Bir neçə gün əvvəl Ermənistan baş naziri Nikol Paşinyanla görüşdən sonra qondarma qurumun “təhlükəsizlik şurasının katibi” Vitali Balasanyan təxribatçı açıqlama ilə çıxış edib. O bildirib ki, Hadrut, Əsgəran və Azərbaycan Silahlı Qüvvələrinin nəzarəti altına keçmiş başqa ərazilər zamanla geri qaytarılacaq.
Balasanyan qeyd edib ki, sərhədlərin dəqiqləşdirilməsi, Qarabağın statusu məsələsinin aydınlaşdırılması baş verəcək: “Mötərizələri açmayacam, ancaq Azərbaycanın hansı vəziyyətə düşəcəyini görəcəyik, tamaşa edəcəyik”. Belə bir açıqlamanın verilməsi Ermənistanın işğalçı siyasətini davam etdirmək niyyətlərindən xəbər verir. Təsadüfi deyil ki, bundan bir neçə gün sonra Hadrutda ermənilərin diversiya qrupları ordumuza hücum təşkil etdilər.
Bütün bunlar nədən xəbər verir?
“Erməni tör-töküntülərinin qoruduqları Araik Arutunyan, Vitali Balasanyan və onlar kimi müharibə canilərini bizim xüsusi təyinatlılar…”
Böyük Azərbaycan Partiyasının sədri Elşad Musayev “Bakı-Xəbər”ə açıqlamasında bildirdi ki, qondarma qurumun "təhlükəsizlik şurasının katibi" Vitali Balasanyanın hərbi əməliyyatları davam etdirəcəklərini və Azərbaycan Silahlı Qüvvələrinin nəzarətində olan əraziləri geri qaytaracaqlarını bildirməsi ermənilərin hələ də ağıllanmadığından xəbər verir: “Bundan sonra rus sülhməramlılarının arxasında gizlənən erməni terrorçularının hücumu nəticəsində Hadrut istiqamətində əsgərimiz şəhid oldu. Ermənilərin də, rus sülhməramlılarının da mövqeyi ortadadır. Bütövlükdə ermənilər bizim əsgər-zabitlərdən it kimi qorxurlar, çünki gücümüzü gördülər. Ruslar hələ bu gücü öz üzərlərində, sülhməramlı missiya yerinə yetirməli olduqları ərazidə tam hiss etmədiklərindən ərköyünlük edir, özlərini jandarm kimi görür, ermənilərin açıq-aşkar müdafiəçiləri kimi aparırlar. Deməli, biz də öz mövqeyimizi daha sərt surətdə ortaya qoymalı, rusları yerində oturtmalıyıq. Döyüş, ölüm görməmiş, qorxaq rus əsgərlərinin, erməni tör-töküntülərinin qoruduqları Araik Arutunyan, Vitali Balasanyan və onlar kimi müharibə canilərini bizim xüsusi təyinatlılar harada gizlənmələrindən asılı olmayaraq bir-bir götürməli və Azərbaycan hüquq-mühafizə orqanlarına təhvil verməlidir”.
Partiya sədrinin sözlərinə görə, Laçın dəhlizini ruslara etibar etmək olmaz: “Azərbaycan əsgəri mütləq orada olmalıdır ki, Ermənistan hərbi qüvvələrini sərbəst surətdə buralara keçirməsin. Həm də icazəsiz Azərbaycan ərazilərinə daxil olmanın qabağını ala bilək. Bir müddət əvvəl Fransa parlamentinin, eləcə də, digər xaricilərin Ermənistan vasitəsilə Laçın dəhlizindən sərbəst keçərək Xankəndiyə gəldikləri barədə məlumatlar daxil oldu. Rusiya dövlətinin nəzarətində olan bütün telekanallar, informasiya vasitələri birbaşa erməniləri müdafiə edir, separatçılara qucaq açırlar. Zatulin kimi hakim partiyanın təmsilçiləri açıq-aşkar Azərbaycana hücum edir. Bizim hakimiyyət orqanları, xüsusən XİN Rusiya rəhbərliyinə açıq etiraz bildirməlidir. Konkret bir tərəfi müdafiə edən dövlət münaqişənin həllində vasitəçi ola bilməz.
Münaqişənin ikinci mərhələsinə daxil olmuşuq. Hərbi əməliyyatlar gedən zaman nə qədər qərarlı idiksə, bu mərhələdə ondan da qərarlı olmalı və hər bir müdaxiləyə sərt cavab verməliyik. Belə olan halda onsuz da miskin duruma düçmüş ermənilər də, onlara havadarlıq edənlər də öz yerlərini və hədlərini biləcəklər.
Qardaş Türkiyə Ordusunun Azərbaycana gələrək görəvə başlaması da bizim əlimizi xeyli gücləndirəcək. Panikaya düşməyə əsas yoxdur”.
Ekspertin sözlərinə görə, qərarlı olsaq, sonda hər şey bizim istədiyimiz kimi olacaq.
Məhəmmədəli QƏRİBLİ
