Hələ cari ilin mart ayının sonlarında Rusiya Erməniləri İttifaqının rəhbəri, milyarder Ara Abramyan Ermənistanda növbədənkənar parlament seçkilərində iştirak edəcəyini açıqlamışdı. Artıq o, bu xüsusda real addımlar atmağa başlayıb. Ekspertlər qeyd edir ki, Ara Abramyan Nikol Paşinyan iqtidarı üçün müəyyən problemlər yarada bilər.
Abramyan isə vaxtilə Nikol Paşinyana qarşı mübarizə aparmadığına görə özünü qınayıb: “Mən özümü günahkar sayıram, çünki mübarizə aparmadım, soruşmadım ki, o kimdir, haradan gəlib...”. O, Ermənistanın indi olduqca acınacaqlı vəziyyətdə olduğunu da qeyd edib. Ölkəsinə gələn Abramyan gələn ay keçiriləcək növbədənkənar parlament seçkilərində iştirak etmək üçün blok da qurur. Belə ki, o, artıq “Evimiz-Ermənistan” partiyasını təsis edib və deputat Tiqran Urixanyanın başçılıq etdiyi “Alyans” partiyası ilə blok halında seçkilərdə iştirak edəcək.
Abramyan “bütün sağlam qüvvələri” birləşməyə və seçkilərdə birgə iştirak etməyə çağırıb. Onu da qeyd edib ki, Ermənistanda sistem böhranı hökm sürür və bu vəziyyəti sözlə ifadə etməkdə acizdir: “Mən artıq 10 gündür Ermənistandayam. Burada gördüklərim bütün təsəvvürlərimi aşıb keçir. Böhran mənim təsəvvür etdiyimdən daha dərindir. Və ölkəni bu vəziyyətə istisnasız olaraq Ter-Petrosyandan başlamaqla, indiyədək mövcud olmuş bütün hakimiyyətlər gətirib çıxarıb”. Abramyan bildirib ki, Ermənistanda hər hansı vəzifə tutmaq istəmir və məqsədi sadəcə olaraq ölkəyə kömək etməkdir. O deyib ki, hazırda “Alyans” partiyası ilə seçkilərə birgə qatılmaq barədə razılaşma əldə edilib, amma digər partiyalarla da danışıqlar gedir. Xatırladaq ki, Abramyan Rusiyanın hakim siyasi dairələri ilə yaxındır və onun Ermənistan siyasətində iştirakı Paşinyan üçün yaxşı heç nə vəd etmir. Ekspertlərə görə, Abramyanı Paşinyan üçün gözlənilməz rəqib də hesab etmək olar. Çünki o, indiyədək Ermənistandakı rusiyameylli qüvvələrə fəal dəstək versə də, özü siyasətə birbaşa qarışmırdı. Lakin indi Abramyan şəxsən seçkilərə qatılır. İri kapitala malik olan Abramyan Ermənistan siyasətində yeni fiqur hesab edilə bilər və öz kapitalını seçkilərdə gen-bol xərcləsə, Paşinyanın hakimiyyəti əldə saxlaması çətinləşəcək. Xatırladaq ki, Abramyan ikinci Qarabağ müharibəsi zamanı öz kapitalını Ermənistan ordusu üçün Rusiyadan silah-sursat alıb göndərməyə sərf edirdi və o zaman Azərbaycan tərəfi bununla bağlı bütün məlumatları əldə etmişdi.
Çoxprofilli “Soqlasie” şirkətinin sahibi olan Abramyan almaz ticarəti hesabına varlanıb. Onun qardaşı Qaqik vaxtilə Ermənistanın iri almaz emalı müəssisəsinə başçılıq edirdi. 1990-cı illərdə Abramyan Rusiyada almaz biznesinə girib, özünün dediyi kimi, iki-üç il bu biznesdə fırlanıb. 1998-ci ildə onun şirkəti Rusiyada 12 milyard dollarlıq ehtiyatlara malik Lomonosov almaz yatağını işlədən “Severalmaz” şirkətinin səhmlərinin 53 faizini Cənubi Afrikanın “De Beers” şirkəti ilə birlikdə almışdı. 2002-ci ildə Abramyan həmin səhm paketini ALROSA şirkətinə satdı. Abramyanın şirkəti uzun illərdir ki, Rusiya prezidentinin İşlər İdarəsinin sifarişi ilə bir sıra iri layihələri reallaşdırıb. Prezidentin İşlər İdarəsinin nəzdindəki “Nazaryevo” aqrosənaye kompleksinin səhmlərinin 58 faizə yaxını Abramyanın nəzarətində olub. Həmin kompleksin istehsal etdiyi ekoloji təmiz məhsullar birbaşa prezident Boris Yeltsinin masasının üstünə gedirdi. Və 90-cı illərin sonlarında - Yeltsin hakimiyyəti dövründə Rusiya utilizasiya olunmaq adı altında ordudan silinən 1 milyard dollarlıq silah-sursatı gizlicə Ermənistana verəndə bu işin arxasında duranlardan birinin məhz Abramyan olduğu üzə çıxmışdı. Abramyanın Rusiya prezidentinin İşlər İdarəsi ilə biznes əlaqələri 2010-cu ildə “Nazaryevo” şirkətinin ləğvindən sonra da dayanmadı. Əksinə, o, Kremllə əlaqələrini daha da gücləndirdi və digər erməni oliqarx, “Taşir” qrupunun sahibi Samvel Karapetyanı da İşlər İdarəsi ilə əməkdaşlığa cəlb etdi. Abramyan Kremlin rekonstruksiyasını həyata keçirənlərdən biridir, nəinki rus dilində, eləcə də erməni dilində bərbad danışan bu oliqarx varlandıqca Rusiya hakim elitası ilə daha sıx münasibətlər qurub. Hazırda o, Rusiya prezidenti yanında millətlərarası münasibətlər üzrə Şuranın komissiyalarından birinə sədrlik edir. Xarici işlər naziri Sergey Lavrov da daxil olmaqla, bir çox yüksək vəzifəli şəxslərlə yaxın dostluq əlaqələri qurub. Abramyanın sayəsində Rusiya Erməniləri İttifaqı həm Rusiyada, həm də Ermənistanda söz sahibidir. Rusiya mediası da yazır ki, Rusiyada fəaliyyət göstərən çoxsaylı ictimai təşkilatlar arasında Abramyanın ittifaqı proseslərə təsir gücü baxımından həmişə xüsusi yer tutur. Abramyan həm də rəsmi olaraq Rusiyanın ən varlı ermənisi statusunu daşıyan Samvel Karapetyanın ortağıdır. Hərçənd, bəzi məlumatlara görə, Abramyanın pulları Karapetyandan daha çoxdur. Karapetyanın “Taşir” qrupunda, Rusiya mənbələrinin məlumatına görə, 200-dən çox şirkət yer alır. İndi bu şəxsin vəsaitinin bir hissəsini Ermənitanda seçkilərə sərf etməsi Paşinyan üçün ciddi problemlər deməkdir.
Samirə SƏFƏROVA
