“Münaqişə sona çatıb, Dağlıq Qarabağ münaqişəsi mövcud deyil. Azərbaycanda "Dağlıq Qarabağ" deyilən bir məfhum-qurum yoxdur. Hazırda biz bir-birimizlə əməkdaşlığa əngəl yarada biləcək bir problem görmürük”. Bu barədə Prezident İlham Əliyev “Cənubi Qafqaz: Regional inkişaf və əməkdaşlıq perspektivləri” adlı müzakirələrdə Rumıniyanın sabiq baş naziri Petre Romanın bəzi erməni siyasətçilərini Nizami Gəncəvi Beynəlxalq Mərkəzinin liderləri ilə dialoqa dəvət etməyin mümkünlüyünə dair sualına cavabında bildirib.
Dövlət başçısı bununla bağlı fikrini çatdıraraq deyib: “Əslində, biz artıq əməkdaşlıq edirik. Azərbaycan və Ermənistan baş nazirlərinin müavinləri hazırda Zəngəzur dəhlizi ilə bağlı konkret məsələlər üzərində birgə iş aparırlar. Buna görə də, prinsipcə, düşünürəm ki, erməni siyasətçilərin Nizami Mərkəzində təşkil olunan tədbir və müzakirələrdə iştirakları mümkündür”.
Prezident İlham Əliyev əlavə edib ki, nadir beynəlxalq institut olan Nizami Mərkəzi eyni dəyərləri paylaşan insanlar sayəsində yaranıb. “Nizami Mərkəzindəki böyük şəxsiyyətlərın sayı artıq insani keyfiyyətlər və baxış nöqteyi-nəzərdən meyarları müəyyən edir. Hamınızı əməkdaşlıq, təhlükəsizlik, yaxşı qonşuluq siyasəti və digər nəcib fikirlər birləşdirir. Buna görə də, əgər bəzi erməni siyasətçilərin Mərkəzə qatılmalarından söz gedirsə, mən etiraz etmirəm. Lakin həmin şəxs Nizami Mərkəzini qarşıdurma, iddia və iddialar məkanına çevirməmək üçün bu meyarlara cavab verməlidir. Əgər cənab Roman və digər dostlarımız Ermənistanda belə bir siyasətçini tapa bilsələr, onun kimliyini bilmək çox maraqlı olardı. Lakin, çox güman ki, belə bir adam var və mənim buna münasibətim tamamilə normal olacaq”.
Erməni siyasətçilərdən kimlər İlham Əliyevin “açdığı qapıdan” Bakıya gəlmək şansına sahibdirlər?
Siyasi şərhçi Azər Həsrət hesab edir ki, sayları çox olmasa da, Ermənistanda da normal düşüncəli insanlar var və onlar sözügedən platformaya qatılmaq üçün Bakıya gələ bilər: “Əlbəttə, bu məsələdə konkret ad çəkmək çətindir. Amma indiki məqamda mənim ağlıma Ermənistanın keçmiş prezidenti Levon Ter-Petrosyan gəlir. Çünki bu adam digər erməni siyasətçilərinə baxanda həm siyasi çəkisinə, həm də mövqeyinə görə ağlabatan bir siyasətçidir. Hətta xatırlayıram ki, ulu öndər Heydər Əliyevin vaxtında Petrosyan belə bir ifadə işlətmişdi ki, nə qədər gec deyil, biz Azərbaycanla anlaşmalıyıq, əgər anlaşmasaq, sonu bizim üçün faciəli olacaq. Bu adam zamanında ermənilərə bu sözü deyib. Bu isə ondan xəbər verir ki, rasional düşüncə sahibidir, yəni nəticələri əvvəlcədən hesablaya bilir. Bu cür adamların, əlbəttə, Nizami Gəncəvi Mərkəzi kimi nüfuzlu təşkilatlarda keçirilən müzakirələrə cəlb edilməsi işin xeyrinə olardı. Ümumiyyətlə, fikrimcə, Ermənistanda siyasətlə az-çox məşğul olan hər bir şəxs Azərbaycanla masa arxasında dialoqda maraqlı olmalıdır. Çünki onlar uduzmuş tərəfdir, Azərbaycan isə qalibdir. Lakin qalib tərəf olmasına baxmayaraq, Azərbaycan onlara ləyaqətlərini alçaltmayacaq şərtlər təklif edir. Yəni Azərbaycan böyüklük göstərib ermənilərə, Ermənistana elə şərtlər təklif edir ki, bu onların ləyaqətini alçaltmır”.
A.Həsrətin fikrincə, bu adamlar da bunu düzgün dəyərləndirməlidirlər və masa arxasında Azərbaycanla müzakirələrdə iştirak etməlidirlər. Bu cür tədbirlərdə də birgə iştirakın mümkün olduğunu deyən A.Həsrətin sözlərinə görə, Ermənistan siyasətçiləri özləri buna can atmalıdırlar: “Erməni siyasətçiləri arasında belələri az da olsa var. Üzdə olanlardan da belələri olmamış deyil. Mən onlardan birinin adını çəkdim. Mənə elə gəlir ki, Levon Ter-Petrosyan bu məsələlərdə masa arxasında oturub danışılası bir erməni siyasətçisidir”.
İradə SARIYEVA
