Ermənistan silahlı qüvvələri baş qərargah rəisinin müavini, general-mayor Edvard Asryan deyib ki, Azərbaycan hərbçilərini ələ keçirib əsir saxlamaq lazımdır. O qeyd edib ki, bunun üçün hər zaman fürsət var: “Elə indi 50 Azərbaycan əsgərini əsir götürə bilərik. Çünki Ermənistanın sərhəd bölgələrində də çoxlu sayda Azərbaycan əsgəri var. Hər hansı bir diqqətsiz addımın hərbi əməliyyatlara gətirib çıxaracağını unutmamalıyıq. Bununla belə, ordu komandanlığı istənilən ssenarini nəzərdən keçirir”.
Daha sonra E. Asryan məsələnin diplomatik yolla həllinin vacibliyinə eyham vurub: “Biz onlardan, onlar da bizdən əsir götürəcəklər. Bu proses sonsuza qədər davam edəcək. Lakin biz problemi diplomatik yolla aradan qaldırmağa çalışırıq. Məhz diplomatik yolla sərhədlərimizi bərpa etmək, silahdan istifadə etmədən onları öz ərazilərinə göndərməyə çalışırıq. Həmçinin, belə bir variant da var ki, güc işlətməklə onları geri çəkilməyə məcbur edək. Əsir götürmək də bir metoddur, lakin bu, problemi həll etmir. Əksinə, belə addımlar yekunda hərbi toqquşmaya gətirib çıxarır. Bütün bunlara baxmayaraq, bütün variantlar nəzərdən keçirilir və yekun qərar veriləcək”.
Göründüyü kimi, Ermənistanın baş qərargah rəsmisi dolaşıq mövqe sərgiləyir. Bir tərəfdən təhdid edir, o biri tərəfdən diplomatik yollarla məsələnin həllinin vacibliyini irəli sürür.
“Hər an situasiya Paşinyanın əleyhinə kəskin dəyişə bilər”
Məsələyə münasibət bildirən hərbi ekspert İbrahim Rüstəmlinin sözlərinə görə, E.Asryanın məlum açıqlaması Ermənistanda başıpozuqluğun göstəricisidir: “Məlum olur ki, Ermənistanda vahid komandanlıq yoxdur. Baş nazir Nikol Paşinyan bir söz deyir, hərbçilər başqa söz. Bunlara deyən yoxdur ki, ay bədbəxtlər, sərhədlərinizi qorumağa əsgər tapa bilmirsiniz, 50 Azərbaycan əsgərini necə əsir götürəcəksiniz? Rusiyaya yalvarırlar ki, 102-ci bazadakı rus əsgərlərini sərhədlərin mühafizəsinə cəlb etsinlər. Ona görə də hesab edirəm ki, Ermənistan silahlı qüvvələri baş qərargah təmsilçisinin açıqlamaları əsassızdır. Eyni zamanda, təxribat xarakterlidir. Ermənistan ordusu belə bir cəhd etsə, bu, onlara baha başa gələcək. Necə ki, bir neçə gün əvvəl biz bunu gördük. Belə ki, Kəlbəcər istiqamətində ermənilərin diversiya cəhdinin qarşısı alındı. Nəticədə Ermənistan ordusunun 6 hərbçisi əsir alındı. Hesab edirəm ki, 44 günlük Vətən müharibəsində uğradıqları ağır məğlubiyyət Ermənistan ordusunda ciddi mənəvi-psixoloji böhrana səbəb olub. Belə bir şəraitdə heç onlar özləri də nə etdiklərini bilmirlər. Görünən həm də odur ki, Paşinyan sərhədlərin delimitasiyası məsələsində süni gərginlik yaratmaqla 20 iyun seçkilərində səs toplamağa çalışır. Hesab edir ki, bu cür mövqe seçkidə onların xeyrinə işləyəcək. Çünki reallıq ondan ibarətdir ki, Ermənistanda ictimai-siyasi vəziyyət çox gərgindir. Hər an situasiya Paşinyanın əleyhinə kəskin dəyişə bilər”.
Hərbi ekspert onu da qeyd etdi ki, Azərbaycan bu aralar maksimum ayıq-sayıq olmalıdır.
Vidadi ORDAHALLI
