii ki, yox idi. Əlizadənin dövründə isə Akademiyaya dədələrinin obyekti, pul, qazanc mənbəyi kimi baxılıb. Uzun müddət Akadmeiyanın işlər idarəsinin müdri işləmiş Turab Əhmədov barədə heç kəs heç nə deyə bilməz.  Çünki çox təmiz insan idi, Azərbaycan elminə sədaqətlə xidmət edirdi. Niyə Mahmud Kərimovun dövründə işləyən adamlar barədə bir kəlmə də olsun söz deyilmir? Amma Akif Əlizadənin dövründə vəzifəyə gətirilənlərin böyük əksəriyyətinin dələduzluqları üzə çıxdı”.

İ.Orucov qeyd etdi ki, onun AMEA-da işlədiyi dövrdə qurumda yaratdığı Gənc Alimlər Hərəkatı Əlizadənin dövründə məhv edilib. Ekspert deyir ki, Dünya Gənc Alimlərin Forumunu keçirdiyini deyən İ.Orucov  bildirdi ki, Çinin Təhsil Nazirini UNESCO-nun baş konfransının sədrini və daha neçə - neçə dünyaşöhrətli alimləri Azərbaycana gətirib. “Amma o tədbirdə görürdüm ki, Akif Əlizadə necə qısqanclıqla yanaşırdı. Ona dedim ki, biz dünyanın gənc alimlərinin forumunu keçiririk zalı bizə verin, dedi ki, zalı pulla verirəm...Ona görə bu insanların fəaliyyəti təftiş edilməlidir...”

İradə SARIYEVA

Son xəbərlər