Erməni mediası yazır ki, nə qədər ağır olsa da, Qarabağda Azərbaycanın diktəsindən asılı olduğumuzu etiraf etməliyik: “Müharibə bitdikdən sonra Qarabağda ermənilərin mövqeyinin gücləndiyini görmədik, təhlükəsizlik məsələsi, ümumiyyətlə, yoxdur. Sosial proqramlarla diqqəti bu məsələlərdən yayındırırlar. Hər gün azərbaycanlıların yük maşınları Xankəndidən keçir. Ermənilər saatlarla maşın karvanının keçməsini gözləyirlər. Nə qədər ağrılı olsa da, etiraf etməliyik ki, bu gün Azərbaycanın diktəsindən asılıyıq”.
Bununla yanaşı, o da qeyd olunur ki, Azərbaycan Ordusu son günlərdə Qarabağda mövqelərini irəliyə çəkir: “Bu, fərqli istiqamətlərdə olub, lakin təhlükəsizliyə görə hansı ərazilər olduğunu deyə bilməyəcəyik”.
Görünən odur ki, ermənilər hər keçən gün mövcud reallıqların onların əleyhinə işlədiyinin daha çox fərqinə varırlar. Bu isə, öz növbəsində, onlarda Qarabağla bağlı əhval-ruhiyyənin bir qədər də pessimizmə köklənməsinə təkan verir.
“Azərbaycan qalib tərəf olduğu üçün diplomatik masada bir addım da olsun geri çəkilmir”
Sözügedən məsələ ilə bağlı fikirlərini “Bakı-Xəbər”lə bölüşən şərqşünas Seyid Camal Əzimbəyli hesab edir ki, ermənilər artıq Azərbaycanın bütün mənalarda qalib tərəf olduğunu anlayırlar: “İlk vaxtlar bunu həzm edə bilmirdilər. Elə bilirdilər ki, himayədarları tez bir zamanda vəziyyəti onların xeyrinə dəyişəcəklər. Ancaq zaman keçdikcə görürlər ki, Azərbaycan qalib tərəf olduğu üçün diplomatik masada bir addım da olsun geri çəkilmir. Yəni düşmənin xeyrinə güzəştə getmir. Əksinə, daha ciddi tələblərlə çıxış edir. Status məsələsini, ümumiyyətlə, yaxına buraxmır. Ermənilər görürlər ki, Azərbaycan Qarabağda genişmiqyaslı yenidənqurma və quruculuq işləri aparır. Onlar Azərbaycanın öz resursları hesabına bərpa işlərini aparmasının fərqindədirlər. Onu da yaxşı bilirlər ki, demoqrafik göstəricilər bizim xeyrimizədir. Əvvəl iki Dağlıq Qarabağ boyda ərazi ermənilərin işğalı altında idi. Söhbət ətraf 7 rayondan gedir. İndi həmin rayonlar bizim nəzarətimizdədir. Ermənistanla separatçı tör-töküntülər arasında hava əlaqəsi kəsilib və s. Ermənilər əmindirlər ki, gec-tez Rusiya sülhməramlılarının nəzarətində olan ərazilər də Bakının nəzarətinə keçəcək. Praktiki olaraq bir sıra ermənilərin Qarabağda yaşamaq istəmədiklərini görürlər. O baxımdan hesab edirəm ki, ermənilərin Qarabağla bağlı hər keçən gün daha da bədbinləşməsi təsadüfi deyil”.
Şərqşünas hesab edir ki, zaman Azərbaycanın xeyrinə işləyir.
Vidadi ORDAHALLI
