Ermənistanın baş naziri Nikol Paşinyan erkən parlament seçkiləri keçirilməsi mövzusunda siyasi qüvvələrlə məsləhətləşmələr aparmağa hazır olduğunu bildirib. Bu barədə o, özünün Facebook səhifəsində yazıb:
“Xalqın qərarı nəticəsində baş nazir postundan getməyə hazıram. Baş nazir postunu yalnız xalqın qərarı ilə tərk edə bilərəm".
Paşinyan, xalqın ona inamı yenidən bərpa olunacağı təqdirdə, bu çətin dövrlərdə də Ermənistan Respublikasına rəhbərliyini davam etdirməyə hazır olduğunu bəyan edib: "Bütün bu sualların cavabını almaq üçün yalnız bir yol var - xüsusi parlament seçkiləri keçirmək. Parlamenti və parlamentdən kənar qüvvələri 2021-ci ildə növbədənkənar parlament seçkilərinin keçirilməsi ilə bağlı məsləhətləşmələrə dəvət edirəm”.
Maraqlıdır, Paşinyanın seçkilərdə yenidən baş nazir seçilmə ehtimalı nə qədərdir?
“Bütün xarici qüvvələrin Nikol Paşınyanı hakimiyyətdə saxlamaq səylərinə baxmayaraq, Paşınyanın sayılı günləri qalıb”
Politoloq Yeganə Hacıyeva “Bakı-Xəbər”ə açıqlamasında bildirdi ki, Ermənistanın baş naziri Nikol Paşinyanın “erkən parlament seçkiləri keçirilməsi mövzusunda siyasi qüvvələrlə məsləhətləşmələr aparmağa hazıram” fikri qısa və nisbətən uzunmüddətli hesabla səsləndirilib: ”Hər iki məqsədi səsləndirməzdən öncə onu qeyd edim ki, istənilən ssenari Nikol Paşınyan üçün heç bir müsbət nəticə gətirməyəcək. Cəmiyyət hələ də qısamüddətli müharibədə darmadağın edilməsinin şokunu yaşayır və belə demək olarsa, bu şok hələ yeni və istidir. Bu gün ermənilər təkcə müharibənin yox, həm də yalançı ideologiyalarının çöküşündən doğan fəlakətlə üz-üzədirlər. Ermənilər indiyədək inandıqları “Böyük Ermənistan” ideologiyasının əslində heç nəyə yaramadığının, yalan olduğunun şahididirlər və hazırda bunun fəsadlarını yaşayırlar. Yaşadığı faciənin miqyasını hər keçən gün daha çox anlayan cəmiyyət Nikol Paşınyanı hər gün daha çox günahlandırır və nifrət edir. Bu gün erməni cəmiyyətinin Nikol Paşınyana nifrəti sadəcə müharibəni uduzmuş uğursuz baş nazirə nifrət deyil. Bu, erməni cəmiyyətini birləşdirən ideologiyanın, erməni həyat tərzinin, erməni düşüncəsində fundamental əsasların yararsız olmasının anlayışından doğan nifrətdir.
Bütün məğlub xalqları birləşdirən ümümi cəhət var, bu gün ermənilər üçün də o cəhət xarakterikdir. Cəmiyyətin fikirincə, öncəki hakimiyyətlər onlardan çox şeyi: rifahı, iqtisadi, təbii və s. resursları oğurladısa, Nikol Paşınyanın rəhbərliyi ilə hakimiyyətə gəlmiş müxalifət onlardan hər şeyi, ən əsası, gələcəyə inamı oğurladı.
Bu qədər nifrət və aqressiyanın fonunda insanların kütləvi kücələrdə olmamasının əsas səbəbi də budur”.
Ekspertin sözlərinə görə, Nikol Paşınyanın təklifinin qısa müddətli hesabda əsas məqsədi zaman qazanmaq və özünə qarşı hər gün daha çox artan gərginliyi nisbətən sakitləşdirməkdir: “Nisbətən uzunmüddətli hesabda isə seçkilər vasitəsilə rəhbərlik etdiyi siyasi qrupun hakimiyyətə təsir vasitələrini əldə saxlamaq və parlamentdə mövcudluğunu qorumaq məqsədi durur. “Xalqın qərarı nəticəsində baş nazir postundan getməyə hazıram” fikri də məhz seçkilərdə edəcəyi saxtakarlıq və və bu saxta nəticələri məhkəmə yolu ilə legitimləşdirmək istəyindən doğur. Konkret olaraq, “seçki olarsa Paşinyanın yenidən qalib gəlmə şansı varmı” sualına cavabım budur ki, bütün xarici qüvvələrin Nikol Paşınyanı hakimiyyətdə saxlamaq səylərinə baxmayaraq, Paşınyanın sayılı günləri qalıb.
Xarici dairələr haqqında onu da qeyd etmək istəyirəm ki, bu gün Ermənistanda üç prosesin şahidiyik: Amerikadakı erməni lobbisi və diasporunun apardığı proses, Rusiyadakı erməni lobbisinin apardığı və Rusiyanın özünün birbaşa iştirak etdiyi proses. Hər üçü də Paşınyan hakimiyyətinin qorunmasına hesablanıb.
Erməni cəmiyyəti müharibəni Nikol Paşınyanın başlatdığını, övladlarını ölümə onun göndərdiyini bilir”.
Politoloq bildirdi ki, erməni əsgər analarının rəqib dövlətin rəhbərlərindən kömək istəməsi, “övladlarımızı İlham Əliyev qaytara bilər” fikri Paşinyana inamın tam itdiyindən xəbər verir.
Məhəmmədəli QƏRİBLİ
