Bu gün AzTV-də aparılan islahatlarda hər kəs iştirak etməlidir, çünki AzTV hər bir kəsin TV-sidir. “Trend”-in məlumatına görə, bunu “Azərbaycan Televiziya və Radio Verilişləri” Qapalı Səhmdar Cəmiyyətinin sədri Rövşən Məmmədov deyib.
Onun sözlərinə görə, bu gün Azərbaycan mediasında düşüncə baxımından zəif olan insanlar da var: “Onlar hər hansı hadisəni öz prizmasından qiymətləndirərərək çıxış edirlər. Hər bir tənqidi fikrin öz əsası olmalıdır. Biz hər bir təklifə açığıq. Biz qarşımıza qoyulan məqsədə müəyyən dərəcədə nail olmuşuq. Amma hədəflərimiz çoxdur. Hədəflərəmizə nail olmaq üçün çalışırıq ki, onları şərəflə, vicdanla yerinə yetirək”.
R.Məmmədov qeyd edib ki, HD yayıma keçmək üçün də önəmli addım atılır: "AZTV, Mədəniyyət və İdman kanallarını HD yayıma keçirmək üçün yüksək keyfiyyət ortaya qoyaq. Bu, yalnız texniki deyil, həm də kadr məsələləri ilə bağlıdır. Buna görə hazırda kadr hazırlığı üçün işlər aparılır: “Yanvarın ilk ongünlüyündə yeni efir otağından yayıma çıxacağıq. Studiya çox vacibdir. AZTV-nin studiyaları digər kanallardan geri qalmamalıdır. AzTV-də işin forma və məzmunu da yeni dövrün tələblərinə uğrunlaşdırılmalıdır. Bu istiqamətdə də işlər aparılır”.
R.Məmmədov deyib ki, bəzən belə fikirlər səslənir ki, AzTV-də işçilərin maaş və qonararı kəsilir, bu belə deyil. Onun sözlərinə görə, işçilərin maaş və qonararının artırılması üçün iş aparılır. Yalnız 2019-20-ci illərdə 4 milyondan çox vəsait maaş və qonararlara əlavə edillib: “Azərbaycan Televiziya və Radio Verilişləri" Qapalı Səhmdar Cəmiyyəti ilk gündən ictimaiyyətin üzünə açıqdır. Biz medianın üzərinə açığıq. Əgər AzTV ilə bağlı hər hansı məlumat paylaşmaq istəyirsinizsə, biz buna açığıq. AzTV ilə bağlı məlumatlar yayıldıqda bizim fikrimizin də nəzərə alınması çox vacibdir”,
R.Məmmədov deyib ki, 2021-ci ildə AzTV-də yeni Bədii Şura yaradılacaq. Onun sözlərinə görə, bu gün AZTV-nin Bədii Şurası aktiv faliyyət göstərir: “Bədii Şuranın hər bir üzvü ilə əlaqəm var. Bəzən televiziyada hər hansı çıxışla əlaqədar şura üzvü dərhal mənə yazır”.
R.Məmmədov qeyd edib ki, Bədii Şuranın iki illik fəaliyyət müddəti bitib: “AzTV 2021-ci yeni Bədii Şura ilə fəaliyyətə başlayacaq”.
R.Məmmədov bildirib ki, Azərbaycanın işğaldan azad edilmiş bütün ərazilərində büroların yaradılması üçün iş aparılır və artıq buna görə müraciət edilib.
Onun sözlərinə görə, indiki halda büroların yaradılması mümkün deyil: “Çünki ərazilər minalıdır, təhlükəsizlik təmin edilməyib. Buna görə indi yalnız çəkiliş aparmaqla kifayətlənirik. Nə zaman icazə verilsə, ilk yerdə AzTV-nin müxbirini görəcəksiniz”.
R.Məmmədov qeyd edib ki, hərbi jurnalistikanın inkişaf etdirilməsi də əsas məqsədlərdəndir.
R.Məmmədov deyib ki, Türkiyənin TRT kanalı AzTV-yə onlara birgə platforma şəklində uşaq kanalının yaradılması üçün müraciət edib. Onun sözlərinə görə, uşaq kanalının yaradılması 5 ayın, 1 ilin işi deyil. Bu kanalın yaradılması üçün bir neçə il lazımdır: “ARB-Günəş kanalı var. Amma TRT-nin istədiyi budur ki, bunu AzTV ilə reallaşdırsın. Bunun üçün güclü heyət, texniki imkanlar lazımdır. Bunun üçün yeni layihələr işlənməlidir. Milli uşaq televiziyasının yaradılması üçün iş aparılır, amma buna zaman lazımdır”.
R.Məmmədov qeyd edib ki, uşaq kanalı ən çox maliyyə xərci aparan kanaldır.
