Azərbaycan dövlətinə qarşı hərbi cinayətlər törətməkdə təqsirləndirilən daha 14 erməni hərbçisi barədə həbs-qətimkan tədbiri seçilib.
Belə ki, erməni cinayətkarlar Tonayan David Samveloviç, Qaro Karapetyan, Eduar Saakyan, Viktor Aleksandrov, Aleksnadr Anaxasyan, Andrey Aksuzyan, Seyran Kocamanyan, Armen Martoyan, Qareqin Xalycyan, Ruslan Peklivanyan, Armen Martoyan, Sipan Mouradian, Ardas Oksuzyan və Qalust Trapizonyan barəsində Azərbaycan Cinayət Məcəlləsinin 100-cü (Təcavüzkar müharibəni planlaşdırma, hazırlama və ya başlama), 114-cü (Muzdluluq), 120-ci (qəsdən adam öldürmə), 186-cı (başqasının əmlakı məhv etmə), 218-ci (Cinayətkar birlik (təşkilat) yaratma), 279-cu (Qanunvericiliklə nəzərdə tutulmayan silahlı birləşmələri və ya qrupları yaratma) və 318-ci (Azərbaycan Respublikasının dövlət sərhədini qanunsuz olaraq keçmə) maddələri ilə cinayət işi başlanıb və həmin şəxslərin həbs edilməsi barədə Nəsimi Rayon Məhkəməsinə vəsatət göndərilib.
Məhkəmə vəsatəti təmin edib və adıçəkilən şəxslər barəsində qiyabi həbs-qətimkan tədbiri seçib.
“...14 nəfər cinayətkar, terrorçu tutularaq ölkəmizə təhvil verilməlidir”
“Polisə dəstək” İctimai Birliyinin rəhbəri, tanınmış hüquqşünas Şəmsəddin Əliyev “Bakı-Xəbər”ə bildirdi ki, Azərbaycanın qiyabi həbs-qətimkan tədbiri seçdiyi 14 nəfər erməni terrorçusunun başqa cinayətlərinin də olduğu şübhəsizdir. Erməni terrorunun dünyanın hər yerinə yayıldığını, Suriyada, Livanda geniş miqyas aldığını deyən Ş.Əliyevin sözlərinə görə, cinayətkar David Tonayanın əməlləri hər kəsə məlumdur. “Təbii ki, Azərbaycanın barəsində həbs-qətimkan tədbiri seçdiyi 14 erməni terrorçusunun transmilli cinayətkarların tərkibinə daxil olduğu şübhə doğurmur. Onların başqa cinayətlərinin də olduğu istisna deyil. Bu cinayətkar ünsürlərin Azərbaycana qarşı törətdikləri cinayətlər onu deməyə əsas verir ki, onların başqa cinayətlərdə də əli olub. Məsələ burasındadır ki, ümumiyyətlə, həm keçmişdə, həm də indi erməni terror şəbəkəsi dünyada qanlı cinayətlər törədib, həm bu cinayətlərin təşkilatçısı, həm də icraçısı olub. Çox təəssüf ki, onlara “dayan, dur” deyən, törətdikləri cinayətlərə görə cinayət məsuliyyətinə cəlb edən olmadığından, bu cinayətkar şəbəkə daha da azğınlaşıb, müharibə cinayətləri törətməkdən çəkinməyib. Cəzasızlıq mühiti onların daha ağır cinayətlər törətməsinə şərait yaradıb. Burada görünməyən nədir? Müharibə cinayətləri İkinci Dünya müharibəsi dövründə də, ondan əvvəl də olub. Azərbaycanlılara, türk millətinə qarşı törədilən bu cinayət əməlləri, bütövlükdə, törədilən terror hadisələrində özünü ehtiva edir. Bu şəxslərin məqsədi Azərbaycan xalqına qarşı terror törətmək olub və bu terroru da ediblər. Bu birbaşa ermənizmlə, qriqoriyanizmlə bağlı məsələdir, burada məqsəd məhv etməkdir. Nəsimi Rayon Məhkəməsinin barəsində qiyabi həbs-qətimkan tədbiri seçdiyi bu 14 nəfər erməni terrorçusunun əməlləri ağır cinayətlərə daxildir. Onlara qarşı sərt cəza tədbirləri görülməlidir ki, bu, başqalarına da dərs olsun”.
Bu şəxslərə qarşı qiyabi həbs-qətimkan tədbirinin seçilməsinin tamamilə qanuna müvafiq olduğunu deyən Ş.Əliyevin sözlərinə görə, Azərbaycanın müraciəti əsasında o cinayətkarların hansı ölkədə gizlənməsindən asılı olmayaraq, tutularaq Azərbaycana təhvil verilməsi tam mümkündür. “Bu cinayətkarlar, terrorçular barədə qiyabi həbs-qətimkan tədbirləri seçilməklə yanaşı, onlarla bağlı beynəlxalq axtarış elan edilməlidir. Onlar barədə bütün informasiyalar beynəlxalq hərbi polis təşkilatına - “İnterpol”a təqdim edilməlidir, bu təşkilat da, öz növbəsində, bu məlumatları dünya ölkələrinə göndərməlidir. Onların gizləndiyi ehtimal edilən yerlərə, harada münaqişə ocaqları varsa, ora göndərilməlidir, giriş-çıxış yerlərinə “İnterpol” tərəfindən bu adamların adları daxil edilməlidir. Təbii ki, bunun nəticəsində də Azərbaycan tərəfindən barəsində qiyabi həbs-qətimkan tədbirləri seçilən 14 nəfər cinayətkar, terrorçu tutularaq ölkəmizə təhvil verilməlidir. Hansı ölkələrlə ki, bizim müqaviləmiz var, o ölkələr bu işdə aktiv olmalı və həmin cinayətkarları tutub Azərbaycana ekstradisiyasını təmin etməlidirlər. Çünki bizim bir sıra ölkələrlə cinayətkarların tutularaq bir-birinə təhvil verilməsi ilə bağlı müqaviləmiz var. Avropa ölkələrinin əksəriyyəti ilə, eləcə də Rusiya ilə müqaviləmiz var. Ona görə də çevik qaydada bu prossesual addımlar atılmalıdır ki, onlar bir ölkədən başqa ölkəyə keçə bilməsinlər, dərhal yaxalanıb harada cinayət işinin istintaqı davam edirsə, ora ötürsünlər. Yəni Azərbaycana. Ancaq burada bir incəlik də var. Əgər bu şəxslər onları tutan ölkənin vətəndaşıdırsa və həmin ölkənin cinayət məcəlləsində eyni maddə varsa, sanksiya da eynidirsə, bizə sorğu verib öz vətəndaşlarının öz ölkələrində mühakimə olunması üçün addımlar ata bilər. Amma burada ehtimal edirik ki, təbii, həmin ölkələr öz vətəndaşlarına yüngülləşdirici hallardan istifadə edə bilər, cəzasızlıq mühitindən istifadə yarada bilər. Bu səbəbdən də düşünürəm ki, bu, arzuolunmaz vəziyyət yarada bilər. Ona görə də həmin şəxsləri Azərbaycan ittiham etsə, daha yaxşı olar” - deyə Ş.Əliyev vurğuladı.
İradə SARIYEVA
