Mayın 18-də Qarabağdakı seperatçı erməni qalıqlarının başçısı Araik Arutyunyan “dqr” “müdafiə nazirliyini” ziyarət edib və orada yüksək komandan heyəti ilə görüş keçirib. Görüşdən yayılan fotoda görünən ermənilər hərbçi formasındadır və Qarabağdakı qanunsuz “erməni qoşunlarının” rəhbərləridir. Bu, təkcə 10 noyabr bəyanatının məşhur 4-cü bəndinin aşkar pozulması deyil, Qarabağda Azərbaycan hakimiyyətinə qarşı qanunsuz silahlı dəstənin hələ də varlığının real təsdiqidir.
Erməni mediası yazır ki, A.Arutyunyan toplantıda "ordunun inkişafı, ölkənin müdafiə qabiliyyəti, həmçinin ordunun sosial şəraitinin yaxşılaşdırılması ilə bağlı məsələləri müzakirə edib, Türkiyə-Azərbaycan təcavüzündən bacardıqları qədər müdafiə etdiklərinə görə” hərbçilərə minnətdarlığını bildirib. Arutyunyan çıxışında deyib ki, “sülh gündəliyi ilə çıxış edirik, lakin bunun üçün təhlükəsizlik zəmanətləri lazımdır. Buna görə müdafiə ordusu, peşəkar ordu yaradılacaq”.
Göründüyü kimi, Qarabağdakı separatçıların qalıqları açıq şəkildə ordu formalaşdırmaqla məşğul olur. Ən maraqlısı budur ki, bu açıq təxrbata qarşı Rusiya sülhməramlıları heç bir addım atmır. Prosesin sonu nə ilə nəticələnə bilər?
“Erməni ordusunun şəxsi heyəti Qarabağdan çıxmasa, Azərbaycan antiterror əməliyyatı ilə bu işi həyata keçirə bilər”
Politoloq Qabil Hüseynli “Bakı-Xəbər”ə açıqlamasında bildirdi ki, 10 noyabr tarixli üçtərəfli bəyanata əsasən, erməni silahlı qüvvələri Qarabağdan çıxarılmalıdır: “Bu, razılaşmanın 4-cü bəndində göstərilib. Lakin erməni tərəfi həmin bəndin yerinə yetirilməsini hər vəchlə yubadır. Bununla belə, bu ay ərzində Rusiya və Ermənistanın hərbi rəhbərliyi arasında danışıqların intensivləşməsi nəzərə çarpır. Belə ki, Ermənistanın Baş Qərargah rəisi Moskvada olub, müdafiə naziri Sergey Şoyqu ilə görüşüb. Rusiya xarici işlər naziri Sergey Lavrovun isə həm İrəvana, həm də Bakıya səfəri baş tutdu. Belə görünür ki, imzalanmış sənədlərin əsas qarant ölkəsi olan Rusiya Bakıya səfər öncəsi bu cür suallarla rastlaşmamaq üçün Ermənistan ordusunun Qarabağdan çıxarılması haqda bəndin icrasını sürətləndirməyə çalışır, çünki Azərbaycan qanunsuz ordunun Qarabağdan çıxarılmasını təkidlə tələb edir.
Ermənistan ordusunun Qarabağda bundan sonra qalması həm də Rusiya sülhməramlıları üçün təhlükəyə çevrilə bilər. Bu prosesin düyünlərinin Lavrovun mayın 5-də İrəvan, 10-da isə Bakı səfərində açılacağı gözlənilirdi. Erməni ordusunun Qarabağı tərk etməsilə bağlı bəzi videolar da paylaşıldı. Ancaq bununla kifayətlənmək olmaz. Şəxsi heyətin çıxarılması haqda dəqiq məlumatlar yoxdur. Həmçinin Əsgəran, Ağdərə ərazilərində xeyli sayda erməni hərbçisinin qaldığı bildirilir. Bu qüvvələr çıxarılarsa, o zaman birmənalı fikir söyləmək olar. Amma bu baş vermir. Hətta xəbərlər gəlir ki, Ağdərə və Şuşa istiqamətində ermənilər mövqelərini möhkəmləndirir. Araik Arutyunyanın son davranışları bütün bunları təsdiq edir. Çox təəssüf ki, Rusiya sülməramlıları razılaşmanın müddəalarının ermənilər tərəfindən pozulmasına seyrçi qalır. Əgər erməni ordusunun şəxsi heyəti Qarabağdan çıxmasa, Azərbaycan antiterror əməliyyatı ilə bu işi həyata keçirə bilər”.
Məhəmmədəli QƏRİBLİ
