Ermənistanda baş nazirin səlahiyyətlərini icra edən Nikol Paşinyan parlamentin mayın 20-də keçirilən növbədənkənar iclasında ölkənin siyasi həyatında mübahisə və həyəcana səbəb olmuş bir sıra məqamlara toxunub. Onun açıqlamasından belə məlum olub ki, Ermənistan danışıqlar yolu ilə illərdir mövcud olan problemlərin həllində səylərini artırmalıdır.
Xüsusən də Paşinyanın parlamentdəki çıxışında səsləndirdiyi 3 tezis diqqəti cəlb edir. O, sözügedən tezislərlə, bir növ, onu kəskin tənqid edən revanşistlərin arqumentlərini heçə endirib. Belə ki, Paşinyan parlamentdə sözügedən məsələlərlə bağlı bunları qeyd edib: “1.Müxalifət mənim 10 noyabr bəyanatına imza atmaqla xəyanət etdiyimi deyir, amma heç biri demir, deyə bilmir ki, mən gəlsəm, bu sənəddən imtina edəcəm, bunu deməyə cürətləri çatmır. 2. Azərbaycanla Ermənistan arasında sərhəd yoxdur, 30 ilə yaxın olmayıb, biz bu məsələni həll etməliyik. Nə vaxta qədər hay-küy salmaqla məşğul olacağıq?! Sərhədlər dəqiqləşməlidir. 3. Biz sərhədləri dəqiqləşdirməliyik ki, münasibətləri bərpa edə, müharibə təhlükəsini azalda bilək. Bu, Ermənistan üçün normallaşma yoludur”.
Bütün bunlar bir daha onu göstərir ki, Ermənistanda revanşist müxalifətin arqumentləri heç bir sağlam məntiqə söykənmir. Bu səbəbdən seçkidə onlara ciddi etimad göstəriləcəyi real deyil.
“Ermənistan bu öhdəliklərdən imtina edərsə, o zaman bölgədə rus sülhməramlılarının qalmasına...”
Sözügedən məsələ ilə bağlı fikirlərini baki-xeber.com-la bölüşən millət vəkili Aydın Mirzəzadə buna bir neçə aspektdən yanaşdı. Onun fikrincə, revanşistlərin arqumentləri reallıqlardan uzaqdır: “Ümumilikdə, 10 noyabrdan sonra Ermənistanda daxili siyasi vəziyyət düzəlmir. Ermənistan heç cür özünün normal inkişaf yolunu müəyyənləşdirə bilmir. Bu, ilk növbədə, bütün cəmiyyəti əhatə edən qatı millətçilik əhval-ruhiyyəsi ilə bağlıdır. Hətta Paşinyanın çıxışlarında da sivil qaydalara uyğun gəlməyən millətçilik notlarını görürük. Qarşıdan gələn seçkilərdə Ermənistanda siyasi qüvvələr populist tezislərdən istifadə etməklə daha çox səs toplamağa çalışırlar. Ancaq ortada olan 10 noyabr və 11 yanvar razılaşmaları, onlara olan münasibət məhək daşına dönüb. Həmin razılaşmalara olan münasibət Ermənistanda siyasi qüvvələr arasında kimin-kim olduğunu bir daha müəyyənləşdirir. Revanşistlər 10 noyabr sazişi ilə razılaşmırlar, amma ortaya alternativ də qoya bilmirlər. Bununla bağlı aydın yanaşmaları yoxdur. Digər tərəfdən, 10 noyabr razılaşmasından imtina etdikləri halda Ermənistanı nə gözlədiyi sualına da cavab verə bilmirlər. Ermənistan bu öhdəliklərdən imtina edərsə, o zaman bölgədə rus sülhməramlılarının qalmasına ehtiyac qalmır. Çünki sülhməramlılar 10 noyabr sazişinə görə burada yerləşirlər. Ona görə də, bütün hallarda, Ermənistan konstruktiv mövqe sərgiləməli, Azərbaycanla sağlam münasibətlər qurmalıdır. Çünki Ermənistanın nə dənizə çıxışı var, nə də sərmayə qoyuluşu üçün cəlbedici ölkədir. Həmçinin, vətəndaşları üçün də normal iqtisadi mühitə malik deyil. Bu ölkənin yeganə çıxış yolu Azərbaycan və Türkiyə ilə yaxşı münasibətlər qurmaqdan keçir. Ona görə də Ermənistanın seçimi məhduddur”.
Millət vəkili hesab edir ki, indiki situasiyada Ermənistan doğru seçim etməlidir.
Vidadi ORDAHALLI
