Türkiyə prezidenti Rəcəb Tayyib Ərdoğan cümə namazından sonra jurnalistlərə açıqlamasında Putin barədə xoş sözlər işlədib: “Rusiya prezidenti Vladimir Putinlə tanış olandan indiyədək mən onu verdiyi sözə əməl edən şəxs kimi tanıyıram. İkitərəfli əlaqələrimiz başqa ölkələrə nümunə olacaq səviyyədədir. İndiyədək sürdürdüyümüz münasibətləri bundan sonra da eyni şəkildə davam etdirəcəyik. Hərbi, diplomatik, iqtisadi, mədəni sahələrdə birgə fəaliyyət göstərdik və göstərəcəyik. Ticarət həcminə gəldikdə isə, hədəflərimiz eynidir”.
R.T.Ərdoğan deyib ki, V.Putin sözübütöv və kişi adamdır. Qeyd edək ki, daha öncə Vladimir Putin də Türkiyə prezidenti haqqında demişdi ki, “Rəcəb Tayyib Ərdoğan sözübütöv, kişi adamdır”. Ən maraqlısı budur ki, Ərdoğan və Putin bir-birinə bu xoş epitetləri xüsusilə də Qarabağda Azərbaycanın zəfəri ilə nəticələnən müharibədən sonra deyiblər. Vətən müharibəsi bu iki liderin bir-birini daha yaxından tanıması üçün hansısa rola malik ola bilərmi?
“Xüsusilə də Qarabağ müharibəsi hər iki ölkə başçısının bir-birini daha da yaxından tanıması baxımından gözəl imkan yaratdı”
Politoloq Rəşad Bayramovun sözlərinə görə, Türkiyə Prezidenti Rəcəb Tayyib Ərdoğanla Rusiya Prezidenti Vladimir Putin arasında dostluq münasibətləri iki ölkə arasındakı qarşılıqlı əlaqələrin bütün sahələrində əks olunur: “Son dövrlərdə Türkiyə-Rusiya münasibətləri sürətlə inkişaf edir. Bu il iki ölkə arasında diplomatik əlaqələrin yüz illiyi qeyd ediləcək. 2021-ci il isə liderlər tərəfindən birgə, ümumi tarix ili elan olunub. Ölkələr arasında ticarət dövriyəsi 18 faiz artaraq 26 milyard dollara çatıb. Hazırda elə bir dövr yaranıb ki, Ərdoğan Türkiyəsi ilə Putin Rusiyası beynəlxalq ictimaiyyət tərəfindən təcrid edilir və nəticədə iki ölkə arasında təbii yaxınlaşma baş verir. Rusiya və Türkiyə rəhbərlərinin vaxtaşırı görüşünün keçirilməsi münasibətlərin normal məcrada getməsinə dəlalət edir. Son illər ərzində Türkiyə ilə Rusiya bir sıra ölkələrdə qarşı-qarşıya gəldilər. Sonda hər iki ölkənin ümumi maraqlarına xeyir olan razılaşmalar əldə edildi. Xüsusilə də Qarabağ müharibəsi hər iki ölkə başçısının bir-birini daha da yaxından tanıması baxımından gözəl imkan yaratdı. Çünki hər iki ölkə münaqişə ocağına birbaşa sərhəddə yerləşir. Həm Türkiyəni, həm də Rusiyanı bu regiona bağlayan tellər var. Müharibənin gedişi zamanı biz gördük ki, Türkiyə ilə Rusiya arasında koordinasiyalı münasibət vardı. Postmüharibə dönəmində də Türkiyə və Rusiya sülhyaratma missiyasında yaxından iştirak edir. Bütün bunlar ona dəlalət edir ki, 44 günlük Qarabağ savaşı bu iki liderin bir-birini daha yaxından sınaması üçün ciddi vasitə olub”.
Ekspertin sözlərinə görə, Qarabağdakı müharibənin sonluğu, bir çox yeni reallıqlar kimi, bu amili də üzə çıxarmış olub.
Məhəmmədəli QƏRİBLİ
