Avropa Parlamenti Azərbaycana qarşı ikili standartlar siyasətindən hələ də xilas ola bilmədiyini növbəti dəfə təsdiqləmiş oldu. Bunu Avropa Parlamentində “Ermənistan və Azərbaycan arasında sonuncu münaqişədən sonra hərbi əsirlər” adlı qətnamənin qəbul edilməsi də tam təsdiqlədi.
Qətnamə mətni tamamilə absurd iddialardan, erməni mənbələrindən alınmış birtərəfli məlumatlardan ibarətdir. Milli Məclisin sədri Sahibə Qafarova məhz bu fonda qeyd edir ki, bu qətnamədə irəli sürülən iddialar qətiyyən reallığı əks etdirmir: "Avropa Parlamenti bir milyondan çox məcburi köçkünün taleyinə səssiz qalırdı. Sözügedən qətnamə də bizim üçün heç bir əhəmiyyət kəsb etmir. Sadəcə olaraq bir kağız parçasıdır”. Sənədi qəbul edənlərin əksəriyyəti ermənipərəst mövqedə olanlardır. Anti-Azərbaycan xarakterli əvvəlki sənədlər kimi, Avropa Parlamentinin bu qətnaməsi də tarixin arxivindən başqa bir yerə yaramır. Burada ikili standartlar da özünü qabarıq büruzə verir.
Rəsmi Bakı dəfələrlə bəyan edib ki, üçtərəfli bəyanatda nəzərdə tutulduğu kimi və beynəlxalq humanitar hüquqa əsasən üzərinə götürdüyü öhdəliklərə uyğun olaraq, Azərbaycan hərbi əsir statusu olan bütün erməniləri sərbəst buraxıb və geri qaytarıb. Hazırda ölkəmizdə bütün hərbi əməliyyatların dayandırılmasını nəzərdə tutan 10 noyabr 2020-ci il tarixli üçtərəfli bəyanatın imzalanmasından bir neçə həftə sonra Azərbaycan ərazisinə qanunsuz göndərilən erməni təxribatçıları həbsdə saxlanılır. Azərbaycanın topladığı məlumat və dəlillərə əsasən, noyabr ayının son 10 günündə döyüş əməliyyatları bitdikdən sonra Ermənistanın Şirak bölgəsindən 60 nəfərdən çox şəxs Azərbaycan ərazilərinə göndərilib. Bu dəstə 2020-ci ilin noyabr ayının sonu və dekabr ayı da daxil olmaqla, Azərbaycan mülki şəxslərinə və hərbi qulluqçularına qarşı terror hücumları həyata keçirərək 4 azərbaycanlı hərbçini və bir mülki şəxsi qətlə yetirib. Azərbaycan bu erməni diversantları beynəlxalq hüquqa uyğun olaraq qanuni əsasda həbsdə saxlayır, onlar Azərbaycan qanunvericiliyinə uyğun olaraq, törədilmiş qətl, təxribat və digər cinayətlərə görə mühakimə olunurlar. Qanunlara uyğun olaraq Azərbaycan 44 gün davam edən Vətən müharibəsindən sonra tutulan bütün şəxslərlə bağlı onlara qarşı olan dəlilləri qiymətləndirməklə ətraflı araşdırma aparır. 4 may 2021-ci ildə ölkəmiz, humanitar addım qismində, saxlanılan şəxslərdən 3-nü ittihamlar irəli sürmədən Ermənistana qaytarıb. Bir neçə nəfərin işi isə baxılması üçün məhkəməyə göndərilib. Amma Avropa Parlamenti, nədənsə, bunları nəzərə almaq istəmir. 44 gün davam edən Vətən müharibəsində tarixi qələbə qazanan Azərbaycan ərazilərini işğaldan azad etdikdən sonra münaqişə səhifəsini birdəfəlik qapatmağa və Ermənistanla bölgədə sülh, təhlükəsizlik şəraitində yaşamağa, regional əməkdaşlığı bərpa etməyə hazır olduğunu bildirib. Amma Ermənistan ölkəmizin əməkdaşlıq çağırışlarına reaksiya verməyərək beynəlxalq miqyasda Azərbaycana qarşı qarayaxma kampaniyası aparır. Təəssüf ki, Avropa Parlamenti də Ermənistanın, erməni lobbisinin bu məsələdə əlində alət olmaqda davam edir və bununla öz nüfuzuna ciddi zərbə vurur.
Avropa Parlamentinin ikili standartlardan çıxış etməsi Ermənistanın Azərbaycanın maddi və mədəni irsinə dağıdıcı münasibətinə seyrçi qalması fonunda da özünü qabarıq büruzə verir. İşğal dönəmində bölgədə Ermənistan tərəfinin apardığı qanunsuz fəaliyyət nəticəsində bütün tarixi, mədəni və dini irs, demək olar ki, məhv edilib. Bu abidələrin dağıdılması, talan edilməsi, mənşəyinin dəyişdirilməsi ilə bağlı hərbi cinayətlərə bərabər fəaliyyət həyata keçirilib. Lakin buna görə Avropa Parlamenti tərəfindən Ermənistana hansısa irad tutulmayıb. Vətən müharibəsinin başa çatmasından 6 ay keçsə də, indiyə kimi Ermənistan hərbi cinayətini davam etdirərək, minalanmış ərazilərin xəritəsini ölkəmizə vermək istəmir. Bunun nəticəsində həm mülki şəxslər, həm də hərbçilər həlak olur. Lakin Avropa Parlamenti bununla bağlı Ermənistanı ittiham etmək, ona təzyiq göstərmək əvəzinə Azərbaycana qarşı açıq qərəz sərgilyir. Avropa Parlamenti hələ də nəzərə almaq istəmir ki, 10 noyabr 2020-ci il tarixli üçtərəfli bəyanata və beynəlxalq humanitar hüquqa əsasən üzərinə götürdüyü öhdəliklərə uyğun olaraq, Azərbaycan hərbi əsir statusu olan bütün ermənilərin hamısını geri qaytarıb. Maraqlıdır ki, Avropa Parlamenti Azərbaycana qarşı absurd iddialar və tələblər səsləndirdiyi halda, Avropa İttifaqı Azərbaycanla əlaqələrini daha da möhkəmləndirməkdə və strateji münasibətlər səviyyəsinə yüksəltməkdə maraqlı və israrlı olduğunu bəyan edir. Əslində bunun Avropa Parlamenti tərəfindən də nəzərə alınması vacibdir. Azərbaycan inteqrasiyaya, regional əməkdaşlığa və təhlükəsizliyin təmininə dəstək verən layihələrin reallaşmasına xüsusi töhfələr verir. Təkcə regionun deyil, bütövlükdə Qərbin enerji təhlükəsizliyinin təminində ciddi əməyi olan da Azərbaycandır. Bunlar o deməkdir ki, bu ölkə Qərblə əməkdaşlığa açıqdır, geosiyasi aspektdə heç bir təhlükə yaratmır, əksinə, bu istiqamətdə müsbət addımlar atır. Bu halda isə Avropa Parlamenti qərəzli sənədlər qəbul etməklə Avropanın özünə zərbə vurur.
Samirə SƏFƏROVA
