Müharibədə məğlubiyyətdən sonra Ermənistanda ictimai-siyasi böhran çoxsaylı problemi kəskinləşdirib və yeni çətinliklər yaradıb. Son vaxtların digər aktual mövzusu isə İrəvan ermənilərinin qarabağlılarla açıq düşmənçiliyidir. Məlumatlara görə, bununla bağlı düşmənçilik kəskinləşir.
Erməni mediası yazır ki, son günlər İrəvan ermənilərinin qarabağlılarla açıq düşmənçiliyi dərinləşir: “Hələ Qarabağda hərbi əməliyyatlar zamanı, xüsusilə də müharibədə məğlubiyyətdən sonra hakimiyyətin konsolidasiya çağırışlarına baxmayaraq, Ermənistanda Qarabağ ermənilərinə, əsasən də sosial şəbəkələrdə hücumlar başlayıb. İş o yerə çatıb ki, Ermənistan və Qarabağın ombudsmanları Arman Tatoyan və Artak Beqlaryan vətəndaşlara müraciət edərək nifrət toxumu səpməyi dayandırmağa, düşmən dəyirmanına su tökməməyə çağırıblar. Bütün bunlar Ermənistan dövlətçiliyinə real təhlükədir. “Qoy, qarabağlılar özləri öz Qarabağlarını müdafiə etsinlər” tezisi bunun birbaşa sübutudur. Bu fikir Ermənistanda artıq bir neçə ildir səslənir, lakin son dövrdə olduqca kəskinləşib və sosial şəbəkələrdə qarabağlıları Ermənistandan qovmaq üçün təhqiramiz çağırışlar səslənir”.
Əslində, sözügedən problem yeni deyil. Sadəcə, əvvəllər bu qarşıdurma əsasən qapalı müstəvidə cərəyan edirdi. Həmçinin, ermənilər torpaqları işğal altında saxladıqları üçün bu problemi, bir növ, gizlədirdilər. Ancaq məlum məğlubiyyətdən sonra sözügedən qarşıdurma artıq açıq müstəviyə keçib.
Maraqlıdır, sözügedən qarşıdurmanın açıq müstəviyə keçməsi Ermənistana nə vəd edir?
“Hesab edirəm ki, Azərbaycan bundan öz xeyrinə istifadə etməlidir”
Məsələyə münasibət bildirən Siyasi İnnovasiyalar və Texnologiyalar Mərkəzinin rəhbəri, politoloq Mübariz Əhmədoğlunun sözlərinə görə, məlum qarşıdurmanın dərinləşməsi Ermənistan dövlətini məhvə sürükləyir: “Məlum qarşıdurma Ermənistanın bir dövlət olaraq mövcudluğunu şübhə altına alır. Getdikcə bu barədə fikirlər artır. Hətta Ermənistanın Rusiyanın tərkibinə daxil edilməsi ilə bağlı fikirlər səslənir. Qeyd olunur ki, Ermənistan müstəqil ola bilmir. O üzdən, Rusiyanın tərkibinə daxil olmalıdır. Bu fikir 44 günlük müharibədən sonra məhz Qarabağ erməniləri tərəfindən ortaya atılıb. Onlar Rusiyaya köçməyə daha çox meyllidirlər, nəinki Ermənistanla bir yerdə olmağa. İrəvan ermənilərinə gəldikdə isə, onlar Qarabağ ermənilərinə əzəldən yuxarıdan aşağı baxıblar. Hesab edirlər ki, Qarabağ erməniləri onlar üçün yükdür. Bütün bunlar onu göstərir ki, erməni cəmiyyətində birlik yoxdur. Vaxtilə ermənilər “Miatsum” ideyası ətrafında birləşirdilər. Bəyan edirdilər ki, bütün dünya erməniləri birdir. İndi bundan əsər-əlamət qalmayıb. Hətta diaspor erməniləri də əvvəlki kimi yardım etmirlər. Dağlıq Qarabağ erməniləri Ermənistan ermənilərinə hücum çəkirlər. Onların arasında mövcud olan fikir ayrılıqları müharibədən sonra daha da kəskinləşib. Ermənistan erməniləri hesab edirlər ki, Qarabağ erməniləri onların gəlirinə şərik olurlar. Nəticədə çətin olan iqtisadi vəziyyət daha da ağırlaşır. Müşahidələr göstərir ki, ermənilər arasında çox dərin uçurum yaranıb. Hesab edirəm ki, Azərbaycan yaranan bu qarşıdurmadan öz xeyrinə istifadə etməlidir. Yəni biz lazımi proseslərə diqqəti yönəltməklə, Dağlıq Qarabağ ermənilərini öz tərəfimizə çəkə bilərik. O baxımdan bu istiqamətdə səylərimizi artırmalıyıq. Ermənilər Azərbaycanın vətəndaşlığını qəbul edəcəklərsə, onlar varlıqlarını qoruya biləcəklər. Yoxsa, digər dövlətlər ermənilərdən yalnız alət kimi istifadə edəcəklər”.
Politoloq hesab edir ki, bütün bunlardan ermənilər düzgün nəticə çıxarmasalar, bu onlar üçün pis nəticələnəcək.
Vidadi ORDAHALLI
