Amerika Birləşmiş Ştatlarının Dövlət Səyahət Departamentinin rəsmi internet səhifəsində ABŞ vətəndaşlarına Azərbaycanda COVID-19 koronavirus infeksiyası və yüksək terror təhlükəsi risqi ilə əlaqədar məlumat verilib, onlara ciddi zərurət olmadığı təqdirdə ölkəmizə səyahət etməmələri tövsiyə olunub. Bu barədə Dövlət Təhlükəsizliyi Xidmətinin saytı məlumat yayıb. Məlumatda deyilir:
"Qeyd olunan məlumat sosial media resurslarının Azərbaycan seqmentində yayılıb. Bununla əlaqədar bəyan edirik ki, Azərbaycan Respublikasının ərazisində terror təhlükəsinin olması ilə bağlı verilən bu kimi məlumatlar həqiqəti əks etdirmir və tamamilə əsassızdır.
Eyni zamanda bildiririk ki, Azərbaycan Respublikasının Prezidenti cənab İlham Əliyevin rəhbərliyi ilə həyata keçirilən uğurlu hüquq-mühafizə və təhlükəsizlik siyasəti nəticəsində ölkəmizdə yaradılmış dayanıqlı sabitlik və əminamanlıq vətəndaşlarımızın, həmçinin Azərbaycana gələn əcnəbilərin təhlükəsizlik şəraitində yaşamasına təminat verir. Hazırda ölkəmizə səyahət etmək istəyən şəxslər üçün hər hansı terror təhlükəsi risqi mövcud deyil".
Bildirilir ki, eyni məzmunlu müraciəti ABŞ-dakı qurum Ermənistanla bağlı da edib. Təbiidir ki, tam stabil ölkə olan Azərbaycanda hər hansı terror risqindən söhbət gedə bilməz.
Ola bilərmi ki, ABŞ son günlər iki ölkə arasındakı sərhəddə yaşanan müəyyən gərginliyin fonunda başlaya biləcək yeni müharibə risqindən narahatlığını bu üsulla ifadə edir?
Ramil Məmmədli: “Həm Ermənistan, həm də Azərbaycanla bağlı eyni məzmunlu müraciətin edilməsi daha çox ABŞ-ın xarici siyasətlə bağlı maraqlarından qaynaqlanır”
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, ABŞ-ın Azərbaycanla bağlı “narahatlığı” həqiqəti əks etdirmir: “Azərbaycan dünyanın ən stabil və terrordan qorunan ölkəsi sayılır. Təsadüfi deyil ki, ən mötəbər tədbirlər məhz bizim ölkədə keçirilir. Bura NATO ilə Rusiya arasında keçirilən görüşləri xüsusilə aid edə bilərik. Belə mühüm tədbirin keçirilmə ünvanı kimi məhz Bakının seçilməsi təhlükəsizliklə bağlıdır. ABŞ-ın əlaqədar qurumları belə xəbərdarlıqları müəyyən ölkələrlə bağlı tez-tez edirlər. Amma düşünürəm ki, hazırda həm Ermənistan, həm də Azərbaycanla bağlı eyni məzmunlu müraciətin edilməsi daha çox ABŞ-ın xarici siyasətlə bağlı maraqlarından qaynaqlanır. Biz gördük ki, ABŞ iki ölkənin sərhədlərində yaranan gərginliklə bağlı Rusiyanın fəallığı ələ almasından narahatdır. Hətta Rusiyadan fərqli olaraq, danışıqların vasitəçilər olmadan, iki tərəf arasında aparılmasının tərəfdarı olduğunu bəyan etdi. Mən bu xəbərdarlıqları müharibə risqi ilə əlaqələndirməzdim. Bununla ABŞ ölkələrdən olan müəyyən incikliyini və xəbərdarlığını çatdırmaq istəyir ki, Rusiya ilə bir qədər məsafəli davransınlar. Rusiya bu məsələdə də təşəbbüsü tək üzərinə götürmək istəyir. ABŞ gözəl bilir ki, hərbi və iqtisadi cəhətdən Ermənistanın yenidən müharibə etməyə gücü qalmayıb. Onsuz da pandemiyaya görə ölkələrin vətəndaşları nadir hallarda bir-birinə səyahət edir. Turizm isə, demək olar ki, dayanıb. Bu baxımdan da, ABŞ-ın terrorla bağlı xəbərdarlığı daha çox iki ölkəyə verilən mesaj xarakteri daşıyır. Azərbaycan stabil ölkədir, sərhədlərində yaranan xırda narazılıqları da öz gücünə həll etməyə qadirdir”.
Məhəmmədəli QƏRİBLİ
