Ermənistanın Baş naziri vəzifəsini icra edən Nikol Paşinyan rəhbərlik etdiyi partiyanın fəalları ilə görüşdə bildirib ki, Ermənistandakı növbədənkənar parlament seçkilərinin nəticələrinə təsir göstərmək üçün Azərbaycan sərhəddə gərginlik yaradır. Paşinyan deyib ki, güya Azərbaycan təxribat xarakterli hərəkətləri ilə seçkilərin konkret nəticəsini əldə etməyə çalışır.
Paşinyanın bu məntiqini nə ilə izah etmək olar?
Politoloq Rəşad Bayramov “Bakı-Xəbər”ə açıqlamasında bildirdi ki, Paşinyanın bu açıqlamasında məntiqdən əsər-əlamət yoxdur: “Bilirsiniz ki, Ermənistanda normal seçkilərin keçirilməsi, orada daimi hakimiyyətin oturuşması Azərbaycana sərf edən variantdır. Hətta bir dəfə çıxışında dövlət başçısı da buna işarə etdi. Bildirdi ki, Ermənistanın üzərinə götürdüyü öhdəliklər seçkidən sonra reallaşa bilər. Bundan o nəticəyə gələ bilərik ki, Ermənistanda normal seçki keçirilməsi Azərbaycanı narahat etmir. Ancaq müharibədən sonra Azərbaycanın Ermənistanın daxilindəki proseslərə ciddi təsir imkanları var. Bu da bizim regionda yaratdığımız yeni geostrateji reallıqlardan irəli gəlir. Ölkə daxilindəki siyasi böhranı həll edə bilməyən Nikol Paşinyanın Azərbaycanın guya sərhəddə gərginlik yaratması ilə bağlı səsləndirdiyi fikirlər reallıqla heç uzlaşmır. Artıq bütün dünya bilir ki, sərhəddə gərginliyi Paşinyanın partiyasının yenidən qalib gələcəyindən ehtiyat edən erməni müxalifəti, radikal qruplaşmalar yaradır. Ermənistanda kimlərəsə tabe olan müxtəlif hərbi birləşmələr var. Həmin hərbi birləşmələr Paşinyan tərəfindən idarə edilmir. Onlar Azərbaycanın həyata keçirdiyi delimitasiya və demarkasiya işlərinə mane olmağa çalışırlar. Radikal qruplaşmalar istəyir ki, ümumiyyətlə seçki keçirilməsin. Paşinyanın isə bütün bunları bilə-bilə bu məsələdə Azərbaycanı günahlandırması bir daha göstərir ki, o hələ də alqığı dərsdən lazımi nəticə çıxarmayıb. Bəllidir ki, Azərbaycan öz qanuni haqqını tələb edir, sərhədlərini müəyyənləşdirir. Ermənistandakı bugünkü xaosun bütün günahını onlar özlərində axtarmalıdır”.
Politoloqun sözlərinə görə, Paşinyan bu sərsəm açıqlaması ilə həm də özünə seçkiqabağı prosesdə siyasi dividend toplamağa can atır: “Onların daxili auditoriyası üçün Azərbaycanı sərt tənqid etmək bir normaya çevrilib. Ancaq unudurlar ki, bütün yalanları tez bir zamanda ifşa edilir”.
Məhəmmədəli QƏRİBLİ
