“Mən Böyük Britaniyada yaşayan azərbaycanlılar adından, həmçinin şəxsən öz adımdan Sizi və xalqımızı Qarabağdakı qələbəmiz münasibətilə təbrik edir, buna görə Sizə sonsuz təşəkkürümü bildirirəm!
Bizim uğurumuz sadəcə hərbi və geosiyasi uğur deyil, həm də xalqımızın qürur hissinin misli görünməmiş dərəcədə yüksəlməsi və azərbaycançılığın zirvəyə qalxmasıdır. Bu Qələbə ilə Siz Azərbaycan tarixinə müzəffər, qalib Azərbaycan rəhbəri kimi düşdünüz. Sizi bu münasibətlə ürəkdən təbrik edirəm.
Qarabağda müharibə davam etdiyi vaxt biz də burada 45 gün Sizin əsgəriniz kimi informasiya müharibəsində mübarizə aparırdıq. Fəaliyyətimizə Azərbaycana qarşı olan media məlumatlarına reaksiya, deputatlarla ünsiyyət, Londonun mərkəzində ictimai tədbirlərdə iştirak, ordumuza və şəhid ailələrinə dəstək və digər işlər aid idi. Bir qrup həmyerlilərimizlə birlikdə Qarabağ həqiqətlərini dərc edən ingilisdilli qəzet təsis etdik və geniş oxuyucu auditoriyasını cəlb etməyə müvəffəq olduq.
Özüm haqqında qısaca deyim ki mən London şəhərində yaşayıram, Oksford Universitetinin məzunuyam. İxtisasım investisiya və şirkətlərin idarə olunması ilə bağlıdır və bu sahədə işləyirəm, 18 ilə yaxın iş təcrübəm var. İnnovativ layihələrə görə 2015-2016-cı illərdə Britaniyada “Entrepreneur of the Year” finalçısı adına layiq görülmüşəm.
Fəxrlə qeyd etmək istəyirəm ki, mənə də Sizin komandanızda işləmək qismət olub, mən Oksforda gəlməmişdən əvvəl 2010-cu ilə qədər Dövlət İnvestisiya Şirkətində icraçı direktorun müavini vəzifəsində çalışmışam. Hazırda çox sayda tanıdığım yoldaşlar və dostlar hökumətin komandasında yüksək vəzifələrdə çalışırlar.
Bu müharibədən sonra Vətənimizə göz dikən düşmənlərə qarşı etibarlı mübarizə aparmaq üçün ölkəmizin daha da güclənməsi hava və su kimi vacibdir. Əminəm ki, Sizin uzaqgörən siyasətinizlə bu yolda çox uğurlara imza atılacaq. Mən də öz tərəfimdən Sizin sədaqətli əsgəriniz kimi müharibədən sonra inkişaf və dirçəliş yolunda öz kömək və səylərimi göstərməyə, həm Azərbaycanda, həm də ölkə xaricində Vətənimiz üçün vacib olan işlərdə Sizə və dövlətimizə xidmət etməyə hazıram.
Xalqımıza bu qələbəni yaşatdığınız üçün Sizə bir daha təşəkkürümü bildirirəm!”
Bunu Prezident İlham Əliyevə müraciətində Böyük Britaniya Krallığının London şəhərindən Məmmədov Zaur bildirib.
Baki-xeber.com
