44 günlük Vətən müharibəsi dövründə Prezident İlham Əliyevin beynəlxalq media ilə sıx təması, onları maraqlandıran suallara dolğun, məntiqli cavablar verməsi bütün dünyada hələ də müzakirə edilir.
Həm müharibə, həm də hazırkı postmüharibə dövründə Prezident İlham Əliyev yeni informasiya strategiyası ortaya qoydu. Prezident İlham Əliyevin informasiya strategiyasının Ermənistan və erməni lobbisinin, Azərbaycanı istəməyən xarici qüvvələrin tərksilah edilməsində mühüm rol oynadığı gizlin deyil. Məhz ölkə başçımızın dəmir məntiqi, əsaslandırılmış fikirləri, tam reallığı əks etdirən müsahibələri nəticəsində Ermənistan və xaricdəki erməni lobbisinin dizləri qırıldı. Elə onlara havadarlıq edənlər də Əliyevin informasiya siyasəti qarşısında aciz qaldılar.
“Bu müsahibələrdə erməni təbliğatının yüz il boyu ortalığa qoyduğu ideoloji əsasları darmadağın edə bilir”
Azərbaycan Mətbuat Şurasının sədr müavini, tanınmış media eksperti Müşfiq Ələsgərli baki-xeber.com-a bildirdi ki, Prezidentin 27 sentyabrdan başlamış informasiya siyasətinin nəticələri bütün uğurları ilə göz qabağındadır. “Ermənilər və erməni şəbəkəsi son yüz il boyunca Azərbaycana, Türk dünyasına qarşı mütəşəkkil siyasət aparıblar. Bura torpaqların işğal olunması, Türk dünyasının çökdürülməsi, eyni zamanda, bu məsələdə informasiya təxribatının və informasiya savaşının aparılması daxil olub. Nə qədər acı olsa da, etiraf etməliyik ki, dünya miqyasında müəyyən uğurlar da qazana biliblər. Azərbaycan da daxil olmaqla, Türk dünyasına qarşı bəzən neqativ rəy formalaşdırmaq sahəsində müəyyən “nailiyyət”ləri də olub. Amma Azərbaycan apardığı informasiya siyasətində və son bir il müddətində informasiya mübarizəsi ilə ermənilərin yüz il boyu apardığı o informasiya savaşına bərabər olacaq səviyyədə bir adekvat cavab qoya bilib ortaya. Bu cavab tədbirlərinin mühüm tərkib hissələrindən biri cənab Prezidentin özünün çıxışlarıdır. Diqqət yetirsək görərik ki, son bir il müddətində, xüsusən də 44 günlük İkinci Qarabağ müharibəsində və postmüharibə dövründə cənab Prezident beynəlxalq transmilli media quruluşlarına müsahibələr verib, eyni zamanda da yerli KİV ilə çox sıx şəkildə təmasdadır, çox intensiv şəkildə açıqlamalar, müsahibələr verir və bu müsahibələrdə erməni təbliğatının yüz il boyu ortalığa qoyduğu ideoloji əsasları darmadağın edə bilir. Diqqətçəkən məqamlardan biri də odur ki, cənab Prezident təkcə ənənəvi media ilə işləmir, həm də sosial şəbəkələrin imkanlarından ciddi şəkildə istifadə edir. Cənab Prezidentin həm “ Twitter”, həm "Facebook" üzərində, həm də digər sosial şəbəkələr üzərində olan hesabları gün ərzində bir neçə dəfə yenilənir və əhəmiyyətli informasiyalar operativ olaraq bütün oxuculara çatdırılır. Cənab Prezidentin “Twitter” hesabı 44 günlük müharibədən başlayaraq Azərbaycanda, eyni zamanda da Ermənistanda ciddi izlənilməklə, mühüm bir brendə çevrilməklə yanaşı, eyni dünya informasiya vasitələri üçün mühüm bir informasiya qaynağına çevrilir və onun “Twitter” hesabında paylaşdığı paylaşımlar, mesajlar çox ciddi şəkildə diqqətə alınır və ciddi reaksiyalarla müşahidə olunur. Aparılan informasiya siyasətində bir element də hiss olunur ki, cənab Prezident ən modern texnologiyalardan istifadə edir. Bu da ondan ibarətdir ki, cənab Prezident media siyasətini yaxşı bilir və özünün çıxışlarında data jurnalistikanın prinsiplərinə istinad edir. Bu da ondan ibarətdir ki, cənab Prezident öz çıxışlarında data jurnalistikanın prinsiplərini tətbiq edir. Qısa, lakonik, təsirli, statistika ilə dolu müsahibələr verir. Siz fikir verirsinizsə, cənab Prezident öz çıxışlarında Ermənistana qarşı məsələlərdə məhz data jurnalistikanın prinsiplərindən istifadə etdi və Ermənistanın yalançı, riyakar olduğunu arqumentlərlə, statistik məlumatlarla sübuta yetirmiş oldu.
Sizə bir media eksperti kimi deyirəm ki, hazırda dünya media məkanında bu xüsusiyyətə çox ciddi şəkildə önəm verilir. Artıq dünya informasiya şəbəkəsi uzun-uzadı müsahibələrlə, çıxışlarla deyil, qısa, lakonik, tutarlı arqumentlərlə, statistikalarla dolu olan çıxışlara diqqət yetirir. Bu baxımdan cənab Prezidentin öz çıxışlarında bu prinsipi tətbiq etməsi həm onun özünə, həm də Azərbaycanın təbliğatına, Azərbaycanın haqq səsinin çatdırılmasına çox ciddi şəkildə müsbətlər gətirir. Nümunə üçün bir neçə məsələ deyim, biz dünya mediasını izləsək görərik ki, cənab Prezidentin verdiyi müsahibələrdə səsləndirdiyi fikirlər, eyni zamanda, onun “Twitter” hesabında paylaşdığı fikirlər anındaca reaksiya doğurur və bu reaksiya təkcə Azərbaycanda, Ermənistanda deyil, dünyanın əksər siyasi mərkəzində dərhal reaksiya yaradır”.
M.Ələsgərlinin sözlərinə görə, erməni şəbəkəsi nə qədər buna neqativ reaksiya versə də, Prezidentin çıxışlarındakı arqumentləri özlərinə məxsus səviyyədə zərərsizləşdirməyə çalışsalar da, yenə də əks-effekt alınır: “Cənab Prezidentin mesajları dünyada çox ciddi şəkildə qəbul olunur və erməni ideologiyasının dağıdılmasında mühüm rol oynayır. Biz buna çoxsaylı misal göstərə bilərik. Mənim sevə-sevə təkrarladığım bir misal var. 44 günlük müharibə dövründə və ondan sonra biz Ermənistan liderləri ilə, xüsusi olaraq indiki müvəqqəti baş nazir Paşinyanla, Ermənistan prezidenti Sarkisyanla ayrı-ayrı transmilli KİV-in götürdüyü müsahibələrə baxsaq görərik ki, o müsahibələrin əksər hissəsi Prezidentin Ermənistana və erməni şəbəkəsinə, Ermənistan liderlərinə qarşı səsləndirdiyi fikirlərdən ibarətdir. Konkret olaraq CNN-in aparıcısı Kristina Amanpurun Paşinyanla müsahibəsini qeyd edə bilərəm. O müsahibə büsbütün İlham Əliyevin gündəmə gətirdiyi tezislərdən ibarətdir. CNN-in aparıcısı bütün suallarını İlham Əliyevin səsləndirdiyi tezislər üzərində qurmuşdu. Biz bu cür misalların sayını çoxalda bilərik, yüzlərlə misal çəkə bilərik. Bütün bunlar onu göstərir ki, dünyanın ən böyük media şirkətləri, siyasi mərkəzləri Prezident İlham Əliyevi diqqətlə izləyirlər və onun səsləndirdiyi mesajları ciddi qəbul edirlər. Bir daha vurğulayıram, çünki cənab Prezidentin fikirləri əsaslıdır, fikirlərini arqumentlərlə, statistik məlumatlarla zənginləşdirir, ən mühüm cəhət ondan ibarətdir ki, Prezidentin çıxışlarında, müsahibələrində sülhpərvərlik, humanizm prinsipləri var. Cənab Prezidentin çıxışlarına baxsaq görərik ki, burada, birmənalı şəkildə, Cənubi Qafqazda sülhün yaradılmasından, abadlaşdırma, insanların rifah halının yüksəldilməsindən söhbət gedir. Əgər İlham Əliyevin təklifləri Ermənistan tərəfindən də qəbul edilərsə, nəinki Azərbaycanda və Ermənistanda, bütün Cənubi Qafqazda çox ciddi şəkildə sosial-iqtisadi inkişaf əldə oluna bilər”.
Prezident İlham Əliyevin öz çıxışlarında sülhpərvər mesajlar verdiyini bir daha vurğulayan M.Ələsgərlinin sözlərinə görə, bu, erməni təbliğatının mahiyyətini öldürür və dünyada Azərbaycana rəğbət qazandırır. “Biz son olaraq iki gün əvvəl Nizami Gəncəvi Beynəlxalq Mərkəzi tərəfindən videoformatda keçirilən “Cənubi Qafqaz: Regional inkişaf və əməkdaşlıq perspektivləri” adlı müzakirələrə baxsaq və orada iştirak edən şəxslərin sonradan paylaşdıqları fikirlərə, mesajlara, sosial şəbəkələrdəki çıxışlarına diqqət yetirsək görərik ki, bu çıxışların hər birində Prezident İlham Əliyevin nitqinə heyranlıq nümayiş etdirilir, onun dəstəklənməsinə yönəlik fikirlər paylaşılır və bu adamlar dünyada aparıcı siyasi şəxslərdirlər, onların mesajları hər kəs tərəfindən ciddiyə alınır. Ümumiləşdirib deyə bilərik ki, cənab Prezident istər Azərbaycanın reallığının dünyaya çatdırılması, istərsə də ermənilərin şəbəkəsinin yalançı təbliğatının ifşa olunması üçün yeni bir informasiya strategiyası ortaya qoyub. Prezidentin bu informasiya strategiyası həm texnoloji, həm də ideya baxımından tamamilə moderndir, innovativ əsaslar üzərində qurulub və çox ciddi şəkildə effekt verməkdədir. Yəni bu məsələlərin hamısını biz cəm şəklində cənab Prezidentin yeni media strategiyası kimi qiymətləndirə bilərik” - deyə M.Ələsgərli qeyd etdi.
İradə SARIYEVA
